သျှမ်းပြည်မြောက်ပိုင်း ကျောက်မဲမြို့နဲ့ မိုးကုတ်မြို့တို့ကို စစ်ကောင်စီက ဒီကနေ့ ဇူလိုင် ၈ ရက် မနက် ၉ နာရီဝန်းကျင်မှာ လေကြောင်း တိုက်ခိုက်ခဲ့ပြီး ဒေသခံ ၄ ဦး သေဆုံးကာ ၁၂ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
မနက် ၉ နာရီ ၅ မိနစ်ခန့်က မိုးကုတ်မြို့အနောက်ပိုင်း၊ ဂေါင်းဦးဘာရပ်ကွက်ကို စစ်ကောင်စီတပ်မှ ဂျက်ဖိုက်တာနဲ့ ပေါင် ၅၀၀ ဗုံး ၁ လုံး ကြဲချတိုက်ခိုက်ခဲ့တာကြောင့် ဒေါ်ခင်မျိုးထွေး၊ ဒေါ်ခင်ထားရီ နဲ့ ဦးလှသိန်းတို့ သေဆုံးခဲ့ပြီး ပြည်သူ ၈ ဦး ပြင်း ထန်ဒဏ်ရာရရှိခဲ့တဲ့အပြင် နေအိမ် ၁၀ အိမ်လည်း ထိမှန်ပျက်စီးသွားခဲ့တယ်လို့ TNLA က ထုတ်ပြန်ပါတယ်။
အလားတူ မနက် ၉ နာရီ ၃ မိနစ်ခန့်က ကျောက်မဲမြို့၊ ငြိမ်းချမ်းရေးကုန်းဘက်မှာ တိုက်ပွဲဖြစ်ပွားခြင်းမရှိဘဲ စစ်ကောင်စီတပ်မှ ဂျက်ဖိုက်တာနဲ့ ပေါင် ၂၅၀ ဗုံး ၂ လုံး လာရောက်ကြဲချတိုက်ခိုက်ခဲ့တာကြောင့် အသက် ၅၆ နှစ်အရွယ် ဒေါ်မြင့်မြင့်သန်း ပွဲချင်းပြီးသေဆုံးခဲ့ပြီး အောင်သက်ပိုင်၊ ဦးဝေ၊ ဒေါ်ပုပ်နဲ့ ဦးအိုက်ဆွယ်တို့ ပြင်းထန်စွာဒဏ်ရာရရှိခဲ့တယ်လို့ ဆိုပါတယ်။
ပြီးခဲ့သည့် ဇူလိုင် ၅ ရက်နေ့လည်း ကျောက်မဲမြို့၊ ရပ်ကွက် ၂ မှာ စစ်ကောင်စီတပ်မှ ဂျက်ဖိုက်တာနဲ့ ဗုံး ၁ လုံး ထပ်မံကြဲချတိုက်ခိုက်မှုကြောင့် အဆောက်အဦး ၄ လုံး ထိမှန်ပျက်စီးခဲ့တယ်လို့ ဆိုပါတယ်။
လက်ရှိမှာလည်း စစ်ကောင်စီတပ်နဲ့ TNLA မဟာမိတ်ပူးပေါင်းတပ်တို့အကြား နောင်ချိုမြို့နယ်မှာ တိုက်ပွဲတွေ အပြင်းအထန် ဖြစ်ပွားလျက်ရှိနေပါတယ်။
