တော်လှန်ရေး အောင်မြင်ဖို့အတွက် အထောက်အကူပြုနိုင်ဖို့ အမျိုးသားညီညွတ်ရေးအစိုးရ (NUG) မှ ခေါင်းဆောင်တွေဟာ ၎င်းတို့ ထိန်းချုပ်နယ်မြေတွေမှာ သွားရောက်ပြီး တော်လှန်ရေးရဲဘော်တွေနဲ့ တွေ့ဆုံခဲ့တယ်လို့ သတင်းထုတ်ပြန်ပါတယ်။
အဆိုပါ ခရီးစဥ်မှာ NUG ယာယီသမ္မတ ဒူဝါလရှီးလ၊ ကာကွယ်ရေးဝန်ကြီး ဦးရည်မွန်၊ ပညာရေးနှင့် ကျန်းမာ ရေးဝန်ကြီး ဒေါက်တာဇော်ဝေစိုး၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီး ဒေါက်တာတူးခေါင်၊ ကျန်းမာရေး ဒုတိယဝန်ကြီး ဒေါက်တာခင်မောင်လွင်၊ နိုင်ငံတော်သမ္မတရုံး အတွင်းဝန် ဦးဘရန်း၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန အတွင်းဝန် ဦးကွမ်မင်း၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန အတွင်းဝန် ဒေါ်နော်ထီးခူနဲ့ ရုံးအဖွဲ့သားတွေ ပါဝင်ခဲ့ပါတယ်။
NUG ထိန်းချုပ်နယ်မြေရဲ့ လုံခြုံရေး၊ အုပ်ချုပ်ရေး၊ အခွန်ကောက်ခံရေး ယန္တရားတွေနဲ့ အနီးကပ်ထိတွေ့၍ တော်လှန်ရေး အောင်မြင်နိုင်ရေးအတွက် အထောက်အကူပြုနိုင်ဖို့၊ မြေပြင်မှာ ဦးဆောင်နေတဲ့ တာဝန်ခံတွေ၊ တော်လှန်ရေး ရဲဘော်ရဲဘက်တွေနဲ့ ထိတွေ့ပြီး ယုံကြည်မှု၊ ခေါင်းဆောင်မှု၊ စနစ်ကျတဲ့ စီမံခန့်ခွဲမှုတွေ တည်ဆောက်သွားနိုင်ဖို့ ရည်ရွယ်ချက်နဲ့ သွားရောက်ခဲ့တာလို့ ဆိုပါတယ်။
ဒါ့အပြင် ထိန်းချုပ်နယ်မြေအတွင်း ဖြစ်ပေါ်နေတဲ့ စိန်ခေါ်မှုတွေ၊ အခက်အခဲ ပြဿနာတွေကို သိရှိပြီး အဖြေ ရှာနိုင်ဖို့၊ မြေပြင်မှာ တော်လှန်ရေးတာဝန် ထမ်းဆောင်နေကြတဲ့ တော်လှန်ရေး ရဲဘော်ရဲဘက်တွေနဲ့ တွေ့ဆုံ၍ တော်လှန်ရေးခွန်အား၊ တော်လှန်စိတ် စွမ်းရည်ကို မြှင့်တင်ပေးနိုင်ဖို့ ရည်ရွယ်တယ်လို့ ဆိုပါတယ်။
ခရီးစဥ်တလျှောက် အစိုးရအဖွဲ့ဝင်တွေနဲ့အတူ အမှတ် (၁) စစ်ဒေသမှူးလည်း ပါဝင်ခဲ့ပြီး အစိုးရ တာဝန် ရှိသူတွေရဲ့ လုံခြုံရေးကို အမှတ် (၁) စစ်ဒေသမှ အထူး တာဝန်ယူ ကြီးကြပ်ဆောင်ရွက်ပေးခဲ့တယ်လို့ ဆိုပါတယ်။
