ရှမ်းနီတို့ရဲ့ လက်နက်ကိုင်တပ်ဖွဲ့ ဖြစ်တဲ့ ရှမ်းနီအမျိုးသားများ တပ်မတော် (SNA) နဲ့ ကချင်လက်နက်ကိုင်အဖွဲ့ (KIA) တို့အကြား နယ်မြေအငြင်းပွားမှုတွေကြောင့် စစ်ကိုင်း နဲ့ ကချင်မှာ တိုက်ပွဲတွေ ဖြစ်ပွားလျက်ရှိနေပါတယ်။
SNA ကိုတော့ ကချင် နဲ့ စစ်ကိုင်းတိုင်းအတွင်းရှိ တိုင်းဆာ၊ တိုင်းလုံ၊ တိုင်းနေ၊ တိုင်းမောဝ်၊ တိုင်းကဒူး၊ တိုင်းကနန်း၊ တိုင်းခွမ်၊ တိုင်းခမ်းတီး၊ တိုင်းနိုင်း- တိုင်းလိုင်- တိုင်းလျဲန် ခေါ် ရှမ်းနီ စတဲ့ ရှမ်းမျိုးနွယ်စုတွေကို ကိုယ်စားပြုပြီး ဖွဲ့စည်းထားတာ ဖြစ်တယ်လို့ သိရပါတယ်။
စစ်ကိုင်း နဲ့ ကချင်ပြည်နယ်တို့မှာ ကျယ်ပြန့်စွာ နေထိုင်ကြတဲ့ ရှမ်းနီလူမျိုးတွေဟာ ရှမ်းနီပြည်နယ်ရရှိဖို့ ခေတ်အဆက်ဆက်တောင်းဆိုလျက်ရှိနေပါတယ်။
အဲဒီအခြေအနေတွေ နဲ့ ပတ်သက်ပြီး KIA ဖွဲ့စည်းခြင်း (၆၅)နှစ်မြောက် အခမ်းအနားမှာ ကချင်လွတ်မြောက်ရေးကောင်စီ (KIC) ဒုဥက္ကဋ္ဌ(၁) ဒုဗိုလ်ချုပ်ကြီးဂွမ်မော်က ရှမ်းနီအရေးအချို့ကို ပြောဆိုခဲ့ပါတယ်။
