“ဝ” ပြည်သွေးစည်း ညီညွှတ်ရေး တပ်မတော် (UWSA) ထိန်းချုပ်နယ်မြေ၊ ဟိုပန်ခရိုင်ရဲ့ ခရိုင်မှူး တာ့ညီလင်းဟာ အသက်မပြည့်သေးတဲ့ ကလေးငယ်အပါအဝင် စုစုပေါင်း အမျိုးသမီးငယ် ၄ ဦးကို အဓမ္မပြုကျင့်တာကြောင့် ငွေဒဏ် နဲ့ ထောင်ဒဏ် ၁၀ နှစ် ချမှတ်လိုက်တယ်လို့ သိရပါတယ်။
မနေ့က ဩဂုတ် ၁၆ ရက်နေ့မှာ လူထုရှေ့တရားစီရင်ချက် ချမှတ်ခဲ့ခြင်း ဖြစ်ကြောင်း၊ ကျူးလွန်ခံရသူ အမျိုးသမီးငယ် ၄ ဦးထဲ အသက်မပြည့်သေးတဲ့ ကလေးငယ်တစ်ဦး ပါဝင်ကာ ၂ ဦးမှာ အဓမ္မပြုကျင့်ခြင်းခံရပြီး ကျန် ၂ ဦးကတော့ လိင်ပိုင်းဆိုင်ရာ ထိပါးစော်ကားမှု ဖြစ်တယ်လို့ “ဝ” လူငယ့်အသံက ဖော်ပြပါတယ်။
“ဝ”ပြည်နယ် အခြေခံဥပဒေ အခန်း (၄) ပုဒ်မ (၁၄၅) ပါ ပြဌာန်းချက်အရ တရားရုံးက စီရင်ချက်ချခဲ့ပြီး ၎င်းရဲ့လုပ်ရပ်ဟာ ရာဇဝတ်မှုဆိုင်ရာ ဥပဒေ ပြစ်မှုကျူးလွန်ကြောင်း ထင်ရှားပေါ်လွင်နေတာကြောင့် “ဝ”ပြည်နယ် အခြေခံဥပဒေ ရာဇဝတ်မှုဆိုင်ရာ ဥပဒေ အခန်း (၄) ပုဒ်မ (၁၉၅) အရ အဓမ္မပြု ကျင့်သူအား ထောင်ဒဏ် (၃) နှစ်အထက် (၁၀) အောက် ပြစ်ဒဏ်ချမှတ်နိုင်တယ်လို့ ဆိုပါတယ်။
ဗဟိုရဲ့စီရင်ဆုံးဖြတ်ချက်အရ တာ့ညီလင်းကို ခရိုင်မှူး ရာထူးဖြုတ်ချထား၍ ထောင်ဒဏ် ၁၀ နှစ်ချမှတ်လိုက်ကြောင်း၊ အဓမ္မပြုကျင့်ခံရတဲ့ အမျိုးသမီး ၂ ဦးကို ယွမ် ၁ သိန်းစီ နဲ့ ကျန် ၂ ဦးကိုတော့ ယွမ် ၅ သောင်းစီ လျော်ကြေးပေးဆောင်စေခိုင်းခဲ့တယ်လို့ ဆိုပါတယ်။
ဒါ့အပြင် ခရိုင်မှူးလက်အောက်မှာ တာဝန်ထမ်းဆောင်ကြတဲ့ ကြံရာပါ ၃ ဦးဖြစ်တဲ့ ခရိုင်ရုံးအုပ်၊ ဒုတိယရုံးအုပ်၊ ယဥ်ကျေးမှုအသင်း ခေါင်းဆောင်တို့ကိုလည်း လက်ရှိ ရာထူးကနေ ၃ လ ဆိုင်းငံ့ထားတယ်လို့ သိရပါတယ်။
