အာရက္ခတပ်တော် (AA) ထိန်းချုပ်ထားတဲ့ ရခိုင်ပြည်နယ်မြောက်ဦးမြို့ကို စစ်တပ်က လေကြောင်းဖြင့် ဗုံးကြဲတိုက်ခိုက်တာကြောင့် အရပ်သားပြည်သူ ၁၂ ဦး သေဆုံးပြီး၊ ၂၀ ဦး ထိခိုက်ဒဏ်ရာရရှိခဲ့တယ်လို့ AA က ထုတ်ပြန်ခဲ့ပါတယ်။
ဩဂုတ်လ ၂၅ ရက်နေ့၊ ည ၁၁ နာရီ ၂၅ မိနစ်အချိန်ခန့်က မြောက်ဦးမြို့ ဒိုင်းကျီရပ်ကွက်ကို ဂျက်ဖိုက်တာနဲ့ ဗုံး ၂ လုံးကြဲချတိုက်ခိုက်ခဲ့ကြောင်း၊ အဆိုပါ တိုက်ခိုက်မှုကြောင့် အလှူလုပ်ရန် ပြင်ဆင်နေကြတဲ့ မိသားစုဝင်တွေ နဲ့ ၎င်းပတ်ဝန်းကျင်အနီးအနားမှ ကလေးငယ် ၅ ဦးအပါအဝင် ပြည်သူ ၁၂ ဦး သေဆုံးခဲ့ရတယ်လို့ ထုတ်ပြန်ချက်မှာ ဖော်ပြထားပါတယ်။
စစ်ဟာ ညအချိန် လူအများ အိပ်မောကျနေတာကို အခွင့်ကောင်းယူပြီး အခုလို အပြစ်မဲ့အရပ်သားပြည်သူတွေ ထိခိုက်သေဆုံးမှုများပြားစေဖို့ တမင်တကာ ရည်ရွယ်ချက်ရှိရှိ ဗုံးကြဲတိုက်ခိုက်ခဲ့ခြင်း ဖြစ်ကြောင်း AA က ဆိုပါတယ်။
ပြီးခဲ့တဲ့ ၂၀၂၅ ခုနှစ်၊ ဇန်နဝါရီလ ၁၈ ရက်နေ့ကလည်း မြောက်ဦးမြို့ ရမ်းချောင်းရွာအနီးတစ်ဝိုက်ကို စစ်တပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့မှုကြောင့် AA က ထိန်းသိမ်းထားတဲ့ စစ်သုံ့ပန်းမိသားစုဝင်တွေထဲမှ ကလေးငယ် နဲ့ အမျိုးသမီးစုစုပေါင်း ၂၈ ဦး သေဆုံးကာ ၂၅ ဦး ဒဏ်ရာရရှိခဲ့တယ်လို့ ဆိုပါတယ်။
အလားတူ ၂၀၂၅ ခုနှစ်၊ မေလ ၁၄ ရက် နဲ့ ၁၅ ရက်နေ့တွေမှာလည်း ကျောက်တော်မြို့၊ ရွာမရပ်ကွက်ကို ဂျက်ဖိုက်တာဖြင့် ၂ ရက်ဆက်တိုက် ဗုံးကြဲတိုက်ခိုက်ခဲ့မှုကြောင့် အပြစ်မဲ့အရပ်သားပြည်သူ ၈ ဦး သေဆုံးခဲ့ရပြီး ဒဏ်ရာရသူ စုစုပေါင်း ၁၄ ဦးအထိ ရှိခဲ့ကြောင်း ထုတ်ပြန်ချက်တွင် ဖော်ပြထားပါတယ်။
နိုင်ငံတစ်ဝန်း စစ်ရှုံးနေတဲ့ စစ်တပ်ဟာ စစ်ဘက်နဲ့မသက်ဆိုင်တဲ့ စာသင်ကျောင်းတွေ၊ ဆေးရုံဆေးခန်းတွေ၊ ဈေးတွေ၊ ဘာသာရေးအဆောက်အုံတွေ၊ လမ်းတံတားတွေ၊ စစ်ဘေးရှောင်စခန်းတွေ နဲ့ လူနေထူထပ်သော မြို့ရွာတွေကို ပစ်မှတ်ထား တိုက်ခိုက်နေပြီး အာရက္ခဒေသအတွင်းသာမက နိုင်ငံအနှံ့အပြား နေ့စဉ်ရက်ဆက် ပြုလုပ်နေပြီး စစ်ရာဇဝတ်မှုတွေကို ပြောင်ပြောင်တင်းတင်း ချိုးဖောက်ကျူးလွန်လျက်ရှိကြောင်း AA က ဆိုပါတယ်။
ရခိုင်ပြည်နယ် မြောက်ဦးမြို့ကို ၂၀၂၄ ခုနှစ်၊ ဖေဖော်ဝါရီ ၈ ရက်နေ့မှာ အာရက္ခတပ်တော် (AA) က အပြီးသတ်တိုက်ခိုက်သိမ်းပိုက်နိုင်ခဲ့ကြောင်း ထုတ်ပြန်ထားပါတယ်။
