သျှမ်းပြည်ဒေသတွင်းမှာ တအာင်းတပ် (TNLA) နဲ့ ကိုးကန့်တပ်ဖွဲ့ (MNDAA) တို့ကို အကြမ်းဖက်အဖွဲ့အစည်းအဖြစ် ဆန္ဒပြဖို့ ပြည်သူတွေကို အဓမ္မ ပါဝင်စေခိုင်းတဲ့ စစ်ကော်မရှင်ရဲ့ ဆိတ်ခေါင်းချိတ်၍ ခွေးသားရောင်းသည့် ဆန္ဒပြပွဲကို ကန့်ကွက်ဟု သျှမ်းလူငယ်ကွန်ကရက် ထုတ်ပြန်ပါတယ်။
သျှမ်းပြည်စစ်ကော်မရှင်မှ သျှမ်းပြည်ဒေသအတွင်းရှိ လူမျိုးစုတွေအကြား ပဋိပက္ခဖြစ်စေဖို့ရည်ရွယ်ချက်တွေနဲ့ ကျေးလက်ဒေသတွေမှ ပြည်သူတွေကို တစ်အိမ်ထောင် တစ်ဦးနှုန်း မလာမနေရစနစ်ဖြင့် ခေါ်ဆောင်ကာ TNLA၊ MNDAA အပါအဝင် တော်လှန်ရေးအင်အားစုတွေကို ဆန့်ကျင်တဲ့ ဆန္ဒပြပွဲတွေမှာ အတင်းအဓမ္မ ပါဝင်စေခိုင်းနေတယ်လို့ ဆိုပါတယ်။
ဒီနေ့ သြဂုတ်လ ၁၈ ရက်နေ့မှာ မိုးနဲ၊ မိုင်းပန်၊ ကွန်ဟိန်၊ ခိုလန်၊ သြဂုတ်လ ၁၉ ရက်နေ့မှာ ပင်လုံ၊ လဲချား၊ နမ့်စန်၊ မောက်မယ် သြဂုတ်လ ၂၀ ရက်နေ့မှာ မိုင်းရယ်၊ နမ့်လန် စသည့်မြို့တွေအပါအဝင် သျှမ်းပြည်တစ်ဝှမ်းလုံးရှိမြို့တွေမှာ ဆန္ဒပြပွဲတွေ ဆက်လက်လုပ်ဆောင်မှာဖြစ်တယ်လို့ မြေပြင်သတင်းတွေရ ကြားသိရကြောင်း ထုတ်ပြန်ချက်မှာ ဖော်ပြပါတယ်။
အဆိုပါ ဆန္ဒပြပွဲတွေ လာရောက်မယ့်သူတွေကိုလဲ သျှမ်းဝတ်စုံမဖြစ်မနေရဝတ်ဖို့ စစ်ကော်မရှင်အရာရှိတွေမှ ၎င်းတို့ရဲ့ လက်အောက်ခံ ထွေအုပ်ဝန်ထမ်းတွေကို ညွန်ကြားထားတယ်လို့ ဆိုပါတယ်။
စစ်အုပ်စုရဲ့ လုပ်ရပ်တွေဟာ အရင်စစ်အာဏာရှင်အဆက်ဆက် ကျင့်သုံးတဲ့ သွေးခွဲဖိနှိပ်အုပ်ချုပ်ရေးစနစ်တွေသာဖြစ်ပြီး ယခုဆန္ဒပြပွဲတွေဟာ သျှမ်းပြည်ဌာနေလူမျိုးစုအချင်းချင်းကြား ပဋိပက္ခဖြစ်ပွါးစေဖို့ ရည်ရွယ်လုပ်ဆောင်နေတာဟာ ထင်ရှားတယ်လို့ ဆိုပါတယ်။
ထို့အတူ ယခုအခါ စစ်ကော်မရှင်မှာ အားတက်သရော လိုလားစွာပါဝင်နေကြတဲ့ သျှမ်းလူမျိုးအချို့ဟာလည်း သျှမ်းပြည်သူတစ်ရပ်လုံးရဲ့ သဘောဆန္ဒတွေကို လုံးဝ(လုံးဝ) ကိုယ်စားမပြုကြောင်းကိုလည်း သိရှိနားလည်စေလိုပါတယ်လို့ ဆိုပါတယ်။
ဒါကြောင့် စစ်ကောင်စီရဲ့ ယခုဆိတ်ခေါင်းချိတ်၍ ခွေးသားရောင်းကဲ့သို့ ကျင်းပတဲ့ ဆန္ဒပြပွဲတွေမှာ ပါဝင်တဲ့ ပြည်သူလူထုတွေဟာလည်း နိုင်ငံရေးအသုံးချခံတွေသာဖြစ်ပြီး စစ်အုပ်စုရဲ့ အခုလုပ်ရပ်တွေကို ပြင်းပြင်းထန်ထန် ကန့်ကွက်ကြောင်း နဲ့ အခုဆန္ဒပြပွဲတွေဟာ သျှမ်းပြည်သူလူထုသဘောဆန္ဒတွေမပါဝင်ကြောင်း ထုတ်ပြန်ကြေညာတယ်လို့ သျှမ်းလူငယ်ကွန်ကရက်ရဲ့ ထုတ်ပြန်ချက်မှာ ဖော်ပြထားပါတယ်။
