စစ်ကော်မရှင်က ဦးဆောင်ကျင်းပမယ့် ရွေးကောက်ပွဲကို ကရင်အမျိုသားအစည်းအရုံး (KNU) က လုံးဝ လက်မခံကြောင်း ဒီနေ့ ၂၆ ရက်မှာ ထုတ်ပြန်ကြေညာပါတယ်။
အဆိုပါ ရွေးကောက်ပွဲဟာ ဥပဒေကြောင်းအရ တရားမဝင်ခြင်း၊ ပြည်သူအားလုံး ပါဝင်နိုင်တဲ့ အခြေအနေမှာ မရှိခြင်း နဲ့ လိုသလိုအဖြေထုတ်နိုင်တဲ့ ရွေးကောက်ပွဲ လုပ်ငန်းစဉ်တို့ကြောင့် KNU က လက်ခံကြောင်း ဆိုပါတယ်။
ရွေးကောက်ပွဲဟာ စစ်အာဏာရှင်စနစ် သက်ဆိုးရှည်စေရေးအတွက်သာဖြစ်ပြီး လက်ရှိ နိုင်ငံရေး အကျပ်အတည်း၏ အဖြေမဟုတ်ကြောင်း၊ ရွေးကောက်ပွဲကြောင့် နိုင်ငံတွင်း ပဋိပက္ခကို ပိုမိုပြင်းထန်လာစေရုံသာမက ဒေသတွင်း မတည်ငြိမ်မှုကိုပါ ဆက်လက်ဖြစ်ပေါ်လာစေမှာ ဖြစ်တယ်လို့ ဆိုပါတယ်။
ဒါ့အပြင် ရွေးကောက်ပွဲကို ဆန့်ကျင်တဲ့ လူထုလှုပ်ရှားမှုကို ကိုင်တွယ်ဖို့အတွက် အသစ်ထုတ်ပြန်လိုက်တဲ့ “ရွေးကောက်ပွဲတွေကို နှောင့်ယှက်ဟန့်တားဖျက်ဆီးခြင်း မှ ကာကွယ်ပေးရေး ဥပဒေ” နဲ့ “နိုင်ငံသားတွေရဲ့ ပုဂ္ဂိုလ်ဆိုင်ရာ လွတ်လပ်ခွင့် နဲ့ ပုဂ္ဂိုလ်ဆိုင်ရာ လုံခြုံမှုကို ကာကွယ်ပေးရေး ဥပဒေ” ကို ပြင်ဆင်လိုက်မှုကြောင့် ပြည်သူတွေဟာ အကြောက်တရားအောက်က မိမိဆန္ဒမပါဘဲ ပါဝင်ပေးရမယ့် အခြေအနေသို့ ရောက်ရှိနေတယ်လို့ ဆိုပါတယ်။
ရွေးကောက်ပွဲ ကျင်းပဖို့ ကြိုးစားတာဟာ အာဆီယံ ဘုံသဘောတူညီချက် ၅ ရပ်ကို အကောင်အထည်ဖော်ဖို့ မျက်ကွယ်ပြုခြင်းဖြစ်ပြီး “စစ်တပ်ကို အကျိုးပြုမယ့် လူနဲ့ပါတီ ရွေးချယ်ပွဲ” ဖြစ်တဲ့ အတုအယောင် ရွေးကောက်ပွဲသာ ဖြစ်ပြီး နိုင်ငံရေးပါတီတွေက အဆိုပါ အတုအယောင် ရွေးကောက်ပွဲမှာ ပါဝင်ခြင်းဟာ အနာဂတ် ဖက်ဒရယ်ဒီမိုကရေစီ စနစ်သစ် တည်ဆောက်မှုအတွက် အဟန့်အတားဖြစ်စေတယ်လို့ ဆိုပါတယ်။
ရေရှည်တည်တံ့ခိုင်မြဲသည့် နိုင်ငံရေးအဖြေကို ဦးတည်တဲ့ အားလုံးပါဝင်တဲ့ နိုင်ငံရေး တွေ့ဆုံမှုက ရရှိတဲ့ သဘောတူညီမှုဖြင့် ရေးဆွဲပြဌာန်းအတည်ပြုမယ့် စစ်မှန်တဲ့ ဖက်ဒရယ်ဒီမိုကရေစီ ပြည်ထောင်စု ဖွဲ့စည်းပုံ အခြေခံဥပဒေအသစ်ဖြင့် ကျင်းပတဲ့ ရွေးကောက်ပွဲသည်သာလျှင် နက်ရှိုင်းစွာ အမြစ်တွယ်နေတဲ့ မြန်မာ့နိုင်ငံရေးရဲ့ နိုင်ငံရေးပဋိပက္ခတွေ အဆုံးသတ်နိုင်မယ်လို့ KNU က အပြည့်အဝ ယုံကြည်တယ်လို့ ဖော်ပြထားပါတယ်။
ပြည်သူလူထုနဲ့ နိုင်ငံရေးပါတီတွေက စစ်အာဏာရှင်စနစ် သက်ဆိုးရှည်စေရေး၊ စစ်တပ်အာဏာသိမ်းယူမှု တရားဝင်မှု ရရှိစေရေး နဲ့ ၂၀၀၈ ဖွဲ့စည်းပုံအခြေခံဥပဒေကို ပြည်လည်အသက်သွင်းတဲ့ အတုအယောင် ရွေးကောက်ပွဲမှာ ပါဝင်ခြင်းဖြင့် အဆိပ်ပင်ရေလောင်းတဲ့ သမိုင်းတရားခံ ဖြစ်သွားနိုင်တဲ့အတွက် နည်းလမ်းပေါင်းစုံနဲ့ ရှောင်ရှားနိုင်ကြရေး ကြိုးပမ်းကြဖို့ လိုအပ်တယ်လို့ ပြောပါတယ်။
ဒါကြောင့် စစ်ကော်မရှင်က ပြုလုပ်မယ့် ရွေးကောက်ပွဲကို ကရင်ပြည်သူလူထုတွေ၊ ကရင်လက်နက်ကိုင် အဖွဲ့အစည်းတွေ၊ ကရင်နိုင်ငံရေး အင်အားစုတွေ အပါအဝင် နိုင်ငံရေးပါတီတွေနဲ့ ပြည်သူလူထုတရပ်လုံးက ပါဝင်ခြင်း မပြုကြဘဲ အကြမ်းမဖက်တဲ့ နည်းလမ်းတွေဖြင့် ဆန့်ကျင်သွားဖို့ တိုက်တွန်းတယ်လို့ KNU က ပြောပါတယ်။
၂၀၀၈ ဖွဲ့စည်းပုံအခြေခံဥပဒေ ပုဒ် ၃၉၉ (က)၊ ပြည်ထောင်စုရွေးကောက်ပွဲကော်မရှင် ဥပဒေပုဒ်မ ၃၄ (ဂ) နှင့် နည်းဥပဒေ ၁၆ (က) တို့အရ လွှတ်တော်အသီးသီးအတွက် ပါတီစုံအထွေထွေရွေးကောက်ပွဲ အပိုင်း (၁) ကို ၂၀၂၅ ခုနှစ်၊ ဒီဇင်ဘာ ၂၈ ရက်တွင် ကျင်းပသွားမည်ဖြစ်ကြောင်း UEC က ထုတ်ပြန်ထားပါတယ်။
