သတင်းလုပ်ငန်းတွေ လုပ်ဆောင်ဖို့ အခက်အခဲနဲ့ ရင်ဆိုင်နေကြရတဲ့ သတင်းသမားတွေအတွက် မီဒီယာလုံခြုံရေးနဲ့ အကာအကွယ်ပေးရေး အစီအစဉ်တစ်ရပ်ကို လွတ်လပ်သော မြန်မာသတင်းမီဒီယာကောင်စီ (IPCM) က ဒီနေ့ ဩဂုတ် ၁၅ ရက်မှာ ထုတ်ပြန်ပါတယ်။

၂၀၂၁ ခုနှစ်၊ ဖေဖေါ်ဝါရီလ (၁) ရက် မြန်မာစစ်တပ်မှ အာဏာသိမ်းပြီးချိန်မှ စတင်ပြီး စစ်အုပ်ချုပ်ရေး အောက်မှာ ဖိနှိပ်မှုမျိုးစုံ နဲ့ မြန်မာပြည်သူတွေ ကြုံတွေ့နေရကြောင်း၊ စစ်တပ်က သတင်းမီဒီယာအပေါ် ဖိနှိပ်မှုမှာ အဆိုးဆုံးအခြေအနေ နဲ့ ရင်ဆိုင်နေရတယ်လို့ ဆိုပါတယ်။

စစ်အုပ်စုရဲ့ မတရားဖိနှိပ်မှုကြောင့် ပြည်တွင်းမှာ သတင်းလုပ်ငန်းတွေ လုပ်ဆောင်ဖို့ အခက်အခဲတွေ နဲ့ ရင်ဆိုင်ကြရပြီး သတင်းသမားအများအပြားမှာ ပြည်ပနိုင်ငံတွေ၊ နယ်စပ်ဒေသတွေကို ထွက်ပြေးတိမ်းရှောင်ခဲ့ကြရကာ အချို့မှာ ပြည်တွင်းမှာ အခက်အခဲမျိုးစုံ နဲ့ ရင်ဆိုင် နေကြရတယ်လို့ ဆိုပါတယ်။

နိုင်ငံပြင်ပသို့ ရောက်ရှိနေထိုင်နေကြရတဲ့ သတင်းသမားတွေမှာလည်း ဖမ်းဆီးခံရနိုင်ခြေရှိခြင်း၊ အလုပ်လုပ်ခွင့် လိုင်စင်မရှိခြင်း၊ ကျန်းမာရေးစောင့်ရှောက်မှု မရရှိခြင်းစတဲ့ အခက်အခဲတွေနဲ့ ပြည်တွင်းမှာ နေထိုင်ပြီး သတင်းလုပ်ငန်း လုပ်ဆောင်နေခြင်းကြောင့် ရှောင်တိမ်းပြီး ရွှေ့ပြောင်းနေထိုင်ကြရသူတွေလည်း အခက်အခဲများစွာ ကြုံတွေ့နေကြရတယ်လို့ ဆိုပါတယ်။

အဆိုပါ အခက်အခဲတွေကို ကျော်လွှာဖို့ နိုင်ငံပြင်ပမှာ ရေရှည်နေထိုင်ဖို့ ရည်ရွယ်တဲ့ သတင်းသမားတွေနဲ့ မီဒီယာလုပ်ငန်းလုပ်ကိုင်သူတွေအတွက် နေထိုင်ရေး နဲ့ တရားဝင် စာရွက်စာတမ်းရရှိဖို့မှာ အရေးကြီးတယ်လို့ ဆိုပါတယ်။

အဲဒီလို လုံခြုံစွာ နေထိုင်နိုင်ရေး၊ တရားဝင် စာရွက်စာတမ်း ရရှိရေးအတွက် အကူအညီလိုအပ်နေတဲ့ သတင်းသမားတွေအနေဖြင့် အသင့်တော်ဆုံး နည်းလမ်းကို ရွေးချယ်ပြီး IPCM မှ အရေးပေါ်အကူအညီတွေ ပေးအပ်မယ့် မီဒီယာလုံခြုံရေးနဲ့ အကာအကွယ်ပေးရေးအစီအစဉ်ကို လျှောက်ထားနိုင်တယ်လို့ ဆိုပါတယ်။

အရေးပေါ်အကူအညီပေးမယ် အစီအစဉ်တွေကတော့ သတင်းသမားတစ်ဦးချင်းအတွက် ပြည်တွင်း ပြည်ပ ရွှေ့ပြောင်းနေထိုင်မှု ကုန်ကျစရိတ် ကူညီထောက်ပံ့ခြင်း၊ နိုင်ငံပြင်ပတွင် တရားဝင်နေထိုင်ခွင့် အထောက်အထား ရရှိဖို့ ကူညီထောက်ပံ့ခြင်း၊ အရေးပေါ်အကူအညီအတွက် အခြေခံသတ်မှတ်ချက်တွေ၊ မြန်မာနိုင်ငံအတွင်း သတင်းမီဒီယာလုပ်ငန်း လုပ်ကိုင်မှုကြောင့် အန္တရာယ်ရှိပြီး နိုင်ငံပြင်ပမှာ နေထိုင်ကြတဲ့ သတင်းသမားတွေ သို့မဟုတ် မီဒီယာလုပ်ငန်းမှာ လုပ်ကိုင်နေသူတွေ၊ ပြည်တွင်း အရေးပေါ်ရွှေ့ပြောင်းနေထိုင်ရသူ သတင်းသမားတွေ သို့မဟုတ် မီဒီယာလုပ်ငန်းမှာ လုပ်ကိုင်နေသူတွေ လျှောက်ထားနိုင်တယ်လို့ ဆိုပါတယ်။

မီဒီယာလုံခြုံရေးနဲ့ အကာအကွယ်ပေးရေး အစီအစဉ် လျှောက်ထားရာမှာ နောက်ခံအချက်အလက်နဲ့ မိမိအကြောင်း (Background Information and Profile) တင်ပြနိုင်ရမှာဖြစ်ကြောင်း၊ လွတ်လပ်သော မြန်မာသတင်းမီဒီယာကောင်စီ – IPCM ဟာ ကူညီထောက်ပံ့ရေး အစီအစဉ်ကို တာဝန်ယူကူညီထောက်ပံ့ဖို့ စီစဉ်ဆောင်ရွက်လျက်ရှိတယ်လို့ ဆိုပါတယ်။

အရေးပေါ်ကူညီထောက်ပံ့ခြင်းလျှောက်လွှာတွေကို IPCM မှ တာဝန်ပေးထားတဲ့ အလုပ်အမှုဆောင် ကော်မတီအဖွဲ့ဝင်တွေ၊ လွတ်လပ်သော သတင်းမီဒီယာပညာရှင်တွေ ပါဝင်တဲ့ ကော်မတီမှ စိစစ်ဆုံးဖြတ်မှာဖြစ်ကြောင်း၊ အရေးပေါ် ကူညီထောက်ပံ့မှု လိုအပ်သူတွေအနေဖြင့် အဆိုပါ mmrsafetysupport.ipcm@protonmail.com အီးမေးလ်ကို စာရေး ဆက်သွယ်ပြီး မေးမြန်းစုံစမ်းနိုင်တယ်လို့ ဆိုပါတယ်။