မိုးညှင်းခရိုင်၊ အင်းတော်ကြီးဒေသမှာ ရှမ်းနီအမျိုးသားများ တပ်မတော် (SNA) ထိန်းချုပ်ထားတဲ့ မိုင်းနောင်၊ မမုန်ကိုင်ကျေးရွာတွေကို ကချင်လွတ်လပ်ရေးတပ်မတော် (KIA) ပူးပေါင်းအဖွဲ့က ထိုးစစ်ဆင်တိုက်ခိုက်ပြီးနောက် ပြန်လည်ဆုတ်ခွာသွားပြီဖြစ်ကြောင်း ဒေသခံတွေရဲ့ ပြောပြချက်အရ သိရပါတယ်။
ဩဂုတ် ၁၆ ရက် မနက်ပိုင်းမှ စတင်၍ KIA က အင်အားအလုံးအရင်းနဲ့ ထိုးစစ်ဆင် တိုက်ခိုက်လာပြီးနောက် နှစ်ဖက်တိုက်ပွဲ ပြင်းထန်ခဲ့ပြီး KIA ဖက်က သာလွန်အင်အားကြောင့် နေရာအချို့ကို SNA က ပြန်ဆုတ်ခဲ့ကြောင်း၊ ထို့နောက် SNA က ပြန်လည်ထိုးစစ်ဆင်တိုက်ခိုက်တာကြောင့် ဩဂုတ် ၁၇ ရက် ညနေပိုင်းက KIA တပ်ဖွဲ့တွေ ပြန်လည် ဆုတ်ခွာသွားကြောင် ဆိုသည်။
SNA ရဲ့ ရှေ့တန်းသတင်းရင်းမြစ်တစ်ဦးကလည်း “KIA ဖက်က အင်အားအလုံးအရင်းနဲ့ ထိုးစစ်ဆင်လာတယ်၊ နှစ်ဖက်တိုက်ပွဲ ပြင်းထန်ခဲ့တယ်။ သူတို့တော့ ပြန်ဆုတ်သွားတယ်၊ အဝေးကြီး ဆုတ်သွားတာတော့ မဟုတ်ဘူး။ အနီးဝန်းကျင်မှာ ရှိနေတယ်။ KIA ဖက်က အကျအဆုံးများတယ်၊ အလောင်းတွေ ပြန်ထမ်းသွားတာ တွေ့ရတယ်” လို့ ပြောပါတယ်။
အင်းတော်ကြီး ဒေသ မိုင်းနောင်၊ မမုန်ကိုင် တိုက်ပွဲအခြေအနေနဲ့ ပတ်သက်၍ SNA တပ်စခန်းရှိရာ ချဉ်းကပ်လာတဲ့ KIA တပ်ဖွဲ့တွေ ဒရုန်းနဲ့ တိုက်ခိုက်ခံရမှု၊ သေဆုံးအလောင်းတွေကို ပြန်လည်သယ်ဆောင်သွားတဲ့ ရုပ်သံဖိုင်ကို ကျားဖြူစစ်ကြောင်းရဲ့ ထုတ်ပြန်ချက်အရ တွေ့ရပါတယ်။
SNA ထိန်းချုပ်ထားတဲ့ အင်းတော်ကြီးက ဒေသအချို့ကို KIA က တစ်ရက်ခန့် သိမ်းပိုက်နိုင်ခဲ့ပြီး အကျအဆုံးများစွာနဲ့ ပြန်လည်ဆုတ်ခွာသွားကြောင်း၊ သို့သော်လည်း နှစ်ဖက်စစ်ရေးတင်းမာနေတဲ့ အခြေအနေမှာ ရှိနေတယ်လို့ ဒေသခံတွေက ပြောပါတယ်။
မိုးညှင်းဒေသမှာ ရှမ်း နဲ ကချင် လူမျိုးရေး ပဋိပက္ခ မဖြစ်ဖို့ ရှမ်းနီစာပေနှင့်ယဉ်ကျေးမှုကော်မတီအဖွဲ့ဝင်၊ ရှမ်းရိုးရာယဉ်ကျေးမှုအဖွဲ့၊ ကချင်ငြိမ်းချမ်းရေးအကျိုးဆောင်အဖွဲ့ (PCG)၊ ကချင်ဘာသာရေးခေါင်းဆောင်တွေ မြစ်ကြီးနားမြို့မှာ ဩဂုတ် ၁၁ ရက်နေ့က တွေ့ဆုံခဲ့ကြပါတယ်။
နှစ်ဖက်ပဋိပက္ခမဖြစ်ရေး ဆွေးနွေးခဲ့ပြီးနောက် ဩဂုတ်လ ၁၆ ရက် မနက်ပိုင်းမှာပဲ KIA နဲ့ ပူးပေါင်းတပ်ဖွဲ့တွေက SNA ထိန်းချုပ်ဒေသကို အင်အားအလုံးအရင်းနဲ့ ထိုးစစ်ဆင် တိုက်ခိုက်လာတာကြောင့် နှစ်ဖက်တိုက်ပွဲတွေ ပြန်လည်ဖြစ်ပွားခဲ့ကြောင်း ဒေသခံတွေက ပြောပါတယ်။
မိုးညှင်းခရိုင် အင်းတော်ကြီးဒေသမှာ ရှမ်းနီလူမျိုးတွေက အများစု နေထိုင်ကြပြီး ဗမာ၊ ကချင် လူမျိုးစု အနည်းငယ်လည်း နေထိုင်ကြတယ်လို့ သိရပါတယ်။
