စစ်ကိုင်းတိုင်း၊ ယင်းမာပင်ခရိုင်အမှတ် (၁၅) တပ်ရင်းမှူး ထောက်ခံစာနဲ့ သယ်ဆောင်လာတဲ့ မူးယစ်ဆေးဝါးတွေအပါအဝင် တော်လှန်ရေး ရဲဘော် ၃ ဦးနဲ့ ယာဉ်မောင်းတွေကို ဖလမ်းမြို့နယ်မှာ ဇူလိုင် ၈ ရက်နေ့က ဖမ်းဆီးရမိခဲ့တယ်လို့ Chinland Defense Force – Hakha ထုတ်ပြန်ပါတယ်။
တပ်ရင်းမှူး ထောက်ခံစာနဲ့ ဟားခါးမြို့နယ် ဗားရ်တံတားသို့ Hilux 9K-1693၊ ကိုစိုးသူပိုင်ဆိုင်တဲ့ 1J-6011 Forland ကားတွေနဲ့ သယ်ယူပို့ဆောင်တဲ့ စိတ်ကြွဆေးပြား ၃သန်းခန့်၊ No. 4 ခေါ် ဘိန်းဖြူ ၁၁၀ကီလိုဂရမ်ခန့်၊ မောင်းပြန်သေနက် (၂) လက်၊ mini starlink (၂) ခုတို့ သိမ်းဆည်းရမခဲ့တယ်လို့ ဆိုပါတယ်။
မူးယစ်ဆေးဝါးတွေနဲ့အတူ တော်လှန်ရေး ရဲဘော် (၃) ဦး၊ ယာဥ်မောင်း (၁) ဦး နဲ့ စပယ်ယာ (၁) ဦးတို့ကို Chinland Defense Force – Hakha မှ ဟားခါးမြို့နယ်အတွင်း ဖမ်းဆီးခဲ့တယ်လို့ ဆိုပါတယ်။
အဆိုပါ မူးယစ်ဆေးဝါးတွေကို သယ်ယူပို့ဆောင်ရေးမှာ တာဝန်ခံဖြစ်တဲ့ မောင်ဇော်လတ် အမည်ရင်း ဦးဝင်းမော် နဲ့ ကိုပုတီး အမည်ရင်း ဦးကျော်မင်းဇော်တို့ဟာ ထွက်ပြေးတိမ်းရှောင်ခဲ့တယ်လို့ ထုတ်ပြန်ချက်မှာ ဖော်ပြပါတယ်။
ဖမ်းဆီးထားတဲ့ မူးယစ်ဆေးဝါးတွေကို မနေ့က ဇူလိုင်လ (၉) ရက်နေ့မှာ မီးရှို့ဖျက်ဆီးခဲ့ပြီး ဖမ်းဆီးထားသူတွေကိုလည်း တရား ဥပဒေအတိုင်း အရေးယူဆောင်ရွက်သွားမယ်လို့ ဆိုပါတယ်။
ဟားခါးမြို့နယ်အတွင်း မူးယစ်ဆေးဝါးတွေ ထုတ်လုပ်တာ၊ ဖြန့်ဖြူးတာ၊ ရောင်းချတာ၊ သုံးစွဲတာ နဲ့ သယ်ယူပို့ဆောင်တာတွေကို ထပ်မံတွေ့ရှိပါက မိမိတို့ Chinland Defense Force – Hakhaမှ ထိရောက်စွာ အရေးယူသွားမယ်လို့ ဆိုပါတယ်။
