ရွှေကူမြို့ကနေ ပြည်သူလူထုတွေ ထွက်ခွာဖို့ စာထုတ်ခဲ့တဲ့ ကချင်လက်နက်ကိုင်အဖွဲ့ (KIA) ကို တိုင်လိုင်(ရှမ်းနီ)အမျိုးသားများဖွံ့ဖြိုးတိုးတက်ရေးပါတီ (TNDP) က ကန့်ကွက်ကြောင်း ဇွန်လ ၁၁ ရက်မှာ ထုတ်ပြန်ခဲ့ပါတယ်။
ရွှေကူမြို့အဝင်လမ်းမကြီးနဲ့ ငါးအိုးရွှေကူလမ်းမကြီးအားလုံးကို ၂၀၂၆ ခုနှစ် ဇွန်လ ၈ ရက်နေ့မှစ၍ ရက်အကန့်အသတ်မရှိ သွားလာခွင့်ပိတ်ပင်လိုက်တယ်လို့ KIA က ထုတ်ပြန်ခဲ့ပါတယ်။
ရွှေကူမြို့အတွင်းရှိ ပြည်သူတွေအားလုံး ရွှေကူမြို့အတွင်းမှ ထွက်ခွာတိမ်းရှောင်ကြဖို့ ဇွန်လ (၈) ရက် ရက်စွဲနဲ့ KIA အမှတ်(၁၂) တပ်ရင်းမှ သဘောထားထုတ်ပြန်ထားသည်ကို မိမိတို့ တိုင်လိုင်(ရှမ်းနီ)အမျိုးသားများဖွံ့ဖြိုးတိုးတက်ရေးပါတီ (TNDP) မှ ပြင်းထန်စွာ ကန့်ကွက်ရှုတ်ချတယ်လို့ ဆိုပါတယ်။
ဒါ့အပြင် ရွှေကူမြို့ကို တိုက်ခိုက်လိုတဲ့ KIA ရဲ့ ရည်မှန်းချက်ကို ရပ်တန့်ဖို့ နဲ့ အခြားဒေသတွေမှာလည်း ရန်လိုတဲ့တိုက်ပွဲ ဖော်ဆောင်မှုတွေကို လုံးဝရပ်ဆိုင်းဖို့ တိုက်တွန်းတယ်လို့ ဆိုပါတယ်။
KIA ရဲ့ ရန်လိုမှုကြောင့် လူမျိုးရေးပြဿနာဖြစ်ခဲ့ရင် KIO/KIAရဲ့ တာဝန်သာဖြစ်ကြောင်း TNDP ရဲ့ အသိပေးသဘောထား ထုတ်ပြန်ချက်မှာ ဖော်ပြထားပါတယ်။
