ရှမ်းနီအမျိုးသားများ တပ်မတော် (SNA) တပ်မဟာ ၆၁၄ ထိန်းချုပ်ဒေသ စစ်ကိုင်းတိုင်း အထက်ပိုင်း ဗန်းမောက်မြို့နယ်မှာ ကဒူးတိုင်းရင်းသားများရိုးရာပွဲတော် ကျင်းပသွားမယ်လို့ သိရပါတယ်။
မနက်ဖြန် ဧပြီ ၂၂ ရက်နေ့မှာ ကျင်းပမယ့် အဲဒီပွဲတော်ကို ဗန်းမောက်မြို့နယ်၊ မံစီကြီးဒေသစိတ် ကျောက်တန်း၊ အရှေ့ကုန်း၊ သရက်ကုန်း၊ လွင်ကြီး၊ ဝေသုခီ ကျေးရွာ ၅ ရွာမှ ကဒူးတိုင်းရင်းသားတွေက စုပေါင်း ကျင်းပကြမှာပဲ ဖြစ်ပါတယ်။
ကဒူးတိုင်းရင်းသားများရိုးရာပွဲတော်ကို မံအင်မင်းကုန်းအုပ်စု၊ အရှေးကုန်းရွာရိုးရာကွင်းမှာ တတိယအကြိမ်မြောက် ကျင်းပသွားမှာဖြစ်ပြီး ရှမ်းနီတိုင်းရင်းသားတွေလည်း တက်ရောက်ကြမယ်လို့ သိရပါတယ်။
မနှစ်က ၂၀၂၅ ခုနှစ် ဧပြီ ၂၂ ရက်နေ့မှာ ကျင်းပခဲ့တဲ့ ကဒူးတိုင်းရင်းသားများရိုးရာပွဲတော်သို့ စစ်ကိုင်းတိုင်း တိုင်းရင်းသားရေးရာဝန်ကြီး ဦးစိုင်းနိုင်နိုင်ကျော် တက်ရောက်ခဲ့တာကိုလည်း တွေ့ရပါတယ်။
ရှမ်းနီအမျိုးသားများ တပ်မတော် (SNA) က ၎င်းတို့ ထိန်းချုပ်ဒေသတွေမှာ လူနည်းစုတွေရဲ့ ရိုးရာ၊ ဓလေ့၊ ပွဲတော်တွေကို ကန့်သတ် ပိတ်ပင်ခြင်း မရှိဘဲ လွတ်လပ်စွာ ကျင်းပခွင့် ပြုထားသလို ကူညီထောက်ပံ့မှုတွေလည်း လုပ်ဆောင်နေတယ်လို့ ဒေသခံတွေက ပြောပါတယ်။
