ရှမ်းပြည်တိုးတက်ရေးပါတီ (SSPP/SSA) တည်ထောင်ခဲ့ခြင်း ၅၄ နှစ်ပြည့် အခမ်းအနားကို ဒီနေ့ သြဂုတ်လ ၁၆ ရက်နေ့မှာ SSPP ရဲ့ ဗဟို ဌာန ချုပ်ရှိ ပါတီကျောက်တိုင်မှာ ကျင်းပ ပြုလုပ်ခဲ့ပါတယ်။
အဆိုပါ အခမ်းအနားကို SSPP နာယက (၁) ဗိုလ်ချုပ်ကြီးစေထင် ဦးဆောင်တဲ့ ဗဟိုကော်မတီဝင်တွေ၊ ဗဟို ဌာနချုပ်မှ ဌာနဆိုင်ရာတွေ၊ ဗဟိုဌာနချုပ် အမျိုးသမီးရေးရာအဖွဲ့တွေ၊ အမျိုးသမီးတပ်ဖွဲ့တွေ (စစ်မေ)၊ ဌာနချုပ် စစ်သင်တန်းကျောင်းမှ တပ်ဖွဲ့ဝင်တွေ၊ နိုင်ငံရေးပါတီအဖွဲ့တွေ၊ စစ်ရေးပြ စစ် ကြောင်းတွေ၊ အနီးအနားရှိ ဒေသခံပြည်သူတွေ အပါအဝင် စုစုပေါင်း လူဉီးရေ ၁၀၀၀ ကျော် တက်ရောက်ခဲ့တယ်လို့ ဆိုပါတယ်။
ဗိုလ်ချုပ်ကြီးစေထင်မှ အခမ်းအနားအဖွင့် အမှာစကားပြောကြားခဲ့ပြီး SSPP ဖြစ်ပေါ်လာပုံ သမိုင်းကြောင်း၊ SSA တော်လှန်ရေးသမိုင်းကြောင်းတွေ၊ SSPP ရဲ့ နိုင်ငံရေး ရပ်တည်ချက်တွေကိုလည်း ရှင်းလင်းပြောကြားခဲ့တယ်လို့ ဆိုပါတယ်။
SSPP (၅၄) နှစ်ပြည့် အခမ်းအနားသို့ ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) မှ ပေးပို့လာတဲ့ ဂုဏ်ပြု သဝဏ်လွှာကို အခမ်းအနားတာဝန်ရှိသူ တစ်ဦးက ဖတ်ကြားခဲ့တယ်လို့ ဆိုပါတယ်။
ရှမ်းပြည်တပ်မတော် (SSA) ရဲ့ တော်လှန်ရေးလမ်းစဉ်ကို ဦးဆောင်ဖို့အတွက် ရှမ်းပြည်တပ်မတော် ခေါင်းဆောင်တွေက ၁၉၇၁ ခုနှစ်၊ သြဂုတ်လ ၁၆ ရက်နေ့မှာ ရှမ်းပြည်တိုးတက်ရေးပါတီ (Shan State Progress Party) ကို စတင်ဖွဲ့စည်း တည်ထောင်ခဲ့ကြတယ်လို့ ဆိုပါတယ်။
