ဒေသတွင်း လက်နက်ကိုင်တပ်ဖွဲ့တွေ စိုးမိုးထိန်းချုပ်ထားတဲ့ ကလေးဝ-ယာကြီး-မုံရွာ လမ်းကြောင်းကို ပြန်လည်ထိန်းချုပ် ဖွင့်လှစ်နိုင်ရေးဟုဆိုကာ စစ်တပ်က ထိုးစစ်ဆင်တိုက်ခိုက်နေတယ်လို့ သတင်းထုတ်ပြန်လာပါတယ်။
မြန်မာ-အိန္ဒိယ ချစ်ကြည်ရေးလမ်းပိုင်းတစ်ခုအပါအဝင်ဖြစ်တဲ့ ကလေးဝ-ယာကြီး-မုံရွာ လမ်းကြောင်းတစ်လျှောက် ပြန်လည်ထိန်းချုပ်ဖွင့်လှစ်ပေးနိုင်ရေး ၂၀၂၆ ခုနှစ် ဇွန် ၂ ရက်မှစတင်ပြီး စစ်ကြောင်းခွဲကာ ထိုးစစ်ဆင်နေတာလို့ ဆိုပါတယ်။
ဇွန် ၂ ရက်က စတင်ခဲ့တဲ့ အဲဒီစစ်ကြောင်းဟာ ရေလယ်ကျွန်းကျေးရွာ၊ ကျောက်လုံးကြီး တဲစုကျေးရွာ၊ ချောင်းမကျေးရွာ၊ အောင်မင်္ဂလာကျေးရွာ၊ သစ်ရာပင်လမ်းဆုံ၊ သစ်ရာပင်ကျေးရွာ၊ ဝင်းကုန်းကျေးရွာ၊ ညောင်ပင်လယ်ကျေးရွာ၊ ယာကြီးကျေးရွာ၊ ကွမ်းပင်ရေ၊ လာပို့ကျေးရွာ၊ စစ်လင်းချောင်း၊ ထုံးကြီးကျေးရွာတို့ကို အဆင့်ဆင့်ပြန်လည်သိမ်းပိုက်ထိန်းချုပ်နိုင်ခဲ့တယ်လို့ ထုတ်ပြန်ခဲ့ပါတယ်။
အဲဒီနောက် ဇွန် ၂၃ ရက်မှာ ကျော်ကျေးရွာသို့ရောက်ရှိပြီး ကျေးရွာရှိ လခရတပ်ဖွဲ့တွေနဲ့ ပူးပေါင်းကာ ကျေးရွာတစ်ဝိုက် လုံခြုံရေးလုပ်ငန်းတွေကို ဆက်လက်ဆောင်ရွက်နေတယ်လို့ ဆိုပါတယ်။
အလားတူ မြန်မာ-အိန္ဒိယ နှစ်နိုင်ငံ နယ်စပ်ကုန်သွယ်ရေးအတွက် အရေးပါတဲ့ လမ်းကြောင်းတစ်ခုဖြစ်တဲ့ ကလေး-တမူး လမ်းကြောင်းတစ်လျှောက်ကို ပြန်လည်ထိန်းချုပ်နိုင်ဖို့ စစ်တပ်က ဇွန်လ ၇ ရက်နေ့က ထိုးစစ်ဆင်တိုက်ခိုက်နေတာပဲဖြစ်ပါတယ်။
အဲဒီနောက် တမူးခရိုင်အတွင်းရှိ အိန္ဒိယ-မြန်မာ ကုန်သွယ်ရေးလမ်းကြောင်းပေါ်က အရေးပါတဲ့ ခါမ်းပတ်မြို့ကိုလည်း ဇွန် ၂၀ ရက်မှာ ပြန်လည်သိမ်းပိုက် ထိန်းချုပ်လိုက်တယ်လို့ ဆိုပါတယ်။
မြန်မာ-အိန္ဒိယ နှစ်နိုင်ငံကုန်စည်စီးဆင်းမှု နဲ့ ဒေသတွင်း ကုန်စည်ပို့ဆောင်မှုတွေအတွက် အဆိုပါ ကလေးဝ – ယာကြီး – မုံရွာလမ်းကြောင်း ပြန်လည်ဖွင့်လှစ်နိုင်ရေး အကြမ်းဖက်မှုချေမှုန်းမှုစစ်ဆင်ရေး (Counter – Terrorism Operation) ဖြင့် ဆက်လက်ထိုးစစ်ဆင်မယ်လို့ ထုတ်ပြန်ချက်မှာ ဖော်ပြထားပါတယ်။
