“ဝ” ပြည်သွေးစည်း ညီညွှတ်ရေး တပ်မတော် (UWSA) မှ တအာင်းတပ် – TNLA၊ ကိုးကန့်တပ် (MNDAA) နဲ့ ရှမ်းတပ် (SSPP) အစရှိတဲ့ တိုင်းရင်းသား လက်နက်ကိုင်တွေကို လက်နက်၊ ငွေကြေးတွေကို ကူညီပံ့ပိုးမှာ မဟုတ်ကြောင်း ထုတ်ပြန်ကြေညာခဲ့ပါတယ်။

MNDAA၊ TNLA၊ SSPP တို့ ပါဝင်တဲ့ ဆွေးနွေးပွဲကို ပန်ဆန်းမြို့မှာ ပြုလုပ်ခဲ့ပြီးနောက် အခုလို လက်နက် နဲ့ ကိရိယာကိုမျှ ပံ့ပိုးပေးတော့မှာ မဟုတ်ကြောင်း၊ စစ်ရေးအရ လွယ်ကူချောမွေ့စေရေး၊ ဘယ်အဖွဲ့အစည်းကို ဘယ်လိုအကြောင်းပြချက်နဲ့မှ လက်နက်၊ ငွေကြေးကို အကူအညီ ပေးမှာ မဟုတ်တော့ဘူးလို့ Wa News Land က ဖော်ပြပါတယ်။

အဆိုပါ ဆွေးနွေးပွဲကို တိုင်းရင်းသား လက်နက်ကိုင် (၃) ဖွဲ့လုံးက အကြီးတန်း ကိုယ်စားလှယ်တွေ တက်ရောက်ခဲ့ကြပြီး “ဝ” တပ် – UWSA ဘက်မှလည်း ၎င်းရဲ့ တရားဝင်စစ်ရေး ဆုံးဖြတ်ချက်တွေကို ကိုယ်စားလှယ်အဖွဲ့တွေ ကြေငြာခဲ့ကြောင်း ဆိုပါတယ်။

ဒုဥက္ကဌ Zhao Guoan က “ဝ” ပြည်နယ်ဘက်မှ ညီအကိုမောင်နှမများကိုယ်စား “ဝ” ပြည်နယ်ရဲ့ ငြိမ်းချမ်းရေး ရပ်တည်ချက် နဲ့ လက်ရှိရင်ဆိုင်နေရတဲ့ အလွန်ဆိုးရွားတဲ့ အခြေအနေတွေကို အသိပေးလိုပါတယ်။ “ဝ” ပြည်နယ်ဟာ ဘယ် လက်နက်နဲ့ ကိရိယာကိုမျှ ပံ့ပိုးပေးတော့မှာ မဟုတ်ကြောင်း၊ စစ်ရေးအရ လွယ်ကူချောမွေ့စေရေး၊ သို့မဟုတ် ဘယ်အဖွဲ့အစည်းကို ဘယ်အကြောင်းပြချက်၊ အချိန်မရွေး၊ ဘယ်နေရာမဖြစ်စေ ငွေကြေး အကူအညီ ပေးမည် မဟုတ်ပေ။ အဆိုပါ ဆုံးဖြတ်ချက်ကိုလည်း အများပြည်သူသို့ တရားဝင် ကြေညာမည်ဖြစ်ပြီး အဖွဲ့အစည်းတွေအနေဖြင့် လက်နက် နဲ့ စက်ကိရိယာတွေ၊ ငွေကြေးအကူအညီတွေ သို့မဟုတ် အခြားထိုကဲ့သို့သော ကိစ္စရပ်တွေကို တောင်းဆိုခြင်းဖြင့် “ဝ” ပြည်နယ်ကို ထပ်မံနှောက်ယှက်ခြင်းမှ ရှောင်ကြဉ်ဖို့ အဖွဲ့အစည်းတွေကို တိုက်တွန်းအပ်ပါတယ်” လို့ ဆိုပါတယ်။

ဤအလွန်အရေးကြီးသော အစည်းအဝေးသို့ တက်ရောက်ခဲ့ကြသည့် ညီအကို အဖွဲ့အစည်းများအားလုံးကို ကျေးဇူးတင်ပါသည်။ သိသာထင်ရှားသော “ဝ” ပြည်နယ်၏ ဆုံးဖြတ်ချက်ကို အသိပေးရန် ဆောင်ရွက်ပေးခြင်း ဖြစ်ပါသည်။

အဆိုပါ ဆုံးဖြတ်ချက်နဲ့ ပတ်သက်၍ MNDAA၊ TNLA နဲ့ SSPP တို့ကလည်း UWSA ရဲ့ တရားဝင် စစ်ရေးဆုံးဖြတ်ချက်နဲ့ စပ်လျဉ်ပြီး “ဝ” ပြည်နယ်ရဲ့ ဆုံးဖြတ်ချက်ကိုနားလည် သဘော ပေါက်ကြောင်း ဖော်ပြခဲ့ကြတယ်လို့ ဆိုပါတယ်။