သျှမ်းပြည်တောင်ပိုင်းမှာ ဒေသခံတွေကို ဆင့်ခေါ်ပြီး တအာင်းတပ် (TNLA) နဲ့ ကိုးကန့်တပ် (MNDAA) တို့ကို ဆန္ဒပြခိုင်းတဲ့ စစ်ကောင်မရှင်ရဲ့ လုပ်ဆောင်ချက်ဟာ တိုင်းရင်းသားအချင်းချင်း စည်းလုံးညီညွတ်မှုကို ပျက်ပြားစေဖို့ နဲ့ အချင်းချင်း အမုန်းပွားစေဖို့ ရည်ရွယ်လုပ်ဆောင်နေတယ်လို့ သျှမ်းပြည်ပြန်လည်ထူထောင်ရေးကောင်စီ (RCSS/SSA) က ပြောပါတယ်။
ဒီနေ့ ဩဂုတ် ၁၈ ရက်မှာ စစ်ကော်မရှင်က မိုးနဲ၊ မိုင်းပန်၊ ခိုလမ်၊ ကွန်ဟိန်း စတဲ့မြို့တွေမှာ တပြိုင်နက်တည်း ပြုလုပ်နေတာဖြစ်ပြီး မနက်ဖန် ဩဂုတ်လ ၁၉ ရက်မှာလည်း တခြားမြို့တွေမှာ ဆန္ဒပြပွဲတွေ ပြုလုပ်ဖို့ စီစဉ်ထားတယ်လို့ သိရပါတယ်။
အဆိုပါ ဆန္ဒပြပွဲကို စစ်ကော်မရှင်ရဲ့ အုပ်ချုပ်ရေးက တစ်အိမ်တစ်ယောက််လာမနေရ ဆင့်ခေါ်ပြီး TNLA နဲ့ MNDAA အဖွဲ့တွေကို ဆန္ဒပြခိုင်းကြောင်း ဒေသခံတွေက ပြောပါတယ်။
RCSS အနေနဲ့ သျှမ်းပြည်မြောက်ပိုင်းမှာ TNLA နဲ့ ရှမ်းပြည်တိုးတက်ရေးပါတီ (SSPP) တို့ရဲ့ ကြီးမားတဲ့ ထိုးစစ်ဆင် တိုက်ခိုက်မှုခံခဲ့ရပေမယ့် တိုင်းရင်းသားစည်းလုံးညီညွတ်မှုကို ရှေးရှုတဲ့အနေဖြင့် ဒေသခံ တိုင်းရင်းသားတွေကို ထုတ်ဖော်ဆန္ဒပြဖို့ တိုက်တွန်းမှု မလုပ်ဆောင်ခဲ့ဘူးလို့ ဆိုပါတယ်။
လက်ရှိ စစ်ကော်မရှင်က ဆင့်ခေါ်၍ TNLA နဲ့ MNDAA တို့ ဆန့်ကျင် ဆန္ဒပြမှုဟာ မိမိတို့ RCSS နဲ့ လုံးဝ ပတ်သက်မှု မရှိကြောင်း၊ ဒေသခံတိုင်းရင်းသားပြည်သူတွေအနေဖြင့်လည်း စစ်ကော်မရှင်ရဲ့ လှည့်ကွက်ထဲ မကျရောက်မိစေရန် သတိထား ရှောင်ရှားနိုင်ဖို့ RCSS က တိုက်တွန်းထားပါတယ်။
