တစုတစ်ဖွဲ့ နယ်မြေဒေသတခု လွတ်မြောက်ရေးအတွက် မဟုတ်ဘဲ တနိုင်ငံလုံး လွတ်မြောက်သည်အထိ တပြိုင်တည်း အတူတကွ ပူးပေါင်းတိုက်ပွဲဝင်ကြဖို့ တော်လှန်ရေးအင်အားစု ၇ ဖွဲ့က ဒီနေ့ ဇူလိုင် ၃၀ ရက်နေ့မှာ သဘောတူအတည်ပြုခဲ့ကြပါတယ်။
အဲဒီ သဘောတူညီချက်ကို ပြည်ထောင်စုလွှတ်တော်ကိုယ်စားပြုကော်မတီ (CRPH)၊ အမျိုးသားညီညွတ်ရေးအတိုင်ပင်ခံကောင်စီ (NUCC)၊ အမျိုးသားညီညွတ်ရေးအစိုးရ (NUG)၊ စစ်ကိုင်းဖက်ဒရယ်ယူနစ်လွှတ်တော် (SFUH)၊ စစ်ကိုင်းဖက်ဒရယ်ယူနစ် ကြားကာလအစိုးရ (SFUIG)၊ မန္တလေးဒေသလွှတ်တော် (MRH) နဲ့ မန္တလေးဒေသကြားကာလ အုပ်ချုပ်ရေးကောင်စီ (MIGC) တို့က သဘောတူအတည်ပြုခဲ့ကြတာပဲ ဖြစ်ပါတယ်။
စစ်အာဏာရှင်စနစ်အပါအဝင် အာဏာရှင်စနစ်မှန်သမျှကို အပြီးတိုင် အမြစ်ဖြတ်ချေမှုန်းရေးနဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် ဘုံနိုင်ငံရေးသဘောတူညီချက် ပထမမူကြမ်းကို သဘောတူအတည်ပြုကြောင်း ထုတ်ပြန်ခဲ့ပါတယ်။
အဲဒီ တော်လှန်ရေးဆိုင်ရာ သဘောတူညီချက်မှာ စစ်အာဏာရှင်စနစ် အပါအဝင် အာဏာရှင်စနစ်မှန်သမျှ အပြီးတိုင်ချုပ်ငြိမ်းရေးအတွက် အတူတကွ လက်တွဲပြီး စစ်ရေး၊ နိုင်ငံရေး အပြန်အလှန် ပံ့ပိုးကူညီမှုများဖြင့် အောင်ပွဲရသည်အထိ ပူးပေါင်းတိုက်ပွဲဝင်ကြဖို့ ဆိုပါတယ်။
တော်လှန်ရေးအင်အားစုအသီးသီးရဲ့ ဂုဏ်သိက္ခာနဲ့ တည်ရှိမှုကို အပြန်အလှန် လေးစားအသိအမှတ်ပြု ဖေးမကူညီ၍ ပူးပေါင်းဆောင်ရွက်သွားကြဖို့၊ တော်လှန်ရေးအင်အားစု အချင်းချင်းကြား ဖြစ်ပွားတဲ့ ဘယ် အမြင်မတူမှုကိုမဆို ငြိမ်းချမ်းတဲ့ တွေ့ဆုံဆွေးနွေးရေး နည်းလမ်းများဖြင့်သာ ဖြေရှင်းဆောင်ရွက်သွားကြဖို့ သဘောတူခဲ့ကြပါတယ်။
ဒါ့အပြင် စစ်တပ်နဲ့ နိုင်ငံရေးအရ တွေ့ဆုံဆွေးနွေးရမယ့် ကိစ္စရပ်တွေ ရှိလာပါက အဆိုပါ ဘုံနိုင်ငံရေး သဘောတူညီချက်အပေါ် အခြေခံ၍ တော်လှန်ရေးအင်အားစုများအကြား ဆွေးနွေးတိုင်ပင် သဘောထားရယူပြီး တုံ့ပြန်သွားဖို့ ဆိုပါတယ်။
စစ်တပ်နဲ့ ပူးပေါင်းဆောင်ရွက်နေတဲ့ နိုင်ငံတွေက တော်လှန်ရေးအင်အားစုတွေအပေါ် ခြိမ်းခြောက်ဖိအားပေးမှုတွေကို ညီညီညွတ်ညွတ် ပူးပေါင်း တုံ့ပြန်ဖို့၊ ၂၀၂၀ ရွေးကောက်ပွဲရလဒ်ဟာ ၂၀၀၈ ဖွဲ့စည်းပုံအခြေခံဥပဒေအောက်ရှိ နိုင်ငံရေးစနစ်ကို အကောင်အထည်ဖော်ဖို့ မဟုတ်ဘဲ၊ တော်လှန်ရေးအောင်မြင်ရေးနဲ့ ဖက်ဒရယ်ဒီမိုကရေစီ ပြည်ထောင်စု တည်ဆောက်မှုအတွက် အသိအမှတ်ပြု၍ အပြည့်အဝ စွဲကိုင်အသုံးပြုဖို့ သဘောတူညီခဲ့ကြပါတယ်။
နိုင်ငံရေးဆိုင်ရာ သဘောတူညီချက်တွေအနေဖြင့် စစ်အာဏာသိမ်းမှုကို အပြီးတိုင်ဖယ်ရှားပြီး အနာဂတ်မှာ နိုင်ငံရေးမှာ စစ်တပ်ပါဝင်နေခြင်းကို အဆုံးသတ်ဖို့၊ ဖျက်သိမ်းကြောင်း ကြေညာပြီးတဲ့ ၂၀၀၈ ဖွဲ့စည်းပုံအခြေခံဥပဒေကို ပြန်လည်အသက်သွင်းဖို့ ကြိုးပမ်းမှုမှန်သမျှ တိုက်ဖျက်ဖို့ကိုလည်း သဘောတူခဲ့ကြပါတယ်။
သက်ဆိုင်သူအစုအဖွဲ့တွေအားလုံး လက်ခံနိုင်တဲ့ ဖက်ဒရယ်နဲ့ ဒီမိုကရေစီစနစ်ကို အခြေခံတဲ့ ဖွဲ့စည်းပုံအခြေခံဥပဒေ ရေးဆွဲပြဌာန်းဖို့၊ ထွက်ပေါ်လာတဲ့ ဖက်ဒရယ်ဒီမိုကရေစီ ဖွဲ့စည်းပုံ အခြေခံဥပဒေနဲ့အညီ ဖက်ဒရယ်ဒီမိုကရေစီ ပြည်ထောင်စုအသစ်ကို တည်ဆောက်ဖို့ကိုလည်း သဘောတူခဲ့ကြတယ်လို့ သိရပါတယ်။
