တအာင်းတပ် (TNLA)၊ ဓနုပြည်သူ့လွတ်မြောက်ရေးတပ်ဦး(DPLF) နှင့် မန္တလေး (PDF) မှ တပ်ဖွဲ့ဝင် ၁၄ ဦး အလင်းဝင်လာတယ်လို့ စစ်တပ်က ထုတ်ပြန်ပါတယ်။
TNLA မှ တပ်ဖွဲ့ဝင် အမျိုးသား ၄ ဦး၊ DPLA မှ တပ်ဖွဲ့ဝင် အမျိုးသား ၅ ဦး နဲ့ မန္တလေး (PDF) မှ အမျိုးသား ၃ ဦး၊ အမျိုးသမီး ၂ ဦး စုစုပေါင်း ၁၄ ဦး ဥပဒေဘောင်အတွင်း ဝင်ရောက်လာတယ်လို့ ဆိုပါတယ်။
ဥပဒေဘောင်အတွင်း ငြိမ်းချမ်းစွာ နေထိုင်လိုတာ၊ စစ်တပ်ရဲ့ ငြိမ်းချမ်းရေး လုပ်ငန်းစဉ်တွေကို ယုံကြည်လက်ခံတာတို့ကြောင့် လက်နက်ကိုင် လမ်းစဉ်ကို စွန့်လွှတ်ပြီး နီးစပ်ရာ တပ်စခန်းတွေမှတဆင့် ဥပဒေဘောင်အတွင်း ဝင်ရောက်လာတာလို့ ဆိုပါတယ်။
အဆိုပါ အလင်းဝင်ရောက်လာသူတွေကို ပြန်လည်လက်ခံပြီး လိုအပ်တဲ့ ကူညီထောက်ပံ့မှုတွေ ဆောင်ရွက်ပေးခဲ့ပြီး မိဘအုပ်ထိန်းသူတွေထံ ပြန်လည်လွှဲပြောင်း အပ်နှံခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
အလားတူ သျှမ်းပြည်မြောက်ပိုင်း နောင်ချိုမြို့နယ် တိုက်ပွဲအတွင်း စစ်တပ်ဖက်က တပ်သားတွေ မိမိတို့ တပ်ဖွဲ့ထံ အလင်းဝင်ရောက်မှုတွေ ရှိနေတယ်လို့ ဓနုပြည်သူ့လွတ်မြောက်ရေးတပ်ဦး (DPLF) က ပြီးခဲ့တဲ့ ရက်ပိုင်းမှာ ထုတ်ပြန်ခဲ့ပါတယ်။
