စစ်ကိုင်းတိုင်းဒေသကြီး အထက်ပိုင်း မိုဝိုင်းလွတ်မြို့အတွင်း နာဂအမျိုးသားဆိုရှယ်လစ်ကောင်စီ (NSCN-K) က တအိမ်ကို ပိုက်ဆန် ၆ သောင်းကျပ် နဲ့ ဆန် ၁ တင်းကောက်ခံ သွားတယ်လို့ ဒေသခံတစ်ဦးက ပြောပါတယ်။
အခုလ ဩဂုတ် ၁၃ ရက် ဝန်းကျင်က ကောက်ခံသွားခြင်းဖြစ်ပြီး အရင်က မိုဝိုင်းလွတ်မြို့တွင်းကို ကောက်ခံခြင်း မရှိကြောင်း၊ အခုကောက်ခံမှုက ပထမဆုံးအကြိမ်ဖြစ်တယ်လို့ ပြောပါတယ်။
ဒေသခံတစ်ဦးက “မိုဝိုင်းလွတ်မြို့ပေါ့နော်၊ မြို့တွင်းထဲကို NSCN-K ကနေပြီးမှ တစ်အိမ်ကို ပိုက်ဆန် ၆ သောင်းနဲ့ ဆန် ၁ တင်း ကောက်ခံတယ်။ ဒီလ ၁၃ ရက်နေလောက်က ဖြစ်တယ်။ ပြီးလို့ရှိရင် မြစ်ကမ်းနဖူးမှာရှိတဲ့ နာဂရွာတွေကိုလည်း သူတို့က အဲဒီလိုပဲ ကောက်တယ်။ နှစ်တိုင်းနှစ်တိုင်းပဲ သူတို့က ကောက်တယ်၊ ဒါပေမဲ့ ဒီနှစ်က သူတို့ မိုဝိုင်းလွတ်မြို့ကို ဝင်လို့ကို ကောက်လာတာ သူတို့က အဲဒီလိုမျိုးတွေ ရှိလာတာ” လို့ ပြောပါတယ်။
နာဂတပ်ဖွဲ့မှာတော့ ဗိုလ်ချုပ် အန်းမိုင် ဦးဆောင်တဲ့ NSCN-K/AM နဲ့ ဗိုလ်ချုပ် ယုံးအောင် ဦးဆောင်တဲ့ NSCN-K/YA စသဖြင့် လှုပ်ရှားနေတာကြောင့် ဘယ်အဖွဲ့က မိုဝိုင်းလွတ်မြို့အတွင်း ကောက်ခံသလဲဆိုတာကိုတော့ အတိအကျ မသိရှိရသေးဘဲ ဆက်သွယ်မေးမြန်းနေဆဲ ဖြစ်ပါတယ်။
အလားတူ ချင်းတွင်းမြစ် အနောက်ခြမ်းမှာရှိတဲ့ နာဂကျေးရွာ နဲ့ ချင်းလူမျိုးစုတွေရဲ့ ကျေးရွာတွေဟာ နာဂလက်နက်ကိုင်အဖွဲ့တွေကို ဆက်ကြေးပေးဆောင်ရကြောင်း ဒေသခံတစ်ဦးက ပြောပါတယ်။
“ချင်းတွင်းမြစ်ရဲ့ အနောက်ဖက်ကမ်းတကျောမှာရှိတဲ့ နာဂရွာရယ်၊ ချင်းရွာရယ် အားလုံးက နာဂတပ်ဖွဲ့ကို ဆက်ကြေးပေးရတာပဲ။ ထိုနည်းတူစွာပဲ အဲဒီအနောက်ဖက်ကမ်းမှာ လုပ်တဲ့ ရွှေမျောတွေ အာလုံးကလည်း သူတို့ကို (နာဂတပ်ဖွဲ့) အခွန်ဆောင်ရတာပဲ” လို့ ၎င်းက ပြောပါတယ်။
နာဂဒေသအတွင်း လှုပ်ရှားနေတဲ့ နာဂတပ်ဖွဲ့တွေဟာ ၂၀၂၄ နှစ်လယ်ပိုင်းမှ စတင်၍ လမ်းမကြီးတွေမှာ ဂိတ်ထောင်ကာ ပိုက်ဆန်ကောက်ခံခြင်း၊ အိမ်ထောင်စုတွေကို တနှစ်မှာ တစ်ကြိမ်၊ နှစ်ကြိမ်ခန့် ပိုက်ဆန် ကောက်ခံံတာတွေ ရှိနေတယ်လို့ ဒေသခံတွေက ပြောပါတယ်။
