စစ်ကိုင်းတိုင်းဒေသကြီး အထက်ပိုင်း၊ ဗန်းမောက်မြို့ပေါ်သို့ ရောက်ရှိလာတဲ့ ကျေးရွာ ၃ ရွာမှ တိုက်ပွဲရှောင် ကျောင်းသား/ကျောင်းသူတွေကို ရှမ်းနီအမျိုးသားများ တပ်မတော် (SNA) က ကျောင်းသုံး ဗလာစာအုပ်နဲ့ စာရေးကိရိယာတွေကို ဒီနေ့ ဩဂုတ် ၂၀ ရက်နေ့မှာ သွားရောက်ထောက်ပံ့ပေးခဲ့တယ်လို့ ဒေသခံတွေထံက သိရပါတယ်။
ဗန်းမောက်တောင်ပိုင်းရှိ လယ်နက်ကြီးကျေးရွာ၊ ပေကုန်းကျေးရွာ နဲ့ နားယောကျေးရွာမှ ကျောင်းသား/ကျောင်းသူ ၂၀၆ ဦးတို့ကို မြို့ပေါ်လုံခြုံရေးတာဝန်ဆောင်လျက်ရှိတဲ့ SNA တပ်မဟာ ၆၁၄ စဝ့်ဆမ်တာ စစ်ကြောင်းရဲ့ စစ်ကြောင်းမှူး နဲ့ စစ်သည်တွေက ဗလာစာအုပ်နဲ့ စာရေးကိရိယာတွေ ထောက်ပံ့မှုအပြင် အာဟာရကျန်းမာရေးအတွက် ဒါနကိုလည်း ကျွေးမွေးလှူဒါန်းခဲ့တယ်လို့ ဆိုပါတယ်။
အဆိုပါ ဗန်းမောက်တောင်ပိုင်းရှိ ကျေးရွာ ၃ ရွာဟာ ကချင်လွတ်လပ်ရေးတပ်မတော် (KIA)၊ PDF တို့ ထိန်းချုပ်ထားတဲ့ ကျေးရွာတွေဖြစ်ပြီး ၎င်းတို့ရဲ့ ကလေးငယ်တွေ ပညာရေးမဆုံးရှုံးစေဖို့ ဗန်းမောက်မြို့ပေါ်ကို အခက်အခဲတွေကြားက လာရောက်၍ ပညာသင်ကြားရခြင်းဖြစ်တယ်လို့ သိရပါတယ်။
ဓာတ်ပုံ – ကျောင်းသား/ကျောင်းသူတွေကို စာအုပ်နဲ့ စာရေးကိရိယာထောက်ပံ့နေတဲ့ မြင်ကွင်း (ပေးပို့)
