သျှမ်းပြည်ပြန်လည်ထူထောင်ရေးကောင်စီ (RCSS/SSA) ဟာ ၂၀၂၁ ခုနှစ် စစ်အာဏာသိမ်းပြီးနောက်ပိုင်း အစပိုင်းမှာ စစ်တပ်နဲ့ အငြင်းပွားဖွယ် ငြိမ်းချမ်းရေးဆွေးနွေးပွဲတွေ ပြုလုပ်ခဲ့ပေမယ့် နောက်ပိုင်းမှာတော့ RCSS ဥက္ကဋ္ဌ ဗိုလ်ချုပ်ကြီး ယွက်စစ်က စစ်တပ်ကို ပွင့်ပွင့်လင်းလင်း ပြစ်တင်ဝေဖန်တဲ့ဘက်ကို ပြောင်းလဲလာတယ်လို့ ဥပဒေအထောက်အကူပြုကွန်ရက် (Legal Aid Network) က ဆိုပါတယ်။
ဥပဒေအထောက်အကူပြုကွန်ရက် (Legal Aid Network) က စက်တင်ဘာ ၁၀ ရက်မှာ ထုတ်ပြန်တဲ့ RCSS ရဲ့ နိုင်ငံရေးရပ်တည်ချက် အပြောင်းအလဲအပေါ် သုံးသပ်ချက်မှာ အခုလို ထည့်သွင်းဖော်ပြထားတာ ဖြစ်ပါတယ်။
အရပ်သားတွေအပေါ် စစ်တပ်ရဲ့ သေကြေပျက်စီးစေတဲ့ လေကြောင်းတိုက်ခိုက်မှုတွေကို ဗိုလ်ချုပ်ကြီး ယွက်စစ်က ဝေဖန်ပြောဆိုခဲ့ပြီး မြန်မာစစ်တပ်နဲ့ ခပ်ခွာခွာ ရပ်တည်လာတယ်လို့ ဆိုပါတယ်။
ဒါ့အပြင် ရှမ်းအမျိုးသားနေ့မှာ အမျိုးသားလုံခြုံရေးကို ကာကွယ်ဖို့နဲ့ စစ်တပ်ကို ရင်ဆိုင်တုံ့ပြန်နိုင်ဖို့အတွက် တစ်ခုတည်းသော ဖက်ဒရယ်တပ်မတော်တစ်ရပ် ဖွဲ့စည်းတည်ထောင်ဖို့ ဗိုလ်ချုပ်ကြီး ယွက်စစ်က လူထုကို လူသိရှင်ကြား တောင်းဆိုခဲ့တယ်လို့လည်း ဆိုပါတယ်။
RCSS အဖွဲ့ရဲ့ မူလဦးတည်ချက်ဖြစ်တဲ့ “ဒေသဆိုင်ရာ ကိုယ်ပိုင်ပြဋ္ဌာန်းခွင့်” ကနေ “ရှမ်းပြည်နယ်အတွက် ဖက်ဒရယ်မူဝါဒတွေ မူကြမ်းရေးဆွဲခြင်း” အဆင့်အထိ ပြောင်းလဲလာတယ်လို့ ဆိုပါတယ်။
