ကရင်နီတော်လှန်ရေး အင်အားစုတွေ သိမ်းပိုက်ထားတဲ့ မိုးဗြဲမြို့ကို စစ်ဆင်ရေး ၆ လအတွင်း ပြန်လည်ထိန်းချုပ် နိုင်ခဲ့တယ်လို့ စစ်တပ်က ထုတ်ပြန်ပါတယ်။
စစ်ဆင်ရေး ၆ လအတွင်း ရန်သူနဲ့ တိုက်ပွဲကြီး ၂၁၅ ကြိမ်၊ ထိတွေ့မှုပေါင်း ၄၀၀ ကြိမ်ဖြစ်ပွားခဲ့ပြီး မိုးဗြဲမြို့ရဲ့ တောင်ဘက်အစွန်ဆုံး မွေတော်ဘုရားရှိရာ မြို့မရပ်ကွက်ကို ဇူလိုင်လ ၅ ရက်နေ့မှာလည်းကောင်း၊ အရှေ့ဘက်အစွန်ဆုံး ရပ်ကွက်ဖြစ်တဲ့ ညောင်ဝိုင်းရပ်ကွက်ကို ဇူလိုင်လ ၆ ရက်မှာလည်းကောင်း ရှင်းလင်းနိုင်ခဲ့ပြီး မိုးဗြဲမြို့ တစ်မြို့လုံးကို ပြန်လည်သိမ်းပိုက်နိုင်ခဲ့တယ်လို့ ဆိုပါတယ်။
ရန်သူဘက်မှာတော့ ကရင်နီအမျိုးသားတိုးတက်ရေးပါတီ (KNPP)၊ ကရင်နီအမျိုးသားကာကွယ်ရေးတပ်ဖွဲ့ (KNDF) နဲ့ မဟာမိတ် တပ်ဖွဲ့တွေအပါအဝင် အဆိုပါ တိုက်ပွဲအတွင်း Free Burma Renger တပ်ဖွဲ့တွေ ပါဝင်ထားတယ်လို့ ဆိုပါတယ်။
စစ်ဆင်ရေးကြီးတစ်ခုလုံး တိုက်ပွဲကြီးငယ် ၆၁၅ ကြိမ်၊ ရန်သူအလောင်း ၂၄ လောင်း၊ လက်နက်မျိုးစုံ ၆၃ လက်အပါအဝင် အခြားအရေးကြီး စာရွက်စာတမ်းတွေနဲ့ Video File တွေ သိမ်းဆည်းရမိခဲ့တယ်လို့ ဆိုပါတယ်။
မိုးဗြဲစစ်ဆင်ရေးအတွင်း စစ်တပ်ဖက်က သေဆုံးသူနဲ့ ထိခိုက်ဒဏ်ရာရရှိသူအချို့ရှိခဲ့တယ်လို့ ဆိုပေမယ့် အတိအကျ ဖော်ပြထားခြင်း မရှိပါပေ။
ဆက်လက်၍ မိုးဗြဲ နဲ့ လွိုင်ကော်မြို့တို့ကို ဆက်သွယ်ထားတဲ့ လမ်းကြောင်းပေါ်ရှိ ရှင်းလင်းဖို့ ကျန်နေသးတဲ့ ၄.၅ ကီလိုမီတာ အကွာအဝေးကို အပြီးတိုင် ဆက်လက်ရှင်းလင်းပေးခြင်းဖြင့် လွိုင်ကော်၊ မိုးဗြဲ၊ ဖယ်ခုံ၊ ပင်လောင်း ဆက်သွယ်ရေး လမ်းမကြီးကို မကြာမီအချိန် ပြန်လည်ဖွင့်လှစ်နိုင်ဖို့ စီမံဆောင်ရွက်နေတယ်လို့ ဖော်ပြထားပါတယ်။
မိုးဗြဲမြို့အပါအဝင် လွိုင်ကော်၊ မိုးဗြဲ၊ ဖယ်ခုံနဲ့ ပင်လောင်း လမ်းကြောင်းကို အပြီးတိုင်ရှင်းလင်းပြီးပါက မိုးဗြဲမြို့ခံတွေအားလုံး ပြန်လည်နေထိုင်နိုင်ရေးနဲ့ အုပ်ချပ်ရေး ယန္တယား အမြန်ဆုံးလည်ပတ်နိုင်ရေး ဆောက်ရွက်သွားမယ်လို့ ထုတ်ပြန်ချက်မှာ ဖော်ပြထားပါတယ်။
ရှမ်းပြည်နယ်တောင်ပိုင်း၊ မိုးဗြဲမြို့ကို ကရင်နီတော်လှန်ရေးတပ်ဖွဲ့တွေက ၂၀၂၃ ခုနှစ် နိုဝင်ဘာလအတွင်း သိမ်းပိုက်ရရှိခဲ့ပြီး စစ်တပ်ဖက်က အခုနှစ်ဦးပိုင်းမှ ပြန်လည်၍ ထိုးစစ်ဆင်တိုက်ခိုက်ခဲ့ပြီးနောက် ပြန်လည်ထိန်းချုပ်နိုင်ခဲ့ခြင်း ဖြစ်တယ်လို့ သိရပါတယ်။
