ပြီးခဲတဲ့၂၀၂၁ ခုနှစ်၊ ဖေဖော်ဝါရီ ၁ ရက်နေ့က အာဏာသိမ်းယူခဲ့ပြီး ၂၀၀၈ ဖွဲ့စည်းပုံ အခြေခံဥပဒေ ပုဒ်မ (၄၁၇) အရဟုဆိုကာ နိုင်ငံတော်ကို အရေးပေါ်အခြေအနေ ကြေညာထားတဲ့ စစ်ကောင်စီဟာ ဒီနေ့ ဇူလိုင် ၃၁ ရက်နေ့မှာ အဆိုပါ အရေးပေါ် အခြေအနေကို ပယ်ဖျက်ကြောင်း ထုတ်ပြန်ကြေညာခဲ့ပါတယ်။
၂၀၂၀ အထွေထွေ ရွေးကောက်ပွဲတွင် မဲစာရင်းမှားယွင်းမှုကို ဖြေရှင်းဖို့ ငြင်းပယ်ခြင်း၊ အရေးယူဆောင်ရွက်မှု မပြုခြင်း၊ ပြည်သူ့လွှတ်တော်နှင့် အမျိုးသားလွှတ်တော် အစည်းအဝေးတွေကို ရွှေ့ဆိုင်းပေးဖို့ တောင်းဆိုမှုကို ရွှေ့ဆိုင်းမှု မရှိခြင်း၊ ပြည့်သူ့လွှတ်တော်အစည်းအဝေး အစီအစဉ်များထုတ်ပြန်ကာ အစီအစဉ်တွေ ဆက်လက်လုပ်ဆောင်ဖို့ ဆောင်ရွက်ခြင်းတို့ဟာ ဖွဲ့စည်းပုံအခြေခံဥပဒေပါ ပုဒ်မ ၄၁၇ အရ နိုင်ငံတော်ရဲ့ အချုပ်အခြာအာဏာကို အဓမ္မနည်းဖြင့် ရယူဖို့ ဆောင်ရွက်ခြင်းဖြစ်ပြီး တိုင်းရင်းသားစည်းလုံးညီညွတ်မှုကို ပျက်ပြားစေသည်ဟုဆိုကာ စစ်ကောင်စီက နိုင်ငံတော်အာဏာကို ရယူခဲ့ပါတယ်။
အဲဒီနောက် စစ်ကောင်စီက ၂၀၂၁ ခုနှစ်၊ ဖေဖော်ဝါရီ ၁ ရက်နေ့မှာ နိုင်ငံတော်ကို အရေးပေါ်အခြေအနေကြေညာခဲ့ပြီး ဒုတိယသမ္မတ ဦးမြင့်ဆွေက ယာယီသမ္မတအဖြစ် တာဝန်ယူစေခိုင်းခဲ့ပါတယ်။
၂၀၀၈ ဖွဲ့စည်းပုံ အခြေခံဥပဒေ ၄၁၈၊ ပုဒ်မခွဲ (က) အရဟုဆိုကာ နိုင်ငံတော်ရဲ့ အုပ်ချုပ်ရေး၊ ဥပဒေပြုရေး၊ တရားစီရင်ရေးအာဏာတို့ကို စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ထံ လွှဲအပ်ပီး အရေးပေါ်အခြေအနေကို တစ်နှစ်သတ်မှတ်ခဲ့ပါတယ်။
အဆိုပါ အရေးပေါ်အခြေအနေ တစ်နှစ်ကြေညာပြီးနောက်မှာလည်း နိုင်ငံတော် တည်ငြိမ်အေးချမ်းမှု လိုအပ်သည်ဟုဆိုတာ သက်တမ်း ၆ လ တစ်ကြိမ်နဲ့ အကြိမ်ကြိမ်တိုးခဲ့ရာ ဒီနေ့ ဇူလိုင် ၃၁ ရက်မှာ သက်တမ်းပြည့်ခဲ့ပြီ ဖြစ်ပါတယ်။
ဒါကြောင့် နိုင်ငံတော်ကို အရေးပေါ် အခြေအနေကြေညာ၍ နိုင်ငံတော်အာဏာကို ရယူခဲ့တဲ့ စစ်ခေါင်းဆောင်ရဲ့ တာဝန်မှာ တာဝန်ပြည့်မြောက်အောင် ဆောင်ရွက်ပြီးဟုဆိုကာ နိုင်ငံတော်အာဏာလွှဲအပ်ဆောင်ရွက်စေခဲ့တဲ့ အမိန့်ကို ပယ်ဖျက်ကြောင်း ထုတ်ပြန်ခဲ့ပါတယ်။
လက်ရှိမှာလည်း စစ်ကောင်စီဟာ ၂၀၀၈ ဖွဲ့စည်းပုံ အခြေခံဥပဒေ ၄၂၇၊ ပုဒ်မခွဲ(ခ)အရဟုဆိုကာ ပြည်ထောင်စုအစိုးရအဖွဲ့ကို ယနေ့ ဇူလိုင် ၃၁ ရက်မှာ ဖွဲ့စည်းခဲ့ပါတယ်။
