၁၉၄၇ ခုနှစ်မှ ယနေ့အချိန်ထိ ရှမ်းနီတိုင်းရင်းသားအရေး ညီလာခံသို့ တင်သွင်းခဲ့တဲ့ စာတမ်းတွေကို စာအုပ်အဖြစ် စုစည်း၍ ထုတ်ဝေမှာဖြစ်တယ်လို့ တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) မှ ဥက္ကဋ္ဌ စိုင်းဋ္ဌေးအောင်က ၎င်းရဲ့ လူမှုကွန်ယက်စာမျက်နှာမှာ ရေးသားထားပါတယ်။
စာအုပ်ထုတ်ဝေခွင့် အမှတ် ၀၂၈၅၀ ဖြင့် တရားဝင်ဖြန့်ချီမှာဖြစ်ပြီး ပထမအကြိမ် အုပ်ရေ ၁၀၀၀ ထုတ်မှာဖြစ်ကြောင်း၊ စာအုပ်မှာ တန်းဘိုးရေးသားထားသော်လည်း အခမဲ့ ဖြန်ချီမှာ ဖြစ်တယ်လို့ ဆိုပါတယ်။
စိုင်းဋ္ဌေးအောင်က “မကြာမီဖြန့်ချီပါတော့မည်။ ၁၉၄၇ ပင်လုံမှသည် ယနေ့ချိန်ထိ ခေတ်အဆက်ဆက် ရှမ်းနီတိုင်းရင်းသားအရေး ညီလာခံသို့တင်သွင်းခဲ့သည့်စာတမ်းများကို စာအုပ်အဖြစ် စုစည်းတင်ပြထားပါသည်။ ထုတ်ဝေခွင့်အမှတ် ၀၂၈၅၀ ဖြင့် တရားဝင် ဖြန့်ချီပါမည်။ နိုင်ငံရေးပါတီများ၊ နိုင်ငံတကာ သံရုံးများသို့လည်း ပေးပို့ပါမည်။ စာအုပ်ဖြစ်မြောက်ရေးအတွက် ငွေကြေးအားဖြင့်ပံ့ပိုးကူညီပေးကြသူများအားလည်း ဝမ်းမြောက်ဝမ်းသာ လှိုက်လှိုက်လှဲလှဲ ကျေးဇူးအထူးတင်ရှိပါတယ်။ ပထမအကြိမ် အုပ်ရေ ၁၀၀၀အုပ် ထုတ်ပါမည်။ မှတ်ချက်။ အလှူရှင်များ၏ ပံ့ပိုးငွေဖြင့် ထုတ်ဝေထားပါသဖြင့် စာအုပ်တွင် တန်ဘိုးရေးသားထားသော်လည်း အခမဲ့ဖြန်ချီပါမည်” လို့ ရေးသားထားပါတယ်။
အဆိုပါ စာအုပ်မှာတော့ လွတ်လပ်ရေး တောင်းဆိုတဲ့ကာလမှာ ဗန်းမော်၊ မြစ်ကြီးနား နယ်မြေတွေကို ကချင်ပြည်နယ်အတွင်း ထည့်သွင်းတဲ့ ကိစ္စတွေ၊ ၁၉၇၄ ခုနှစ် ပြည်ထောင်စုဆိုရှယ်လစ်သမ္မတ မြန်မာနိုင်ငံတော် ဖွဲ့စည်းပုံအခြေခံဥပဒေရေးဆွဲစဉ် တင်ပြချက်စာတမ်းတွေ၊ ၂၀၀၈ ဖွဲ့စည်းပုံအခြေခံဥပဒေ ရေးဆွဲစဉ် တင်ပြချက်စာတမ်းတွေ နဲ့ ပြည်ထောင်စု ငြိမ်းချမ်းရေး ညီလာခံ (၂၁ ရာစုပင်လုံ) မှာ တင်ပြတဲ့ စာတမ်းတွေ စုစည်းပါရှိမှာ ဖြစ်တယ်လို့ ဆိုပါတယ်။
တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) ကို ၂၀၁၃ ခုနှစ်၊ မေလ ၁၀ ရက်နေ့မှာ ဖွဲ့စည်းတည်ထောင်ခွင့်ရရှိခဲ့ပြီး ကချင်ပြည်နယ်၊ စစ်ကိုင်းတိုင်း နဲ့ မန္တလေးတိုင်းတို့မှာ ရွေးကောက်ပွဲကို ဝင်ရောက်ယှဉ်ပြိုင်ခဲ့ပါတယ်။
၂၀၁၅ ခုနှစ် ရွေးကောက်ပွဲမှာတော့ စစ်ကိုင်းတိုင်းဒေသကြီးမှာ ရှမ်းတိုင်းရင်းသားရေးရာဝန်ကြီး ၁ ဦးနဲ့ တိုင်းဒေသကြီးလွတ်တော်အမတ် ၁ ဦး ယှဉ်ပြိုင်အနိုင်ရရှိခဲ့ပါတယ်။
