မိုးညှင်းခရိုင် အင်းတော်ကြီးဒေသ ရှမ်းနီယဉ်ကျေးမှုအကအဖွဲ့မှ ဦးဆောင်သူ နှစ်ဦးအပါအဝင် ဒေသခံ အများအပြားကို ကချင်လက်နက်ကိုင်အဖွဲ့ (KIA) က ဇူလိုင် ၆ ရက်နေ့က ဖမ်းဆီးခေါ်ဆောင်သွားတယ်လို့ ဒေသခံတွေက ပြောပါတယ်။
ဖမ်းဆီးခံရသူတွေဟာ အင်းတော်ကြီးဒေသ ရှမ်းနီယဉ်ကျေးမှုအကအဖွဲ့မှ ဒေါ်ညွန့်ရီ နဲ့ ဦးဝင်းဇော်တို့ ဖြစ်တယ်လို့ သိရပြီး ၎င်းတို့နဲ့အတူ နမ့်မီးလောင်ကျေးရွာက ဒေသခံရှမ်းနီတွေလည်း ဖမ်းဆီးခေါ်ဆောင်သွားတယ်လို့ သိရပါတယ်။
“နမ့်မီးလောင်က ဒေါ်ညွန့်ရီ နဲ့ ဦးဝင်းဇော်တို့ကို ဖမ်းသွားတာ ဟုတ်တယ်။ သူတို့နဲ့အတူ နမ့်မီးလောင်က တော်တော်များများကိုလည်း ကားနဲ့ တင်ခေါ်သွားတယ်၊ ညောင်ပင်ရွာဘက်မှာ ပို့ထားတာလို့ သိရတယ်။ ဘယ်သူနဲ့မှ တွေ့ခွင့် မရဘူး” လို့ ဒေသခံတစ်ဦးက ပြောပါတယ်။
အင်းတော်ကြီးဒေသ ရှမ်းနီယဉ်ကျေးမှုအကအဖွဲ့မှ ဦးဆောင်သူ နှစ်ဦးအပါအဝင် ဒေသခံအများအပြားကို ဘယ်လို ကိစ္စရပ်ကြောင့် ဖမ်းဆီးသွားသလဲ ဆိုတာကိုတော့ မသိရှိရသေးဘူးလို့ ဒေသခံတွေက ပြောပါတယ်။
