ရှမ်းနီတိုင်းရင်းသူတစ်ဦးဖြစ်တဲ့ Florence Nightingale (ဖလော့ရင့်စ် နိုက်တင်ဂေးလ်)ဆုရှင် သားဖွားဆရာမကြီး ဒေါ်နန်းသိန်းရီ ၂၀၂၅ခုနှစ်၊ သြဂုတ်လ(၂၆)ရက်၊ မနက် (၉း၃၀) နာရီမှာ အထက်ချင်းတွင်း ရှမ်းနီဒေသ၊ သမိုင်းဝင် သောင်သွပ်ရွာရှိ နေအိမ်မှာ ကွယ်လွန်အနိစ္စရောက်ကြောင်း ကြားသိရသဖြင့် မိမိတို့ ရှမ်းနီအမျိုးသားများ ညီညွတ်ရေးအစည်းအရုံး(SNUA) က ကျန်ရစ်သူ မိသားစုနဲ့ထပ်တူ ကျေကွဲဝမ်းနည်းရကြောင်း သဝဏ်လွှာပေးပို့ထားပါတယ်။
သားဖွားဆရာမကြီး ဒေါ်နန်းသိန်းရီဟာ ၁၉၉၅ ခုနှစ်မှာ ရွာလုံးကျွတ်နီးပါး မီးဘေးကြီးစွာ သင့်ခဲ့ရတဲ့ သောင်သွပ်ရွာရှိ အိမ်တစ်အိမ်မှာ ပိတ်မိနေတဲ့ ကလေးငယ်ကို ရဲဝံ့စွာ အသက်စွန့်ကယ်ဆယ်နိုင်ခဲ့တာကြောင့် အပြည်ပြည်ဆိုင်ရာ ကြက်ခြေနီကော်မတီ (ICRC) ရဲ့ ဖလော့ရင့်စ်နိုက်တင်ဂေးလ် ဆုတံဆိပ်ကော်မရှင်မှ ၂၀၀၁ ခုနှစ်မှာ Florence Nightingale (ဖလော့ရင့်စ် နိုက်တင်ဂေးလ်)ဆု ချီးမြှင့်ခြင်းကို ခံယူနိုင်ခဲ့သူဖြစ်တယ်လို့ ဆိုပါတယ်။
သားဖွားဆရာမကြီး ဒေါ်နန်းသိန်းရီ သောင်သွပ်ရွာ မီးဘေးမှာ အသက်စွန့်၍ ကလေးငယ်ကို ကယ်ဆယ်ခဲ့ရသဖြင့် ကိုယ်လက်အင်္ဂါချို့ယွင်းခဲ့ရသော်လည်း အားမလျော့ဘဲ သူနာပြုစိတ်ဓာတ်အပြည့်ဖြင့် ကျန်းမာရေးဌာနတွေမှာပဲ ဆက်လက်တာဝန်ထမ်းဆောင်ခဲ့သူဖြစ်တယ်လို့ ဆိုပါတယ်။
သားဖွားဆရာမဘဝတစ်လျှောက်မှာ အထက်ချင်းတွင်း ရှမ်းနီဒေသရှိ ရှမ်းနီ နဲ့ ချင်း၊ နာဂ စတဲ့ အတူနေတိုင်ရင်းသားတို့ရဲ့ ကျေးရွာတွေမှာ တာဝန်ထမ်းဆောင်ခဲ့သူတစ်ဦးလည်း ဖြစ်ပါတယ်။
ရှမ်းနီတိုင်းရင်းသားတို့ရဲ့ ဂုဏ်ဆောင်ဖြစ်တဲ့ Florence Nightingale (ဖလော့ရင့်စ် နိုက်တင်ဂေးလ်) ဆုရှင် သားဖွား ဆရာမကြီး ဒေါ်နန်းသိန်းရီရဲ့ ကွယ်လွန်အနိစ္စရောက်ခြင်းဟာ ရှမ်းနီတစ်မျိုးသားလုံးအတွက် လေးစားတန်ဖိုးထား ရသူတစ်ဦးကို ဆုံးရှုံးလိုက်ရခြင်းဖြစ်တယ်လို့ ပေးပို့တဲ့ သဝဏ်လွှာမှာ ဖော်ပြထားပါတယ်။
ရှမ်းနီအမျိုးသမီးကဏ္ဍအတွက် လေးစားရတဲ့ အမျိုးသမီးစွမ်းဆောင် ရှင်တစ်ဦးကို ဆုံးရှုံးလိုက်ရခြင်းဖြစ်သည်ဟု မိမိတို့အစည်းအရုံးက မှတ်ယူပါကြောင်း နဲ့ ဆရာမကြီး ကောင်းရာသုဂ တိ ဘုံဌာနသို့ ရောက်ရှိပါစေကြောင်း လေးနက်စွာ ဆုတောင်းမေတ္တာ ပေးပို့အပ်ပါတယ်လို့ ဆိုပါတယ်။
