ချင်းပြည်နယ် ပလက်ဝမြို့နယ်အတွင်းရှိ အာရက္ခတပ်တော် (AA) တပ်ဖွဲ့ဝင်တွေ ထွက်ခွာဖို့ Khumi Association Japan (KAJ) က ဒီနေ့ ဩဂုတ် ၂၂ ရက် မှာ ထုတ်ပြန်တောင်းဆိုခဲ့ပါတယ်။
Khumi Association Japan က “ULA/AA အနေဖြင့် ပလက်ဝမြို့နယ်အရေးနဲ့ ပတ်သက်၍ ချင်းပြည်နယ်နဲ့ သက်ဆိုင်တဲ့ အဖွဲ့အစည်းတွေဖြင့် အမြန်ဆုံး တွေ့ဆုံဆွေးနွေးမှုတွေ ပြုလုပ်ပေးဖို့၊ ချင်းပြည်နယ် ပလက်ဝမြို့နယ်မှ ULA/AA အမြန်ဆုံး ချက်ချင်းထွက်ခွာပေးဖို့ မိမိတို့အဖွဲ့မှ တောင်းဆိုတယ်” လို့ ဆိုပါတယ်။
ပြည်တွင်းပြည်ပရှိ ပလက်ဝဒေသခံ ချင်းပြည်သူလူထုတွေဟာ ချင်းပြည်နယ် ပလက်ဝမြို့နယ်အတွင်းက ULA/AA ရဲ့ နိုင်ငံရေးရပ်တည်ချက်တွေနဲ့ အုပ်ချုပ်ရေးစနစ်တွေ အကောင်အထည်ဖော် ဆောင်ရွက်နေမှုကို လက်ခံမှာ မဟုတ်ဘူးလို့ ထုတ်ပြန်ချက်မှာ ဖော်ပြထားပါတယ်။
ချင်းပြည်သူလူထုရဲ့ တောင်းဆိုမှုတွေကို ULA/AA အနေနဲ့ လိုက်နာဆောင်ရွက်ခြင်း မရှိပါက ပြည်တွင်း၊ ပြည်ပရှိ ချင်းပြည်သူလူထုရဲ့ ငြိမ်းချမ်းစွာ ဆန့်ကျင်ခြင်း (Resistance of the People) ကို ခံရမယ်လို့ ဆိုပါတယ်။
၂၀၂၅ ခုနှစ်၊ ဇူလိုင် ၁၁ ရက်နေ့က ရခိုင်ပြည် အခြေစိုက် သတင်းမီဒီယာတစ်ခုဖြစ်တဲ့ Narinjara မှ ပလက်ဝမြို့နယ်ကို ရခိုင်ပြည်နယ်ရဲ့ ခရိုင်တစ်ခုအဖြစ် ထည့်သွင်းကြောင်း ဖော်ပြခဲ့သလို ဩဂုတ် ၁၁ ရက်နေ့မှာ AA ရဲ့ ပြောခွင့်ရ ဦးခိုင်သုခမှ ပလက်ဝမြို့နယ်ကို ရခိုင်ပြည်နယ်ရဲ့ တရားဝင်ခရိုင်တစ်ခုအဖြစ် ထည့်သွင်းကြောင်း ထပ်မံအတည်ပြုခဲ့တယ်လို့ ဆိုပါတယ်။
ထိုကဲ့သို့ ပလက်ဝမြို့နယ်ကို ရခိုင်ပြည်နယ်ရဲ့ ခရိုင်အဖြစ် ကြေညာခြင်းဟာ အာဏာရှင်စနစ်ကဲ့သို့ စစ်ရေးသိမ်းပိုက်ဖိနှိပ်မှုတစ်ခုဖြစ်ပြီး၊ ချင်းပြည်သူတွေအပေါ် လက်နက်အားကို ကိုလိုနီပြုခြင်း ဖြစ်တယ်လို့လည်း ဆိုပါတယ်။
စစ်ကောင်စီအား တော်လှန်နေခြင်းကို အကြောင်းပြု၍ ပလက်ဝမြို့နယ်ကို ရခိုင်ပြည်နယ်ရဲ့ ခရိုင်အဖြစ် ထည့်သွင်းခြင်းက မြန်မာ့နွေဦးတော်လှန်ရေးကို မတရားအလွှဲသုံးစားလုပ်၍ အချုပ်အခြာအာဏာကို ထိပါးစော်ကားခြင်း ဖြစ်တယ်လို့ Khumi Association Japan (KAJ) က ဆိုပါတယ်။
ဒါကြောင့် ဖက်ဒရယ်ဒီမိုကရေစီစနစ်နဲ့ ကိုက်ညီမှုမရှိတဲ့ ULA/AA ရဲ့ လုပ်ရပ်ဟာ ပြည်ထောင်စု မြန်မာနိုင်ငံတော်ရဲ့ အခြေခံဥပဒေမူတွေနဲ့ ဆန့်ကျင်ကာ ပင်လုံစာချုပ်အပါအဝင် မြန်မာနိုင်ငံရဲ့ နိုင်ငံရေးသမိုင်းနဲ့ တရားဥပဒေစိုးမိုးရေးစနစ်ကို ချိုးဖောက်ဖီဆန်ခြင်းဖြစ်တဲ့အပြင် ချင်းပြည်နယ်ရဲ့ ပြည်သူ့အခွင့်အာဏာကို မထီမဲ့မြင်ပြုနေခြင်းဖြစ်တယ်လို့ ဆိုပါတယ်။
ပလက်ဝဒေသဟာ အိန္ဒိယ-ဘင်္ဂလားဒေ့ရှ်- မြန်မာ (ပလက်ဝ) သုံးနိုင်ငံ နယ်စပ်မြို့ဖြစ်ပြီး စစ်ရေးအရ အလွန်အရေးပါတဲ့ မြို့ဖြစ်ကာ ၂၀၂၄ ခုနှစ်၊ ဇန်နဝါရီ ၁၃ ရက်မှာ အာရက္ခတပ်တော် (AA) က အပြီးသတ်သိမ်းပိုက်နိုင်ခဲ့တယ်လို့ ထုတ်ပြန်ထားပါတယ်။
