ဟုမ္မလင်းမြို့နယ်အတွင်း ငှက်ဖျားရောဂါဖြစ်ပွားမှု ဆက်လက်မြင့်တက်နေပြီး ကျန်းမာရေးဝန်ထမ်းတွေ လိုအပ်လျက်ရှိနေတယ်လို့ ဒေသတွင်း ကျန်းမာရေး စောင့်ရှောက်မှုပေးနေသူတွေထံက သိရပါတယ်။
ဒါ့အပြင် ဟုမ္မလင်းဒေသက ကျေးရွာတွေမှာ ငှက်ဖျားရောဂါကာကွယ်ရေးနဲ့ ကျန်းမာရေးအသိပညာပေးလုပ်ငန်းတွေကို အရှိန်မြှင့်ဆောင်ရွက်ဖို့လည်း လိုအပ်နေတယ်လို့ ဆိုပါတယ်။
ပြီးခဲ့တဲ့ ဇွန်လ ၉ ရက်နေ့က ဟုမ္မလင်းမြို့နယ်၊ ညောင်ကုန်းကျေးရွာမှာ ငှက်ဖျားရောဂါဖြစ်ပွားမှုတွေ များပြားနေတာကြောင့် ကျန်းမာရေးပရဟိတအသင်းမှ လာရောက်၍ ငှက်ဖျားရောဂါ အခမဲ့စစ်ဆေးကုသပေးခြင်းနဲ့ ရောဂါကာကွယ်ရေးလုပ်ငန်းတွေကို ဆောင်ရွက်ပေးခဲ့ကြရပါတယ်။
ကျေးရွာနေပြည်သူတွေကို ငှက်ဖျားရောဂါ ရှိ၊ မရှိ စစ်ဆေးပေးခဲ့ပြီး ရောဂါတွေ့ရှိသူတွေကို အခမဲ့ ကုသပေးတာ၊ လိုအပ်တဲ့ ဆေးဝါးတွေကို ပေးအပ်တာတွေ ဆောင်ရွက်ခဲ့တယ်လို့ သိရပါတယ်။
ဒါ့အပြင် Nghet Phyar ရောဂါ ကာကွယ်ထိန်းချုပ်နိုင်ရေးအတွက် အသုံးပြုနေတဲ့ ခြင်ထောင်တွေကို ဆေးရည်စိမ်ပေးတာတွေကိုလည်း ဆောင်ရွက်ပေးခဲ့ကြတယ်လို့ သိရပါတယ်။
စစ်ဆေးမှုတွေအရ ဒေသတွင်းမှာ တွေ့ရှိရတဲ့ ငှက်ဖျားပိုးအမျိုးအစားတွေဟာ Plasmodium vivax (ဗိုင်ဗက်စ်ငှက်ဖျားပိုး)၊ Plasmodium falciparum (ဖယ်လ်စီပါရမ်ငှက်ဖျားပိုး) နဲ့ Mixed Infection (ငှက်ဖျားပိုးအရောကူးစက်မှု) တို့ဖြစ်ကြောင်း ကျန်းမာရေးပရဟိတအသင်းမှ တာဝန်ရှိသူတစ်ဦးက ပြောပါတယ်။
ဗိုင်ဗက်စ်ငှက်ဖျားပိုး (P. vivax) တွေ့ရှိသူတွေကို ကျေးရွာအဆင့်မှာ ကုသပေးနိုင်သော်လည်း ဖယ်လ်စီပါရမ်ငှက်ဖျားပိုး (P. falciparum) နဲ့ ပိုးအရောကူးစက်မှုတွေ့ရှိသူတွေကို ရောဂါအခြေအနေ စိုးရိမ်ရနိုင်တာကြောင့် ဆေးရုံကို လွှဲပြောင်းကုသမှုခံယူစေတယ်လို့ ဆိုပါတယ်။
အဲဒီ ကျန်းမာရေးစောင့်ရှောက်မှုလုပ်ငန်းတွေကိုတော့ ဆရာမိုးအောင်၊ ဆရာမခင်မာချို၊ ဆရာမသင်းပန်းပန်းနီ၊ ဆရာသိန်းဝယ်၊ ဆရာနိုင်လင်းနဲ့ ချင်းတိုင်းရင်းသား ကျန်းမာရေးဝန်ထမ်းတစ်ဦးတို့က ဦးဆောင်ဆောင်ရွက်ခဲ့ကြတယ်လို့ သိရပါတယ်။
လက်ရှိမှာ ငှက်ဖျားရောဂါကုသရေးဆေးဝါးတွေကို ငှက်ဖျားတိုက်ဖျက်ရေးဌာနမှ အခမဲ့ထောက်ပံ့ပေးလျက်ရှိပြီး ကျေးရွာတွေမှာ ကွင်းဆင်းစစ်ဆေးကုသမှုတွေလည်း ဆောင်ရွက်ပေးနေကြောင်း သို့သော်လည်း လူအင်အားနဲ့ ကျန်းမာရေးဝန်ဆောင်မှု လိုအပ်ချက်တွေ မြင့်မားနေတယ်လို့ သိရပါတယ်။
ဟုမ္မလင်းမြို့နယ်မှာ ငှက်ဖျားရောဂါဖြစ်ပွားမှုတွေ မြင့်တက်လာရခြင်းမှာ ကျန်းမာရေးအသိပညာပေးလုပ်ငန်းတွေ အားနည်းခြင်း၊ ကျန်းမာရေးစောင့်ရှောက်မှု လက်လှမ်းမီမှုနည်းပါးခြင်းနဲ့ ပြည်သူတို့ရဲ့ ရောဂါကာကွယ်ရေးဆိုင်ရာ အသိပညာလိုအပ်နေခြင်းတို့ကြောင့် ဖြစ်နိုင်တယ်လို့ ကျန်းမာရေးဝန်ဆောင်မှု ပေးနေသူတွေက သုံးသပ်ပြောဆိုကြပါတယ်။
