စစ်ကိုင်းတိုင်း အထက်ပိုင်း၊ ဟုမ္မလင်းမြို့နယ် ကက်သာစံပြကျေးရွာမှာ ဒေသခံပြည်သူ ၆၉၂ ဦးကို ရှမ်းနီအမျိုးသားများတပ်မတော် (SNA) က အခမဲ့ ကျန်းမာရေးစောင့်ရှောက်မှု အကူအညီတွေ ပေးခဲ့တယ်လို့ သိရပါတယ်။
ကက်သာစံပြကျေးရွာမှာရှိတဲ့ ရွှေဘုံသာရွာမကျောင်းတိုက်မှာ ၂၀၂၆ ခုနှစ် ဇူလိုင်လ ၂၈ ရက်ကနေ ၂၉ ရက်နေ့အထိ SNA တပ်မဟာ (၈၉၁) အမှတ် (၂) တပ်ရင်းက ဒေသခံပြည်သူတွေအတွက် အခမဲ့ ကျန်းမာရေးစောင့်ရှောက်မှုနဲ့ ဆေးကုသရေးအစီအစဉ်ကို ဆောင်ရွက်ပေးခဲ့တာပါ။
ဒီအစီအစဉ်မှာ ကက်သာစံပြကျေးရွာနဲ့ အနီးပတ်ဝန်းကျင်ရွာတွေက သက်ကြီးရွယ်အိုတွေ၊ အမျိုးသမီးတွေ၊ ကလေးငယ်တွေနဲ့ နာတာရှည်ရောဂါ ခံစားနေရသူတွေ ပါဝင်ခဲ့ပြီး လူနာတစ်ဦးချင်းစီ၏ ကျန်းမာရေးအခြေအနေကို စစ်ဆေးပြီး လိုအပ်တဲ့ ကုသမှုတွေကို ဆောင်ရွက်ပေးခဲ့တယ်လို့ သိရပါတယ်။
SNA ကျန်းမာရေးအဖွဲ့က ငှက်ဖျားရောဂါ၊ တုပ်ကွေးရောဂါ၊ သွေးတိုးရောဂါ၊ သွေးကျရောဂါတွေ အပါအဝင် အထွေထွေရောဂါတွေကို စစ်ဆေးကုသပေးခဲ့ပြီး လိုအပ်တဲ့ လူနာတွေကို ဆေးဝါးတွေ အခမဲ့ပေးတာ၊ ဆေးထိုးကုသပေးတာနဲ့ ကျန်းမာရေးဆိုင်ရာ အကြံပြုဆွေးနွေးပေးတာတွေကို လုပ်ပေးခဲ့ပါတယ်။
ဒေသခံ ပြည်သူလူထုအနေနဲ့ ဆေးရုံနဲ့ ကျန်းမာရေးဌာနတွေကို သွားရောက်ကုသဖို့ အခက်အခဲရှိသူတွေအတွက် အချိန်နဲ့ ငွေကြေးကုန်ကျစရိတ် သက်သာစေဖို့ SNA ဘက်က စီစဉ်ဆောင်ရွက်ပေးခဲ့တာလို့ သိရပါတယ်။
