မိုးညှင်းခရိုင် အင်းတော်ကြီးဒေသ မိုင်းနောင်ကျေးရွာမှာ ရှမ်းနီအမျိုးသားများ တပ်မတော် (SNA) နဲ့ ကချင်လွတ်လပ်ရေးတပ်မတော် (KIA) ပူးပေါင်းတပ်တို့အကြား တိုက်ပွဲ ဖြစ်ပွားခဲ့တယ်လို့ သိရပါတယ်။
SNA ကျားဖြူစစ်ကြောင်းမှ ဒီကနေ့ ဇူလိုင် ၁၄ ရက် မနက် ၅ နာရီခန့်အချိန် စတင်ထိုးစစ်ဆင် တိုက်ခိုက်ခဲ့ပြီး KIA စခန်းတစ်ခု သိမ်းပိုက်ရရှိခဲ့သလို အလောင်း နှစ်လောင်း နဲ့ သေနတ်သုံးလက် ရရှိတယ်လို့ ဆိုပါတယ်။
နှစ်ဖက်တိုက်ပွဲ ဖြစ်ပွားခဲ့ပြီး မိုင်းနောင်ကျေးရွာမှာလည်း လက်နက်ကြီးကျ၍ နေအိမ်တစ်လုံး ထိမှန်သွားတယ်လို့ ဒေသခံတစ်ဦးက ပြောပါတယ်။
“လမ်းတွေ ပိတ်ထားတယ်၊ မမုံကိုင် နဲ့ လုံးတုံကတော့ စစ်ရှောင်ခွင့်ရသွားတယ်။ မိုင်းနောင်ကတော့ ရှောင်လို့ မရသေးဘူး။ မိုင်းနောင်ရွာထဲ လက်နက်ကြီး ကျတယ်၊ အိမ် တစ်အိမ်ထိတယ်” လို့ ဒေသခံတစ်ဦးက ပြောပါတယ်။
အင်းတော်ကြီးအရှေ့ခြမ်း ဆနွင်းကုန်းမှာလည်း SNA နဲ့ KIA ပူးပေါင်းတပ်တို့အကြား ပြီးခဲ့တဲ့ လပိုင်းအတွင်းက နှစ်ဖက်တိုက်ပွဲတွေ ဖြစ်ပွားခဲ့ပါတယ်။
KIA နဲ့ ပူးပေါင်းတပ်ဖွဲ့က အင်းတော်ကြီးဒေသမှာ မကြာခဏ လူသစ်စုဆောင်းမှုတွေ လုပ်ဆောင်နေသလို ပြီးခဲ့တဲ့ ဇွန်လအတွင်းကလည်း အင်းတော်ကြီးဒေသလုံးဆိုင်ရာ ရှမ်းနီရိုးရာစာပေနဲ့ ယဉ်ကျေးမှုကော်မတီ ဥက္ကဌ စိုင်းစိန်လွင်ဦး အပါအဝင် ကုန်းမနရွာသားတွေကို ဖမ်းဆီးသွားပြီး ရက်ပိုင်းအတွင်း ပြန်လွှတ်ပေးခဲ့တဲ့ ဖြစ်စဉ်တွေလည်း ရှိခဲ့ပါတယ်။
