မြေအောက်နဲ့ မြေပေါ်ရှိ သဘာဝသယံဇာတတွေကို ပြည်ထောင်စုက ပိုင်ဆိုင်တယ်လို့ ဖွဲ့စည်းပုံအခြေခံဥပဒေမှာ သတ်မှတ်ထားပြီး သယံဇာတထုတ်ယူသုံးစွဲမှုကို ဥပဒေအရ ကြီးကြပ်ရမယ်လို့ သတ်မှတ်ထားပေမယ့်လည်း လက်ရှိမှာတော့ တရားဥပဒေ စိုးမိုးမှုတွေက လျော့ရဲနေတယ်လို့ ထောက်ပြကြပါတယ်။
သယံဇာတ တူးဖော်တဲ့နေရာတွေမှာ အစိုးရရဲ့ တရားဥပဒေ စိုးမိုးမှုရှိတဲ့နေရာတွေ ရှိသလို တိုင်းရင်းသားလက်နက်ကိုင်တွေ စိုးမိုးထားတဲ့ နေရာတွေလည်း အများအပြား ရှိနေတာ ဖြစ်ပါတယ်။
ဒါပေမဲ့ အစိုးရရဲ့ တရားဥပဒေ စိုးမိုးမှုရှိတဲ့ နေရာတွေမှာတောင်မှ တရားမဝင် ခိုးတူးနေမှုတွေ၊ မြန်မာစစ်တပ်ပိုင် ကုမ္ပဏီတွေ၊ လုပ်ငန်းတွေဖြစ်တဲ့ မြန်မာ့စီးပွားရေးဦးပိုင် အများနှင့် သက်ဆိုင်သော ကုမ္ပဏီကပဲ တူးဖော်ခွင့် ရနေတာမျိုး၊ တချို့သော သတ္တုတွင်းတွေကတော့ အစိုးရ ပိတ်ထားတယ်လို့ ပြောနေပေမယ့် တာဝန်ရှိသူတွေက လာဘ်စားပြီး တူးဖော်ခွင့် ပေးထားတာမျိုးလည်း ရှိနေတယ်လို့ သိရပါတယ်။
