အပြည်ပြည်ဆိုင်ရာ ကြက်ခြေနီကော်မတီ (ICRC) က ချီးမြှင့်ထားတဲ့ ဖလောရင့်နိုက်တင်ဂေးဆုရှင် သားဖွားဆရာမ ရှမ်းနီအမျိုးသမီး ဒေါ်သိန်းရည် ဟာ ဩဂုတ် ၂၆ ရက် မနက် ၉ နာရီ ၃၀ မိနစ်ဝန်းကျင်မှာ ကွယ်လွန်သွားပြီ ဖြစ်တယ်လို့ နီးစပ်သူတွေထံက သိရပါတယ်။
ဖလောရင့်နိုက်တင်ဂေးဆုရှင် ရှမ်းနီအမျိုးသမီး ဒေါ်သိန်းရည်ဟာ ကွန်လွန်ချိန် အသက် ၇၄ နှစ်အရွယ်ရှိပြီဖြစ်ပြီး လက်ရှိ နေထိုင်ရာ သောင်သွပ်ကျေးရွာမှာ ကွယ်လွန်သွားကြောင်း သိရပါတယ်။
ရှမ်းနီအမျိုးသမီး ဒေါ်သိန်းရည်ကို အဖ ဦးထွန်းစိန် အမိ ဒေါ်နန်းလိတ်တို့က ၁၉၅၁ ခုနှစ် အောက်တိုဘာ ၅ ရက်မှာ ဟုမ္မလင်းမြို့နယ် မောင်းခမ်းကျေးရွာမှာ မွေးဖွားခဲ့ပါတယ်။
၁၉၇၃ ခုနှစ်မှာ သားဖွားဆရာမ သင်တန်းတက်ရောက် အောင်မြင်ခဲ့ပြီး ၁၉၇၅ ခုနှစ်မှ စ၍ သားဖွားဆရာမအဖြစ် တာဝန်ထမ်းဆောင်ခဲ့ကြောင်း၊ အဲဒီနောက် နန်းယွန်းမြို့နယ် လုံခိုင်ကျေးလက် ကျန်းမာရေးဌာန၊ တမူးမြို့နယ် သနန်ကျေးလက် ကျန်းမာရေးဌာန၊ ဖိုင်လင်းကျေးလက်ကျန်းမာရေး ဌာနခွဲ၊ ဟုမ္မလင်းမြို့နယ် သောင်သွပ် တိုက်နယ်တို့မှာ သားဖွားဆရာမအဖြစ် တာဝန်ထမ်းဆောင်ခဲ့ပါတယ်။
၁၉၉၅ ခုနှစ် သောင်သွပ်ကျေးရွာမှာ အိမ်ခြေ ၁၀၀ ကျော် မီးလောင်မှုဖြစ်ပွားခဲ့ပြီး မီးလောင်၍ အိမ်ထဲ ပိတ်မိနေတဲ့ အသက် ၇ နှစ်အရွယ် မိန်းကလေးငယ်တစ်ဦးကို ဆရာမ ဒေါ်သိန်းရည် ကိုယ်တိုင် ဝင်ရောက်ကယ်ဆယ်ခဲ့တယ်လို့ မှတ်တမ်းတွေအရ သိရပါတယ်။
ဝင်ရောက်ကယ်ဆယ်ရင်း နှစ်ဦးစလုံး မီးလောင်ဒဏ်ရာရရှိခဲ့ကာ မိန်းကလေးငယ်ကတော့ ဖောင်းပြင်ဆေးရုံကြီးမှာ ဆုံးပါးသွားခဲ့ပြီး ဆရာမ ဒေါ်သိန်းရည်ကတော့ ခန္ဓာကိုယ်တခြမ်းလုံး မီးလောင်ဒဏ်ရာတွေ ရရှိခဲ့ပြီး ဖောင်းပြင် ဆေးရုံးမှာ ၉ ရက်ကြာ ကုသခဲ့ပြီး မုံရွာသို့ ဆက်လက်၍ ဆေးဝါးကုသမှု ခံယူခဲ့ရပါတယ်။
ဒါကြောင့် မိမိအသက်ကို ပဓာနမထားတဲ့ သူရဲကောင်းစိတ် အာဂသတ္တိတွေနဲ့ ကူညီမှုကြောင့် အပြည်ပြည်ဆိုင်ရာ ကြက်ခြေနီကော်မတီ (ICRC) က ပေးအပ်တဲ့ ကမ္ဘာ့သူနာပြုလောကရဲ့ အမြင့်ဆုံးဆု ဖလောရင့်နိုက်တင်ဂေးဆုကို မြန်မာပြည်ရဲ့ သုံးဦးမြောက်ဆုအဖြစ် ၂၀၀၁ ခုနှစ် သြဂုတ် ၂၉ ရက်နေ့မှာ ရရှိခဲ့ပါတယ်။
