စစ်ကော်မရှင်က ရှမ်းပြည်တိုးတက်ရေးပါတီ (SSPP/SSA) နဲ့ အဖွဲ့ဝင်အရာရှိတွေအပေါ် မူးယစ်ဆေးဝါးနဲ့ ပတ်သက်မှုရှိကြောင်း ထုတ်ပြန်တာဟာ မဟုတ်မမှန်ကြောင်း SSPP က တုံ့ပြန်ပါတယ်။
နယ်စပ်ကိုဖြတ်ကျော်ပြီးတော့ ပို့ဆောင်မယ့် ကျပ်ဘီလီယံ ၂၅၇ ကျပ်ကျော်တန်ဖိုးရှိတဲ့ မှုးယစ်ဆေးဝါးတွေဟာ အာရက္ခတပ်တော် (AA) နဲ့ SSPP က ဗိုလ်မှူး နှစ်ဦးတို့ ဆက်စပ်နေတယ်လို့ စစ်ကော်မရှင်အဖွဲ့က ဩဂုတ်လ ၂၂ ရက်နေ့ နေ့စွဲ နဲ့ သတင်းထုတ်ပြန်ပါတယ်။
အဆိုပါ စွပ်စွဲခံရသူတွေကတော့ AA က ဗိုလ်မှူးအဆင့်ရှိတဲ့ ကိုရေးဆိုတဲ့သူ နဲ့ SSPP/SSA က ဗိုလ်မှူးအဆင့်ရှိတဲ့ စိုင်းစုဆိုတဲ့ သူတို့ ဖြစ်ကြတယ်လို့ စစ်ကော်မရှင် လက်အောက်ခံ မူး/ယစ်ရဲတပ်ဖွဲ့က ဆိုပါတယ်။
ဒါကြောင့် အဆိုပါ မူးယစ်/ရဲတပ်ဖွဲ့မှ စွပ်စွဲရေးသားထုတ်ပြန်ထားတဲ့ မူးယစ်ဆေးဝါးပတ်သက်သူ ဗိုလ်မှူးစိုင်းစု ဆိုသူကိုလည်း မိမိတို့အဖွဲ့အစည်းမှာ မရှိကြောင်း SSPP က ဆိုပါတယ်။
မိမိတို့ အဖွဲ့အစည်းမှာတော့ ဗိုလ်မှူးကြီး စိုင်းဆုဆိုတဲ့ သူသာရှိကြောင်း၊ ဗိုလ်မှူးကြီးစိုင်းဆုဟာ မိမိတို့ SSPP ရဲ့ အတွင်းရေးမှူးတာဝန်ထမ်းဆောင်လျက်ရှိနေပြီး နိုင်ငံရေး၊ စစ်ရေး၊ ငြိမ်းချမ်းရေး နဲ့ အမျိုးသားပြန်လည်ရင်ကြားစေ့ရေးဆိုင်ရာ ညှိနှိုင်းရေး အထူးတာဝန်လုပ်ငန်းတွေကိုသာ လုပ်ကိုင်ဆောင်ရွက်နေပြီး မူးယစ်ဆေးဝါးနဲ့ ပတ်သက်၍ ရောင်းဝယ်ဖောက်ကားနေခြင်းမျိုး လုံးဝ မရှိကြောင်း သက်ဆိုင်ရာ နဲ့ ပြည်သူတွေ သိရှိနိုင်ဖို့ တင်ပြလိုပါတယ်လို့ ဆိုပါတယ်။
စစ်ကော်မရှင်ရဲ့ ထုတ်ပြန်ချက်ဟာ SSPP ကို နိုင်ငံရေးအရ ဂုဏ်သိက္ခာကျစေလိုခြင်း နဲ့ နာမည်ပျက်ပြီး အဖွဲ့အစည်းအတွင်း စည်းလုံးညီညွတ်မှုကို ထိခိုက်ပျက်ပြားစေလိုခြင်း မိမိတို့ ဆောင်ရွက်နေတဲ့ ငြိမ်းချမ်းရေး လုပ်ငန်းစဉ်တွေကို ထိခိုက်ပျက်ပြားစေခြင်းသာ ဖြစ်တဲ့အတွက် လိုရာဆွဲထည့်ရေးသားထားခြင်း ဖြစ်တယ်လို့ SSPP ရဲ့ ထုတ်ပြန်ချက်မှာ ဖော်ပြထားပါတယ်။
SSPP ဟာ မူးယစ်ဆေးဝါးနဲ့ ပတ်သက်ပြီး လုံးဝပပျောက်နိုင်ဖို့အတွက် မိမိတို့ ထိန်းချုပ်နယ်မြေအတွင်း အဖွဲ့ရဲ့ ပါတီဝင်၊ အဖွဲ့ဝင်တွေ ပါဝင်ပတ်သက်ခြင်း၊ ရောင်းဝယ်ဖောက်ကားခြင်း၊ ထုတ်လုပ်ခြင်းတွေ လုံးဝ ပိတ်ပင်ထားတယ်လို့ ဆိုပါတယ်။
ထိုနည်းတူ မိမိတို့ SSPP ထိန်းချုပ်ထားတဲ့ နယ်မြေဒေသအတွင်း ပြည်သူတွေကိုလည်း မူးယစ်ဆေးဝါးကင်းစင်စေဖို့ ကာကွယ်ရေး လုပ်ငန်းစဉ်တွေ ပညာပေးခြင်း၊ ဖမ်းဆီးခြင်း၊ ဖျက်စီးခြင်း လုပ်ငန်းတွေ နေ့စဉ်နှစ်တိုင်း ကာကွယ်တားဆီးလုပ်ငန်းတွေ စဉ်ဆက်မပြတ် ဆောင်ရွက်လျက်ရှိတယ်လို့ SSPP ရဲ့ ထုတ်ပြန်ချက်မှာ ဖော်ပြထားပါတယ်။
