ရှမ်းပြည်တိုးတက်ရေးပါတီ (SSPP/SSA) ဗဟိုဌာနချုပ် ဝမ်ဟိုင်းမှာ အင်အား ၁၀၀၀ ကျော်ပါဝင်တဲ့ အခြေခံစစ်သင်တန်းဆင်းပွဲကို ကျင်းပခဲ့တယ်လို့ SSPP ရဲ့ ထုတ်ပြန်ချက်အရ သိရပါတယ်။

အဲဒီသင်တန်းဆင်းပွဲကို မနေ့က နိုဝင်ဘာ ၃ ရက် မနက် ၈ နာရီမှာ SSPP/SSA ဗဟိုဌာနချုပ်ရဲ့ ဦးဆောင်မှုနဲ့ ကျင်းပခဲ့တာဖြစ်ပါတယ်။ အခမ်းအနားကို ဗဟိုကော်မတီဝင်တွေ၊ ဗဟိုစစ်သင်တန်းကျောင်း စီမံအုပ်ချုပ်ရေးကော်မတီဝင်တွေနဲ့ သင်တန်းသားတွေ စုစုပေါင်း ၁၀၀၀ ကျော် တက်ရောက်ခဲ့တယ်လို့ ဆိုပါတယ်။

အခမ်းအနားမှာ SSPP ဥက္ကဋ္ဌ ဗိုလ်ချုပ်ကြီး စဝ်ပန်ဖက ပါတီရဲ့ သမိုင်းကြောင်းကို ရှင်းပြခဲ့ပြီး လက်တွေ့လုပ်ငန်းခွင်မှာ အားလုံး ကြိုးစားအားထုတ်ကြဖို့ တိုက်တွန်းခဲ့ပါတယ်။ ဒါ့အပြင် အမျိုးသားရေးဆိုင်ရာ အသိပညာဗဟုသုတတွေနဲ့ ပတ်သက်ပြီးလည်း ပြောကြားခဲ့တယ်လို့ သိရပါတယ်။