ကချင်လွတ်လပ်ရေးတပ်မတော် (KIA) က ဖမ်းဆီးသွားတဲ့ နာဂလန်းအမျိုးသားဆိုရှယ်လစ်ကောင်စီ(NSCNK – YA) ရဲ့ တပ်သားတွေနဲ့ လက်နက်တွေကို ပြန်လွှဲပြောင်းပေးဖို့ နာဂကျောင်းသားများအဖွဲ့ (NSO) က ဇူလိုင် ၂၂ ရက်မှာ တောင်းဆိုလိုက်ပါတယ်။
၂၀၂၅ ခုနှစ် ဇူလိုင် ၁၈ ရက်နေ့မှာ KIA တပ်ဖွဲ့တွေက နာဂတပ်မတော်ထက် သာလွန်တဲ့ အင်အားနဲ့ လာရောက်ပြီး နာဂတပ်ဖွဲ့ဝင် ၁၆ ဦးကို လက်နက်တွေနဲ့အတူ တနိုင်းမြစ်အနောက်ဘက်ရှိ တလူးနဲ့ Lungyone ကျေးရွာအနီး နာဂဘိုးဘွားနယ်မြေမှာ ဖမ်းဆီးခဲ့တယ်လို့ ဆိုပါတယ်။
ဒါကြောင့် KIA ရဲ့ လုပ်ရပ်ကို ပြင်းပြင်းထန်ထန် ရှုတ်ချကြောင်း၊ နာဂတပ်ဖွဲ့ဝင်တွေကို ချက်ချင်းလွှတ်ပေးဖို့နဲ့ သိမ်းဆည်းသွားတဲ့ လက်နက်တွေအားလုံးကို ခြွင်းချက်မရှိ အမြန်ဆုံး ပြန်လွှဲပြောင်းဖို့ တောင်းဆိုတယ်လို့ ဆိုပါတယ်။
နာဂနဲ့ ကချင်လူမျိုးတွေဟာ နှစ်ပေါင်းများစွာ အတူတကွ ညီရင်းအကိုတွေ ဖြစ်ခဲ့ကြောင်း၊ ၂၀၂၁ စစ်အာဏာသိမ်းပြီးနောက်ပိုင်း KIA က နာဂလူငယ်တွေကို ဖမ်းဆီးမှု အကြိမ်ကြိမ် ပြုလုပ်ခဲ့မှုကြောင့် ရှိရင်းစွဲ ချစ်ကြည်ရင်းနှီးမှုတွေကို ခြိမ်းခြောက်စေတယ်လို့ ဆိုပါတယ်။
နာဂလူငယ်တွေဟာ ပညာရေး၊ ကျန်းမာရေး၊ စီးပွားရေး ကိစ္စများဖြင့် ကချင်ပြည်နယ်သို့ ခရီးသွားရောက်သည့်အခါမှာလည်းကောင်း၊ ရွှေမှော်၊ ကျောက်မှော်တွေနဲ့ ကချင်ပြည်နယ်နယ်စပ်ရှိ နာဂရွာတွေမှလည်းကောင်း ၎င်းတို့ရဲ့ ဆန္ဒမပါပဲ KIA ရဲ့ စစ်သားစုဆောင်းမှုခံကြခဲ့ရပြီး အချို့မှာ သတင်းအစအနပင် မရရှိတော့ကြောင်း၊ အချို့မှာ စစ်မြေပြင်မှာ လူသားဒိုင်းအဖြစ်အသုံးပြုနေခြင်းဟာ နာဂလူမျိုးတွေကို စော်ကားခြင်း လုပ်ရပ်ဖြစ်တယ်လို့ ဆိုပါတယ်။
နာဂတပ်ဖွဲ့ဝင်တွေနဲ့ လက်နက်တွေကိုပါ ဖမ်းဆီးသွားတဲ့ လုပ်ရပ်ဟာ ပြောင်ပြောင်တင်းတင်း ရန်စတဲ့လုပ်ရပ်ဖြစ်ပြီး နာဂတမျိုးသားလုံးကို အံသြတုန်လှုပ်စေခဲ့ကြောင်း၊ နာဂလူငယ်တွေကို KIA ဖမ်းဆီးမှုကို ပြင်းပြင်းထန်ထန် ကန့်ကွက်တယ်လို့ ဆိုပါတယ်။
