ရခိုင်ပြည်နယ်အတွင်းရှိ သက်ဆိုင်ရာဌာနဆိုင်ရာအသီးသီးမှာ တာဝန်ထမ်းဆောင်နေတဲ့ ဝန်ထမ်းတွေနဲ့ အကြီးအကဲတွေ ခွင့်ပြုချက်မရှိဘဲ သတင်းမီဒီယာတွေကို အင်တာဗျူး ဖြေဆိုခြင်း မပြုလုပ်ကြဖို့ အာရက္ခတပ်တော် (AA) က ညွှန်ကြားထားပါတယ်။
AA အနေဖြင့် အာရက္ခပြည်အလုံးစုံ လွတ်မြောက်ရေး နဲ့ ပြည်လည်တည်ဆောက်ရေး လုပ်ငန်းတွေကို အဆင့်ဆင့် အကောင်အထည်ဖော် ဆောင်ရွက်နေတာနဲ့အညီ ထုတ်ပြန်သင့်တဲ့ သတင်းအချက်အလက်တွေကို ပြည်သူတွေနဲ့ ပြင်ပမီဒီယာတွေကို အချိန်နဲ့ တပြေးညီ သတင်းနဲ့ပြန်ကြားရေး ဌာနမှ ထုတ်ပြန်လျက်ရှိတယ်လို့ ဆိုပါတယ်။
တချို့ဌာနဆိုင်ရာတွေရဲ့ တချို့သော ဝန်ထမ်းတွေဟာ ဗဟိုခွင့်ပြုချက် မရှိဘဲ မိမိသဘောအလျှောက် သတင်းဌာနတွေနဲ့ အင်တာဗျူးတွေ ပြုလုပ်နေတာကို တွေ့ရှိရပြီး အခုလို ပြုလုပ်နေတာဟာ မိမိတို့ရဲ့ မူဝါဒ နဲ့ ကွဲလွဲကာ ပြောကြားမိခြင်း၊ သတင်းအချက်အလက်အမှားတွေကို ပြောဆိုမိခြင်း စတာတွေကြောင့် နောက်ဆက်တွဲ ရှုပ်ထွေးမှုတွေ ဖြစ်ပေါ်လာစေနိုင်တယ်လို့ ဆိုပါတယ်။
ဒါကြောင့် ခွင့်ပြုချက်မရှိဘဲ သတင်းဌာနတွေနဲ့ အင်တာဗျူး မပြုလုပ်ဖို့၊ Social Media တွေမှာ မရေးသားကြဖို့ ညွှန်ကြားချက် ထုတ်ပြန်တာလို့ ဆိုပါတယ်။
အာရက္ခတပ်တော် (AA) ရဲ့ စစ်ဦးစီးချုပ်ဖြစ်သူ ဗိုလ်ချုပ်ထွန်းမြတ်နိုင်ဟာ AA ထိန်းချုပ်ထားတဲ့ နယ်မြေအတွင်းရှိ ရခိုင်လူထုနဲ့ တွေ့ဆုံတဲ့ ပုံတချို့ နေရာအတိအကျနဲ့ လူမှုကွန်ယက်စာမျက်နှာမှာ ပျံ့နှံ့လာခဲ့ပါတယ်။
အဆိုပါ ဓာတ်ပုံတွေ ထွက်ပေါ်လာပြီးနောက်ပိုင်း အဆိုပါ ကျေးရွာကို စစ်တပ်ဖက်က လေကြောင်း တိုက်ခိုက်မှု ပြုလုပ်ခဲ့ခြင်းကြောင့် အရပ်သားအချို့ သေဆုံးမှုတွေ ဖြစ်ပေါ်ခဲ့တယ်လို့ သိရပါတယ်။
၎င်းဖြစ်စဉ်ဖြစ်ပွားခဲ့ပြီးနောက် သက်ဆိုင်ရာဌာနဆိုင်ရာအသီးသီးမှာ တာဝန်ထမ်းဆောင်နေတဲ့ ဝန်ထမ်းတွေနဲ့ အကြီးအကဲတွေ ခွင့်ပြုချက်မရှိဘဲ သတင်းမီဒီယာတွေကို အင်တာဗျူး ဖြေဆိုခြင်း၊ Social Media တွေမှာ ရေးသားခြင်းတွေကို မပြုလုပ်ဖို့ ညွှန်ကြားလာတာလို့ ရခိုင်ဒေသခံတွေက ပြောပါတယ်။
လက်ရှိမှာ အာရက္ခတပ်တော် (AA) ရခိုင်ပြည်နယ် နဲ့ ချင်းပြည်နယ်အတွင်းရှိ မြို့နယ် ၁၄ ခုကို တိုက်ခိုက်သိမ်းပိုက်ထားပြီး အုပ်ချုပ်ရေး ယန္တယားတွေ လည်ပတ်နိုင်ရေး လုပ်ဆောင်လျက်ရှိတယ်လို့ သိရပါတယ်။
