မြင်းခြံခရိုင်အတွင်းက ကျေးရွာ ၂ ရွာမှာရှိတဲ့ ပြည်သူ့လွတ်မြောက်ရေးတပ်မတော် (PLA) ရဲ့ အထိုင်စခန်းတွေကို အမျိုးသားညီညွတ်ရေးအစိုးရ (NUG) လက်အောက်ရှိ မြင်းခြံခရိုင်ကွပ်ကဲရေးအဖွဲ့က ဝင်ရောက် စီးနင်းခဲ့တယ်လို့ PLA က ထုတ်ပြန်ခဲ့ပါတယ်။
ဒီနေ့ ဇွန်လ ၂၂ ရက်မှာ NUG လက်အောက်ခံတပ်ဖွဲ့တွေက Faw ကား (၂) စီး၊ Probox ကား (၁) စီး ခန့်မှန်းအင်အား ၈၀ ခန့်ဖြင့် ဝင်ရောက်စီးနင်းခဲ့တာဖြစ်ပြီး PLA ကို ကူညီနေတဲ့ ပြည်သူ့နေအိမ်တွေကိုလည်း ဝင်ရောက်ရှာဖွေတာတွေ ပြုလုပ်ခဲ့တယ်လို့ ဆိုပါတယ်။
အဲဒီနောက် အနီးအနားက ကျေးရွာတခုမှာလည်း တပ်တွေဖြန့်ပြီး အရပ်သားပြည်သူတွေကို ဖမ်းဆီးမေးမြန်းတာတွေ ပြုလုပ်နေကြောင်း၊ ဒါ့အပြင် မိမိတို့ ရဲဘော်တဦးရဲ့ အမဖြစ်သူကိုလည်း သေနတ်ဖြင့် ခြိမ်းခြောက် ဖမ်းဆီးသွားတယ်လို့ ထုတ်ပြန်ချက်မှာ ဖော်ပြထားပါတယ်။
PLA အနေနဲ့ NUG ရဲ့ ယန္တရားတွေ နဲ့ အတတ်နိုင်ဆုံး ပူးပေါင်းဆောင်ရွက်ဖို့ ကြိုးစားနေတဲ့ အချိန်မှာ အခုလို တပ်စခန်းတွေကို အင်အားအလုံးအရင်းသုံးပြီး ဝင်ရောက်စီးနင်းတာ နဲ့ မြန်မာစစ်တပ်ကို တိုက်ခိုက်ဖို့ မြင်းခြံခရိုင်အတွင်း လှုပ်ရှားနေတဲ့ မိမိတို့ တပ်ဖွဲ့တွေကို ထွက်ခွာစေတာဟာ ဘယ်လိုမှ လက်ခံနိုင်ဖွယ် မရှိဘူးလို့ ဆိုပါတယ်။
