အာရက္ခတပ်တော် (AA) သိမ်းပိုက်ထိန်းချုပ်ထားတဲ့ ရခိုင်ပြည်နယ်အတွင်းက ငပလီမြို့ကို စစ်တပ်က လေယာဉ် အုပ်စုလိုက် လာရောက်ဗုံးကြဲ တိုက်ခိုက်ခဲ့တယ်လို့ ဒေသတွင်း သတင်းရင်းမြစ်တွေထံက သိရပါတယ်။
ဒီနေ့ နံနက် ၁ နာရီခန့်က စတင်၍ သံတွဲခရိုင် ငပလီမြို့ ငပလီကမ်းခြေတစ်ကြောကို ၂ နာရီကြာ ဗုံး အလုံးရေ ၁၀၀ နီးပါး ကြဲချတိုက်ခိုက်ခဲ့တယ်လို့ ဆိုပါတယ်။
သံတွဲဒေသခံတစ်ဦးက “စစ်တပ်က AA နဲ့ ဆွေးနွေးဖို့ မဖြစ်နိုင်တော့လို့ သူတို့ ပိုင်ဆိုင်တဲ့ ဟိုတယ်တွေကို ဗုံးကြဲဖျက်ဆီးတာလားတော့ မသိဘူး။ အဲမှာက စစ်တပ်ပိုင်တဲ့ ဟိုတယ်တွေ များတယ်” လို့ ပြောပါတယ်။
တပ်က ငပလီကမ်းခြေကို ဂျက်ဖိုက်တာ ၈ စီး၊ Y-12 ၂ စီး စုစုပေါင်း ၁၀ စီးဖြင့် လာရောက် ဗုံးကြဲတိုက်ခိုက်တာလို့ ဒေသခံတွေရဲ့ ပြောပြချက်အရ သိရပါတယ်။ အဆိုပါ ဗုံးကြဲတိုက်ခိုက်မှုနဲ့ ပတ်သက်လို့ ထိခိုက်ပျက်စီးမှုအခြေအနေကိုတော့ မသိရှိရသေးပါဘူး။
ပြီးခဲ့တဲ့ ဩဂုတ် ၁၆ ရက်ကလည်း သံတွဲမြို့အနီးတစ်ဝိုက်ကို လေကြောင်းကနေ ဗုံးကြဲတိုက်ခိုက်ခဲ့တာကြောင့် သားအဖနှစ်ဦး သေဆုံးပြီး အရပ်သားပြည်သူ ၆ ဦး ထိခိုက်ဒဏ်ရာရရှိခဲ့တယ်လို့ AA က ထုတ်ပြန်ထားပါတယ်။
အလားတူ စစ်တပ်က ဩဂုတ် ၁၇ ရက်နဲ့ ၁၈ ရက် နှစ်ရက်ဆက် ရသေ့တောင်မြို့နယ်ကို လေကြောင်းကနေ ဗုံးကြဲတိုက်ခိုက်ခဲ့တယ်လို့ AA ရဲ့ထုတ်ပြန်ချက်အရ သိရပါတယ်။
AA ထိန်းချုပ်ထားတဲ့ မြို့နဲ့ ကျေးရွာတွေကို တပ်က လေကြောင်းကနေ ဆက်တိုက်တိုက်ခိုက်နေတဲ့အတွက် အရပ်သားပြည်သူတွေ သေဆုံး၊ ဒဏ်ရာရရှိမှုနဲ့ နေအိမ်အဆောက်အအုံ ပျက်စီးမှုတွေ တိုးလာနေတယ်လို့ AA က ဆိုပါတယ်။
အာရက္ခတပ်တော် (AA) က ရခိုင်ပြည်နယ်ရှိ မြို့နယ် ၁၇ မြို့နယ်အနက် ၁၄ မြို့နယ် နဲ့ ချင်းပြည်နယ်၊ ပလက်ဝဒေသတို့ကို သိမ်းပိုက်ထားနိုင်သလို ကျန်ရှိသော စစ်တွေ၊ ကျောက်ဖြူမှာလည်း စစ်တပ်နဲ့ တိုက်ပွဲတွေ ဖြစ်ပွားလျက်ရှိနေတယ်လို့ သိရပါတယ်။
