နာဂကိုယ်ပိုင်အုပ်ချုပ်ခွင့်ရဒေသအတွင်း စစ်ကော်မရှင်က ကျင်းပမယ့် ရွေးကောက်ပွဲမှာ ပါဝင်ရွေးချယ်ခံမယ်သူတွေ နဲ့ ရွေးကောက်ပွဲ ဖြစ်မြောက်စေဖို့ ကူညီဆောင်ရွက်သူတွေရဲ့ လုံခြုံရေးကို လုံးဝအာမခံချက်ပေးမှာ မဟုတ်ကြောင်း နာဂဒေသ (ပ.က.ဖ) အထူးတိုက်ခိုက်ရေးတပ်ဖွဲ့က အသိပေး ထုတ်ပြန်ပါတယ်။
မြန်မာနိုင်ငံမှာ စစ်ကော်မရှင်က ကျင်းပဖို့ ကြံစည်နေတဲ့ အတုအယောင်ရွေးကောက်ပွဲကို ပါဝင်ယှဉ်ပြိုင်မယ့် မည်သည့်ပါတီမဆို လူပုဂ္ဂိုလ်မဆို နာဂဒေသအတွင်း ပဋိပက္ခတွေကိုသာ တိုးပွားလာစေမှာဖြစ်ကြောင်း ဒီနေ့ ဩဂုတ် ၂၇ ရက် ထုတ်ပြန်ချက်မှာ ဖော်ပြထားပါတယ်။
ဒါ့အပြင် မတည်ငြိမ်မှုတွေ ပိုမိုပေါ်ပေါက်လာစေမှာ ဖြစ်တာကြောင့် အမျိုးသားညီညွတ်ရေးအစိုးရ (NUG) ရဲ့ ကာကွယ်ရေးဝန်ကြီးဌာနအောက်မှာ တာဝန်ထမ်းဆောင်နေတဲ့ နာဂဒေသ (ပ.က.ဖ) အထူးတိုက်ခိုက်ရေးတပ်ဖွဲ့အနေနဲ့ ရွေးကောက်ပွဲကို လုံးဝလက်ခံမှာ မဟုတ်ကြောင်း ဆိုပါတယ်။
ရွေးကောက်ပွဲအတွင်း ဖြစ်ပေါ်လာနိုင်တဲ့ အသက်အန္တရာယ်တွေ၊ အိုးအိမ်ပစ္စည်းဆုံးရှုံးမှုတွေကို ရွေးကောက်ပွဲမှာ တိုက်ရိုက် ပါဝင်ယှဉ်ပြိုင်ကြသူတွေ သို့မဟုတ် အဆိုပါ လှုပ်ရှားမှုတွေနဲ့ ပူးပေါင်းဆောင်ရွက်သူတွေကသာ တာဝန်ခံရမှာဖြစ်ပြီး နောက်ဆက်တွဲ ပြဿနာတွေကိုလည်း လုံးဝ တာဝန်ယူမှာ မဟုတ်ကြောင်း ထုတ်ပြန်ချက်မှာ ဖော်ပြထားပါတယ်။
ဒါကြောင့် အဆိုပါ ရွေးကောက်ပွဲမှာ ပါဝင်ရွေးချယ်ခံမယ်သူတွေ နဲ့ ရွေးကောက်ပွဲ ဖြစ်မြောက်စေဖို့ ကူညီဆောင်ရွက်သူတွေရဲ့ လုံခြုံရေးကို လုံးဝအာမခံချက်ပေးမှာ မဟုတ်ကြောင်း နာဂဒေသ (ပ.က.ဖ) အထူးတိုက်ခိုက်ရေးတပ်ဖွဲ့က အသိပေးထားပါတယ်။
လက်ရှိမှာ နာဂလူမျိုးတွေရဲ့ ကိုယ်စားပြုနိုင်ငံရေးပါတီအဖြစ် နာဂအမျိုးသားပါတီ (NNP) က စစ်ကော်မရှင်ထံ ပြန်လည်၍ မှတ်ပုံတင်ထားပြီး ပြည်ထောင်စုရွေးကောက်ပွဲ ကော်မရှင် (UEC) ကလည်း မှတ်ပုံတင်အမှတ် ၂၀ ဖြင့် မှတ်ပုံတင်ခွင့်ပြုထားပါတယ်။
