ညီနောင်မဟာမိတ် ၃ ဖွဲ့ ဖြစ်တဲ့ AA၊ TNLA၊ MNDAA တို့ ဖော်ဆောင်ခဲ့တဲ့ ၁၀၂၇ စစ်ဆင်ရေးအတွင်း ၂ နှစ်ကျော်ကြာ ပိတ်ထားခဲ့ရတဲ့ သျှမ်းပြည် မြောက်ပိုင်း၊ လားရှိုးလေဆိပ်ကို ပြန်လည်ဖွင့်လှစ်ပေးပြီး လေယာဉ်ပျံသန်းပြေးဆွဲဖို့ ဒေသခံတွေက လိုလားနေကြတာ ဖြစ်ပါတယ်။
လားရှိုးလေယာဉ် ပျံသန်းပြေးဆွဲမှုတွေကို ၁၀၂၇ စစ်ဆင်ရေးအတွင်း ၂၀၂၄ ခုနှစ်၊ ဇူလိုင် ပထမပတ်ကနေစပြီး တိုက်ပွဲတွေကြောင့် ရပ်နားခဲ့ရတာ ဖြစ်ပါတယ်။
ပြီးခဲ့တဲ့ ၂၀၂၅ ခုနှစ်၊ မေလမှာ လားရှိုးလေဆိပ်ရဲ့ လေယာဉ်ပြေးလမ်းကြောင်းတွေကို ပြန်လည်ပြုပြင်နေပြီး လေယာဉ်ခရီးစဉ်တွေ ပျံသန်းပြေးဆွဲတော့မယ်လို့ သတင်းတွေ ထွက်ပေါ်ခဲ့ပေမယ့်လည်း လက်ရှိအချိန်ထိ ဖွင့်လှစ်တာ မရှိသေးပါဘူး။
လားရှိုးမြို့ကို ကိုးကန့်တပ် MNDAA က ၁၀၂၇ စစ်ဆင်ရေးအတွင်း ၂၀၂၄ ခုနှစ်၊ ဇူလိုင် ၃၀ ရက်နေ့မှာ သိမ်းပိုက်ထိန်းချုပ်နိုင်ခဲ့ပြီး မြန်မာစစ်တပ်က ဧပြီ ၂၂ ရက်နေ့မှာ လားရှိုးမြို့ပေါ်ကို ပြန်လည်ဝင်ရောက်ခဲ့တာ ဖြစ်ပါတယ်။
လက်ရှိမှာ လားရှိုးလေဆိပ်က မြန်မာစစ်တပ်က ပြန်လည်ပြုပြင်ပြီးပြီဖြစ်တဲ့အတွက် လေယာဉ်ခရီးစဉ်တွေ ပြန်လည်ပြေးဆွဲဖို့ကို ဒေသခံတွေက လိုလားနေကြတာ ဖြစ်ပါတယ်လို့ လားရှိုးဒေသခံတစ်ယောက်က ပြောပါတယ်။
“စစ်ပွဲနောက်ပိုင်းမှာ ပိတ်လိုက်တာ အခုချိန်ထိ မဖွင့်နိုင်သေးပါဘူးဗျ။ လေယာဉ်တော့ ကျနော်တို့သိရသလောက်ကတော့ လေယာဉ်ကွင်းတွေ အကုန်ပြင်ဆင်ပြီးပြီ။ အားလုံးတော့ အဆင်သင့်ဖြစ်နေပြီလို့ ကျနော်တို့ ကြားသိရပါတယ်ဗျ။ ဒါပေမယ့် လေယာဉ်ခရီးစဉ်တော့ အခုချိန်ထိ ပြေးဆွဲမှု ကျနော်တို့ မကြားရသေးပါဘူး။ အဲဒါလေး လေယာဉ်ခရီးစဉ်တွေ ပြေးဆွဲစေချင်တာပေါ့” လို့ ပြောပါတယ်။
လားရှိုးလေယာဉ်ခရီးစဉ်တွေ ပြန်လည်ပြေးဆွဲနိုင်ရင် ဒေသခံတွေအတွက် ကျန်းမာရေးကိစ္စတွေ၊ ခရီးသွားလာရေးတွေ အဆင်ပြေလာမှာ ဖြစ်တယ်လို့ လားရှိုးဒေသခံတစ်ယောက်က ပြောပါတယ်။
“ကျနော်တို့ နောက် လိုလားတာကတော့ လားရှိုးက လေယာဉ် ပျံစေချင်ပါတယ်။ လေယာဉ်ခရီးစဉ်လေး ပြေးဆွဲနိုင်မယ်ဆိုရင်တော့ ကျနော်တို့ပြည်သူတွေအနေနဲ့ ခရီးစဉ်လေးတွေ အဆင်ပြေသွားတယ်။ ကျန်းမာရေးအထောက်အကူလည်း အများကြီး ပြုနိုင်တယ်ပေါ့နော်။ ဒါလေးတော့ ကျနော်တို့ ရှမ်းမြောက်ရဲ့ လတ်တလော လိုအပ်ချက်လေး အဓိကပေါ့နော်။ ပြည်သူတွေ လိုလားတောင့်တဆုံး ကိစ္စလေးတစ်ခု ဖြစ်ပါတယ်ဗျ” လို့ ပြောပါတယ်။
လားရှိုးလေဆိပ်ကနေ လားရှိုး – ရန်ကုန်၊ လားရှိုး – မန္တလေး၊ လားရှိုး – တာချီလိတ်၊ လားရှိုး – မြစ်ကြီးနား၊ လားရှိုး – ဟဲဟိုး ခရီးစဉ်တွေ ပျံသန်းပြေးဆွဲတာ ဖြစ်ပါတယ်။
