သျှမ်းမြောက်ရှိ တော်လှန်ရေးနယ်မြေတွေနဲ့ ကချင်လွတ်လပ်ရေးတပ်မတော် (KIA) ဌာနချုပ် လိုင်ဇာတို့မှာ ဒရုန်းသင်တန်းတက်ဖူးသူ ကန့်ဘလူမြို့နယ် ပကဖတစ်ဦး စစ်တပ်ထံ ခိုလှုံလိုက်တယ်လို့ သိရပါတယ်။

ကန့်ဘလူမြို့နယ် ပကဖအဖွဲ့ဝင် တော်လှန်​ရေးအမည် ကို Error (အယ်ရာ) ​ Ye Yint Naung ဖေ့စ်ဘုတ်အ​ကောင့်ပိုင်ရှင်ဟာ ဩဂုတ် ၄ ရက်နေ့က စစ်တပ်ထံ သွားရောက်ခိုလှုံခဲ့တယ်လို့ Indaw Revolution-IR က ထုတ်ပြန်ပါတယ်။

“ကန့်ဘလူနယ်အနီးတဝိုက် ​တော်လှန်​​ရေးအင်အားစု​တွေအ​နေနဲ့ ​လေ​ကြောင်းရန် အထူးသတိပြုသင့်ပါတယ်။ ကန့်ဘလူမြို့နယ် ပကဖအဖွဲ့ဝင် ​တော်လှန်​ရေးအမည် ကို Error (အယ်ရာ) ​ Ye Yint Naung ဖေ့စ်ဘုတ်အ​ကောင့်ပိုင်ရှင်သည် မနေ့မနက်ပိုင်း ၁၀း၃၀ ဝန်းကျင်မှာ ကန့်ဘလူ ၆၀၀၆ စခတပ်ထဲသို့ ပူးပေါင်းဝင်ရောက်သွားပါတယ်” ဟု Indaw Revolution-IR က ထုတ်ပြန်ပါတယ်။

ဒါကြောင့် ၎င်းရောက်ဖူးတဲ့ တော်လှန်ရေးအင်အားစုတွေရဲ့ နေရာတွေအနေနဲ့ အထူးသတိပြုကြဖို့နဲ့ ကို Error (အယ်ရာ) ​နဲ့ Friend ဖြစ်တဲ့ ​ဖေ့စ်ဘုတ်အ​ကောင့်ပိုင်ရှင်​တွေလဲ မိမိတို့​ ဒေတာ​တွေ ရန်သူ့လက်ထဲမ​ရောက်ဖို့ Unfriend လုပ်သင့်ကြောင်း တိုက်တွန်းထားပါတယ်။

ပြီးခဲ့တဲ့ ဇူလိုင် ၁၈ ရက်နေ့က တအာင်းတပ် (TNLA) တပ်ဖွဲ့ဝင် အမျိုးသား ၄ ဦး၊ ဓနုပြည်သူ့လွတ်မြောက်ရေးတပ်ဦး(DPLF) တပ်ဖွဲ့ဝင် အမျိုးသား ၅ ဦး နဲ့ မန္တလေး (PDF) မှ တပ်ဖွဲ့ဝင် အမျိုးသား ၃ ဦး၊ အမျိုးသမီး ၂ ဦး စုစုပေါင်း ၁၄ ဦး အလင်းဝင်လာတယ်လို့ စစ်တပ်က ထုတ်ပြန်ပါတယ်။

ထို့အတူ လက်နက်ကိုင် ဆန့်ကျင်ရေးအဖွဲ့မှာ ရောက်ရှိနေသူ KIA နဲ့ KPF အဖွဲ့မှ တပ်ဖွဲ့ဝင် ၁၀ ဦး ဥပဒေဘောင်အတွင်း ပြန်လည်ဝင်ရောက်ခဲ့တယ်လို့ ဇူလိုင် ၁၈ နေ့မှာပဲ စစ်တပ်က ထုတ်ပြန်ထားပါတယ်။