မွန်၊ ကရင်၊ ပအိုဝ်း လူငယ်နိုင်ငံရေး နှီးနှောဖလှယ်ပွဲတရပ်ကို ၂၀၂၆ ခုနှစ်၊ စက်တင်ဘာလအတွင်း ရာမညဖက်ဒရယ်အင်အားစုသစ် (NRFF) မှ ကမကထပြု၍ ပထမဆုံးအကြိမ် ကျင်းပခဲ့တယ်လို့ ထုတ်ပြန်ခဲ့ပါတယ်။
ဒီဆွေးနွေးပွဲအတွင်း အင်အားစုတွေအကြား အပြန်အလှန် သိရှိနားလည်မှုနဲ့ ယုံကြည်မှုတည်ဆောက်ဖို့ ဆွေးနွေးခဲ့ကြပြီး မွန်ပြည်နယ်အတွင်း တော်လှန်ရေးကြိုးပမ်းမှုတွေအပါအဝင် လက်ရှိ နိုင်ငံရေးဖြစ်ပေါ်တိုးတက်မှုတွေကို သုံးသပ်ဖလှယ်ခဲ့ကြတယ်လို့ ဆိုပါတယ်။
ဒါ့အပြင် လက်ရှိ တော်လှန်ရေး/နိုင်ငံရေးဦးဆောင်မှုတွေမှာ လူငယ်တို့ရဲ့ အခန်းကဏ္ဍကို စုပေါင်းသုံးသပ်ခဲ့ကြပြီး အနာဂတ်မှာ အချင်းချင်း ပူးပေါင်းဆောင်ရွက်မှုတွေ အားကောင်းလာစေရေး လက်တွေ့ကျတဲ့ အစီအစဉ်တွေ ချမှတ်ကြဖို့ သဘောတူညီခဲ့ကြတယ်လို့ ဆိုပါတယ်။
နှစ်ရက်တာ ကျင်းပခဲ့တဲ့ အဆိုပါ နှီးနှောဖလှယ်ပွဲကို မွန်၊ ကရင်၊ ပအိုဝ်း အင်အားစု (၉) ခုမှ ကိုယ်စားလှယ်တွေ တက်ရောက်ခဲ့ကြပြီး မွန်ပြည်ဖက်ဒရယ်ကောင်စီ (MSFC) ၊ ပအိုဝ်းအမျိုးသားဖက်ဒရယ်ကောင်စီ (PNFC) နဲ့ ကရင်လူငယ်အစည်းအရုံး (ဗဟို) မှ ခေါင်းဆောင်တွေက အားပေးစကားတွေ ပြောကြားခဲ့ကြတယ်လို့ သိရပါတယ်။
အဆိုပါ ရာမညဖက်ဒရယ်အင်အားစုသစ် (NRFF) ဟာ ၂၀၂၃ ခုနှစ်မှစတင်ပြီး မွန်လူငယ်နိုင်ငံရေး ဆွေးနွေးပွဲတွေ၊ မွန်-တနင်္သာရီနဲ့ မွန်-ထားဝယ် အင်အားစုတို့အကြား တွေ့ဆုံဆွေးနွေးပွဲတွေ ကျင်းပပြုလုပ်ခဲ့တယ်လို့ သိရပါတယ်။
