အာရက္ခတပ်တော် (AA) ထိန်းချုပ်ထားတဲ့ ပလက်ဝမြို့နယ်၊ စိမ်းညှင်းဝကျေးရွာကို မနေ့က ဩဂုတ်လ ၂၄ ရက်၊ မနက် ၁၁ နာရီကျော်လောက်မှာ စစ်တပ်ဘက်က ဂျက်တိုက်လေယာဉ် ၂ စီးနဲ့ ဗုံးကြဲတိုက်ခိုက်ခဲ့တယ်လို့ AA က သတင်းထုတ်ပြန်ထားပါတယ်။
ဒီဗုံးကြဲခံရမှုကြောင့် စိမ်းညှင်းဝကျေးရွာက ဘုန်းကြီးကျောင်းနဲ့ ရွာထဲကို ဗုံးသီးတွေ ကျရောက်ပေါက်ကွဲခဲ့ပြီး၊ ဘုန်းကြီးကျောင်းမှာ ပညာသင်နေတဲ့ မူလတန်းကျောင်းသား ၁ ဦးနဲ့ အသက် ၁ နှစ်အရွယ် ကလေးငယ် ၁ ဦး အပါအဝင် စုစုပေါင်း ၅ ဦး ပွဲချင်းပြီး သေဆုံးသွားခဲ့တယ်လို့ ဆိုပါတယ်။
ဒါ့အပြင် အသက် ၁၀ နှစ်အောက် မူလတန်းကလေး ၈ ဦး အပါအဝင် စုစုပေါင်း အရပ်သား ၁၇ ဦး ဒဏ်ရာရရှိခဲ့တယ်လို့ သိရပါတယ်။
ဒဏ်ရာရသူတွေထဲမှာ ပြင်းထန်ဒဏ်ရာရထားတဲ့ မူလတန်းကျောင်းသားတွေအပါအဝင် ၆ ဦးဟာ စိုးရိမ်ရတဲ့အခြေအနေမှာ ရှိနေတာကြောင့် သေဆုံးသူဦးရေ ထပ်တိုးလာနိုင်ခြေ ရှိနေလို့ AA ရဲ့ ထုတ်ပြန်ချက်အရ သိရပါတယ်။
လေကြောင်းတိုက်ခိုက်မှုကြောင့် စိမ်းညှင်းဝရွာက လူနေအိမ် ၁၇ လုံးနဲ့ ဘုန်းကြီးကျောင်းဆောင်အချို့လည်း ပျက်စီးသွားခဲ့ရတယ်လို့ သိရပါတယ်။
