တော်လှန်ရေးအင်အားစုတွေ သိမ်းပိုက်ထိန်းချုပ်ထားတဲ့ နယ်မြေတွေကို စစ်တပ်လက်ထဲ ပြန်မရောက်ရေး အထူးအလေးထားရမယ့် အချက်ဖြစ်တယ်လို့ အမျိုးသားဒီမိုကရေစီအဖွဲ့ချုပ် (NLD) က ပြောပါတယ်။
ပြည်ထောင်စုလွှတ်တော် ကိုယ်စားပြုကော်မတီ (CRPH) နဲ့ အမျိုးသားညီညွတ်ရေးအစိုးရ (NUG) တို့ ပူးပေါင်းကျင်းပတဲ့ ၇၈ ကြိမ်မြောက် အာဇာနည်နေ့ အထိမ်းအမှတ် အခမ်းအနားသို့ ပေးပို့တဲ့ သဝဏ်လွှာမှာ ထည့်သွင်းဖော်ပြခဲ့တာပဲ ဖြစ်ပါတယ်။
NLD က “စစ်တပ်က ဥပဒေမဲ့ မတရားအာဏာသိမ်းပြီးနောက် စစ်အာဏာရှင်စနစ် အပြီးတိုင်ချုပ်ငြိမ်းရေးအတွက် အင်အားစုအသီးသီး ပေါင်းစုလက်တွဲလျက် ခုခံတော်လှန်စစ်ကြီးတစ်ရပ်ကို အချိန်ကာလ ၄ နှစ်ကျော်ထိ ဆင်နွဲခဲ့ရာ နယ်မြေဒေသအချို့ကို ထိန်းချုပ်နိုင်ခဲ့ပါတယ်။ အဆိုပါ နယ်မြေဒေသတွေကို စစ်တပ်လက်ထဲ ပြန်မရောက်ရေးဟာလည်း အထူးအလေးထားဆောင်ရွက်ရမယ့် အချက်ဖြစ်တယ်” လို့ ဆိုပါတယ်။
၂၀၂၅ ခုနှစ်၊ ဇူလိုင်လ ပထမပတ်မှာ တော်လှန်ရေးအင်အားစုတွေ သိမ်းပိုက်ထားတဲ့ မိုးဗြဲမြို့ကို စစ်တပ်က ပြန်သိမ်းပိုက်ခဲ့သလို တအာင်းတပ် (TNLA) သိမ်းပိုက်ထားတဲ့ နောင်ချိုမြို့ကိုလည်း ပြီးတဲ့ရက်ပိုင်းမှာ စစ်တပ်က ပြန်လည်ထိန်းချုပ်ထားပါတယ်။
ဒါ့အပြင် စစ်ရေးရည်မှန်းချက်တွေ ပြီးမြောက်အောင်မြင်ရေးဟာလည်း လွန်စွာအရေးကြီးသလို နိုင်ငံရေးရည်မှန်းချက်ကိုလည်း တပါတည်း အောင်မြင်အောင် ညီညွတ်ပေါင်းစည်းစွာ အကောင်အထည်ဖော်ကြဖို့ NLD က တိုက်တွန်းထားပါတယ်။
တော်လှန်ရေးနောက်ဆက်တွဲအဖြစ် ကျဆုံးသွားကြတဲ့သူတွေလည်း ကိန်းဂဏန်းတစ်ခုအထိ ရောက်ရှိနေပြီဖြစ်၍ အဆိုပါ အချက်ဟာလည်း တော်လှန်ရေး အမြန်အဆုံးသတ်နိုင်ရေးအတွက် အချက်ပေးခေါင်းလောင်းသံအဖြစ် ရှုမြင်ကြရမယ်လို့ ဆိုပါတယ်။
ထို့အတူ ဖမ်းဆီးထိန်းသိမ်းခြင်း ခံရတဲ့ ဒေါ်အောင်ဆန်းစုကြည်၊ ဦးဝင်းမြင့်တို့အပါအဝင် နိုင်ငံရေးအကျဉ်းသားတွေ လွတ်မြောက်ရေးဟာ တိုင်းပြည်တည်ငြိမ် အေးချမ်းရေးလမ်းစတစ်ခုအဖြစ် ခံယူလျက် ပြည်တွင်းပြည်ပအင်အားစုတွေရဲ့ အားကောင်းတဲ့ တိုက်တွန်းတောင်းဆိုချက်တွေ လိုအပ်တယ်လို့ အမျိုးသားဒီမိုကရေစီအဖွဲ့ချုပ် (NLD) က ဆိုပါတယ်။
အာဇာနည်ခေါင်းဆောင်ကြီးတွေ ကျဆုံးခဲ့တဲ့ ဇူလိုင် ၁၉ ရက်နေ့တရက်တည်းကိုပဲ အောက်မေ့တသ သတိရနေကြရုံမျှ ကျဆုံးလေပြီးသော အာဇာနည်ကြီးတွေအပေါ် ဝာာဝန်ကြေပြွန်တယ်လို့ ကောက်ချက်ချမိမှာကို စိုးရိမ်တယ်လို့ ဆိုပါတယ်။
တိုင်းပြည်မှာ အာဇာနည်တွေများလာလေလေ အဆိုပါ အာဇာနည် ပုဂ္ဂိုလ်ကြီးတွေ သက်စွန့်ကြိုးပမ်းဖော်ဆောင်ခဲ့တဲ့ ရည်မှန်းချက် မျှော်မှန်းချက်တွေက မိမိတို့ ပခုံးနှစ်ဖက်ပေါ် ကျရောက်လာလေလေ ဖြစ်သလို ပြီးမြောက်အောင်မြင်ေအာင် ထက်သန်သောစိတ်ဓာတ်၊ ညီညွတ်ပေါင်းစည်းသော စိတ်ဓာတ်တို့နဲ့ အောင်မြင်တဲ့အထိ ဆက်လက်ဖော်ဆောင်ရမယ်လို့ ဆိုပါတယ်။
