တော်လှန်ရေး အောင်မြင်ရေး အပါအဝင်၊ စစ်အာဏာရှင် နှင့် မည်သည့်အာဏာရှင်စနစ်ကိုမဆို အပြီးတိုင်ဆန့်ကျင်တိုက်ဖျက်ရေး နိုင်ငံလုံးဆိုင်ရာတော်လှန်ရေးမဟာမိတ်တပ်ပေါင်းစု (NRA) ကို ဖွဲ့စည်းလိုက်ကြောင်း ဒီနေ့ ဩဂုတ် ၁၃ ရက်မှာ ကြေညာခဲ့ပါတယ်။
စစ်တပ်အာဏာသိမ်းပြီး ၅ နှစ်နီးပါးကာလအတွင်း အောင်မြင်မှုတွေ ရရှိခဲ့သော်လည်း လက်ရှိကာလအခင်းအကျင်းတွေအရ တော်လှန်ရေးရဲ့ နိုင်ငံံရေး၊ စစ်ရေး၊ သံတမန်ရေး လုပ်ငန်းစဉ်တွေမှာ စိန်ခေါ်မှုတွေ လိုအပ်ချက်တွေ ပေါ်ပေါက်လာပြီး တော်လှန်ရေးကို နောက်ပြန်ဆွဲနေတဲ့ အခြေအနေ တရပ်ဆီ တွန်းပို့နေတယ်လို့ နိုင်ငံလုံးဆိုင်ရာတော်လှန်ရေးမဟာမိတ်တပ်ပေါင်းစုက ဆိုပါတယ်။
အဆိုပါ အခြေအနေတွေကို အလျင်အမြန်ပြန်လည်ကုစားပြီး တော်လှန်ရေးအရှိန်ကို ပြန်လည်မြင့်တင်နိုင်ရေး နဲ့ စစ်အာဏာရှင်စနစ်၊ အာဏာရှင်စနစ်အမျိုးမျိုးကို အပြီးတိုင်အဆုံးသတ်နိုင်ရေးအတွက် မဟာဗျူဟာမြောက် တိုက်ပွဲတွေ ဆက်လက်ဖော်ဆောင်နိုင်ရေးကို ရည်ရွယ်၍ နိုင်ငံလုံးဆိုင်ရာတော်လှန်ရေးမဟာမိတ်တပ်ပေါင်းစုကို ဖွဲ့စည်းခဲ့တာလို့လည်း ဆိုပါတယ်။
ဒါ့အပြင် ပြန့်ကျဲနေတဲ့ လက်နက်ကိုင်တော်လှန်ရေးအဖွဲ့တွေနဲ့ နိုင်ငံရေး အင်အားစုတွေ စုစည်းပြီး တပ်ပေါင်းစုအသွင်ဖြင့် စစ်အနိုင်တိုက်ရေး နဲ့ တော်လှန်ရေး မဟာဗျူဟာ လုပ်ငန်းစဉ်တွေ ပူးပေါင်းညှိနှိုင်းဆောင်ရွက်ရေး၊ ဖက်ဒရယ်ဒီမိုကရေစီစနစ်ဖြင့် နိုင်ငံတော်သစ်တစ်ရပ် ပေါ်ပေါက်လာစေရေး၊ တော်လှန်ရေး အင်အားစုတွေ အားလုံးဖြင့် စစ်ရေးနည်း၊ နိုင်ငံရေးနည်း၊ သံတမန်ရေး နည်းလမ်းတွေနဲ့ အတူတကွ တန်းတူရည်တူမှု အပြန်အလှန်လေးစား အသိအမှတ်ပြုမှုဖြင့် ပူးပေါင်းဆောင်ရွက်ရေးလို့ ဆိုပါတယ်။
မိမိတို့အနေဖြင့် မည်သည့်အာဏာရှင်စနစ်ကိုမဆို ဆန့်ကျင်ကြောင်း၊ ဖက်ဒရယ်ဒီမိုကရေစီစနစ် ဖော်ဆောင်ရန် တော်လှန်ရေး အင်အားစုတွေ၊ တိုင်းရင်းသားတွေ၊ လူမျိုးစုအသီးသီး နဲ့ တန်းတူညီမျှမှု၊ အပြန်အလှန်လေးစားမှုကို အခြေခံလျှက် အတူတကွ လက်တွဲပူးပေါင်းဆောင်ရွက်မယ်လို့ ဆိုပါတယ်။
စစ်အာဏာရှင်စနစ်အပါအဝင် အာဏာရှင်စနစ်တွေကို တော်လှန်တဲ့ လူပုဂ္ဂိုလ်တွေ၊ အဖွဲ့အစည်းတွေ၊ တိုင်းရင်းသား နဲ့ လူမျိုးစု အသီးသီးရဲ့ တော်လှန်ရေး အင်အားစုတွေနဲ့ NRA ရဲ့ မူဝါဒတွေနဲ့အညီ တသားတည်း ပူးပေါင်းဆောင်ရွက်မယ်လို့ ဆိုပါတယ်။
တော်လှန်ရေး လိုအပ်ချက်အရ စစ်အာဏာရှင် အမြစ်ဖျက်ချေမှုန်းရေးအတွက် စစ်အနိုင်တိုက်ရေး လုပ်ငန်းစဉ်ကို အထူးဦးစားပေး ဆောင်ရွက်ရေး၊ စစ်ရေး၊ နိုင်ငံရေး အချို့ကျ ပေါင်းစပ်တဲ့ တော်လှန်ရေးတပ်ပေါင်းစုတရပ် ပေါ်ထွန်းလာရေး ဦးတည်ကြောင်း ဆိုပါတယ်။
