စစ်ကိုင်းတိုင်း၊ ဟုမ္မလင်းမြို့နယ် ပကဖ ၁၄ ဦးကို အမျိုးသားညီညွတ်ရေးအစိုးရ (NUG) က ပြည်သူ့ဇာနည်ဆု ချီးမြှင့်ကြောင်း ထုတ်ပြန်ကြေညာခဲ့ပါတယ်။
၂၀၂၆ ခုနှစ် စစ်ဘက်ဆိုင်ရာ သူရဲကောင်းဘွဲ့၊ ဆုနဲ့ တံဆိပ် ချီးမြှင့်အပ်နှင်းခံရသူတွေအနက် ပြည်သူ့ဇာနည်ဆု ရရှိသူ ၃၀၀ ဦး စာရင်းကို NUG က ထပ်မံထုတ်ပြန်ကြေညာခဲ့ရာမှာ ကျဆုံးပြီးဖြစ်တဲ့ ဟုမ္မလင်းမြို့နယ် ပကဖ ၁၄ ဦးလည်း ပါဝင်ခဲ့ပါတယ်။
အလားတူ ဗန်းမောက်မြို့နယ် ပကဖ ၉ ဦး၊ တမူးမြို့နယ် ပကဖ ၆ ဦး၊ ပင်လည်ဘူးမြို့နယ် ပကဖ ၁၂ ဦးတို့လည်း ပြည်သူ့ဇာနည်ဆု ချီးမြှင့်ခံရပါတယ်။
တော်လှန်ရေးမှာ စစ်ရေးတာဝန်တွေကို စွမ်းစွမ်းတမံ ထူးခြားကျေပွန်စွာ ထမ်းဆောင်ခဲ့ကြတဲ့ ရဲဘော် ၂,၀၀၀ နီးပါးကို NUG က စစ်ဘက်ဆိုင်ရာ သူရဲကောင်းဘွဲ့၊ ဆုနဲ့ တံဆိပ်တွေ ချီးမြှင့်ခဲ့တယ်လို့ စက်တင်ဘာ ၇ ရက်မှာ ထုတ်ပြန်ခဲ့ပါတယ်။
ပြည်သူ့ကာကွယ်ရေးတပ်မတော် (PDF) တည်ထောင်ခြင်း ၅ နှစ်ပြည့် အထိမ်းအမှတ်အဖြစ် တော်လှန်ရေး ၅ နှစ်တာကာလအတွင်း အသက်၊ ခန္ဓာနဲ့ ကိုယ်ကျိုးစီးပွားတွေကို မငဲ့ကွက်ဘဲ စစ်ရေးတာဝန်တွေကို ရဲဝံ့စွာ၊ စွမ်းစွမ်းတမံ ထမ်းဆောင်ခဲ့ကြတဲ့ ရဲဘော်တွေကို ချီးမြှင့်တာလို့ ဆိုပါတယ်။
