ပြည်တွင်း၊ ပြည်ပရှိ မွန်အမျိုးသားတွေအားလုံး အမျိုးသားရေး တာဝန်အသိစိတ်နဲ့ မွန်အမျိုးသား လွတ်မြောက်ရေး တိုက်ပွဲမှာ ကျရာကဏ္ဍ၊ နိုင်ရာဝန်မှ ကိုယ်စီပါဝင်ဖို့ မွန်ပြည်သစ်ပါတီ (စစ်အာဏာရှင်တိုက်ဖျက်ရေး) NMSP-AD က တိုက်တွန်းပါတယ်။
ဒီကနေ့ တပို့တွဲလပြည့်ကျော် ၁ ရက်မှာ ကျရောက်တဲ့ (၇၈) ကြိမ်မြောက် မွန်အမျိုးသားနေ့ ထုတ်ပြန်ကြေညာချက်မှာ ဖော်ပြထားတာပဲ ဖြစ်ပါတယ်။
မွန်အမျိုးသားတွေရဲ့ ကိုယ့်ကြမ္မာကိုယ်ဖန်တီးခွင့် အခွင့်အရေးကို မွန်လူမျိုးတွေ တိုက်ပွဲဝင်မှသာ ရရှိနိုင်မျာဖြစ်ကြောင်း၊ အဲဒီလို တိုက်ပွဲဝင်ရာမှာ မွန်တစ်မျိုးသားလုံး ပူးပေါင်းပါဝင်နိုင်မှသာ အောင်ပွဲကို အမြန်ဆွတ်ခူးနိုင်မယ်လို့ အပြည့်အဝ ယုံကြည်ကြောင်း ဆိုပါတယ်။
NMSP-AD အနေနဲ့ မွန်တော်လှန်ရေးအဖွဲ့အစည်းတွေ မဟာမိတ်တော်လှန်ရေး အဖွဲ့အစည်းတွေနဲ့ ပူးပေါင်းပြီး တော်လှန်ရေးအရှိန် မြင့်တင်သွားမှာ ဖြစ်တယ်လို့ ဖော်ပြပါတယ်။
အချုပ်အခြာအာဏာ (၃) ရပ်နဲ့ ပြည့်စုံတဲ့ ကိုယ်ပိုင်ပြဌာန်းခွင့် အပြည့်အဝရှိတဲ့ မွန်ပြည်တည်ဆောက်နိုင်ရေး အတွက် ပြည်နယ်အတွင်းရှိ တော်လှန်ရေးအင်အားစုတွေနဲ့ သော်လည်းကောင်း၊ ဘဝတူ တိုင်းရင်းသား လူမျိုးတွေနဲ့ သော်လည်းကောင်း ပူးပေါင်းပြီး တိုက်ပွဲ ဝင်သွားမယ်လို့ ဆိုပါတယ်။
