အမျိုးသမီး ပြည်သူ့စစ်မှုထမ်းသင်တန်းကို စစ်တပ်က ဩဂုတ် ၁၀ ရက်နေ့မှာ ဖွင့်လှစ်လိုက်ကြောင်း သတင်းတွေ ထွက်ပေါ်ခဲ့ပြီးနောက် စက်ရုံနဲ့ အလုပ်ရုံ အများဆုံးရှိတဲ့ အမျိုးသမီးတွေကြား စိုးရိမ်မှုတွေ မြင့်တက်လာနေပါတယ်။
ဒါပေမယ့် ထွက်ပေါ်နေတဲ့ အမျိုးသမီး ပြည်သူ့စစ်မှုထမ်းသင်တန်းက သတင်းမှား ဖြစ်တယ်ဆိုပြီး ဦးမင်းအောင်လှိုင်ရဲ့ သမ္မတရုံး ပြောရေးဆိုခွင့်ရှိသူ ဒေါက်တာ ခိုင်ခိုင်စိုးက ပြောထားတာကိုလည်း တွေ့ရပါတယ်။
ထွက်ပေါ်နေတဲ့ အမျိုးသမီး ပြည်သူ့စစ်မှုထမ်းသင်တန်းကို မှော်ဘီမြို့ရှိ အမှတ် ၄ အရာခံနဲ့ အကြပ်ကြီးသင်ကျောင်းအပြင် ရကသ ၄ နဲ့ အခြားစစ်သင်တန်းကျောင်းအချို့မှာလည်း လက်ခံလေ့ကျင့်သွားမယ်လို့ ပါရှိတာ ဖြစ်ပါတယ်။
လက်ရှိမှာ ရန်ကုန်မြို့အတွင်း တချို့မြို့နယ်တွေမှာ အမျိုးသားတွေ စစ်မှုမထမ်းရရေးအတွက် သက်ဆိုင်ရာ အုပ်ချုပ်ရေးမှူးတွေကို လစဉ်အလိုက် ငွေကျပ် ၁ သောင်းကျပ်မှ ၄ သောင်းကျပ်အထိ ပေးနေရပြီး မိသားစုတွေရဲ့ စားဝတ်နေရေးအပေါ် ဝန်ထုပ်ဝန်ပိုး ဖြစ်နေကြရပါတယ်။
အခုအခါမှာလည်း အမျိုးသမီး ပြည်သူ့စစ်မှုထမ်းအတွက်ကိုလည်း ပိုက်ဆံတွေ ထပ်ပြီး ပေးနေရမယ်ဆိုရင် စားဝတ်နေရေးနဲ့ ပတ်သက်ပြီး ပိုပြီးအခက်အခဲ ဖြစ်ကြရမှာ ဖြစ်တယ်လို့ ဆိုပါတယ်။
