တအာင်းတပ်မတော် (TNLA) ထိန်းချုပ်ထားတဲ့ မြို့နယ်တွေကို စစ်တပ်က လေကြောင်း ဗုံးကြဲတိုက်ခိုက်မှုကို တအာင်းအရပ်ဖက်အဖွဲ့အစည်းများ ကွန်ယက် (TCSN) က ကန့်ကွက်ရှုတ်ချတယ်လို့ ထုတ်ပြန်ပါတယ်။
TNLA ထိန်းချုပ်ထားတဲ့ မြို့နယ်တွေကို ပြန်လည်ရရှိရေး နဲ့ အထွေထွေ ရွေးကောက်ပွဲ ကျင်းပနိုင်ဖို့အတွက် လူနေထူထပ်တဲ့ မြို့ပေါ်နဲ့ ကျေးရွာဘက် ဦးတည်ပြီး လေကြောင်းကနေ ဗုံးကြဲတိုက်ခိုက်ခဲ့တဲ့လုပ်ရပ်ကို ကန့်ကွက်တယ်လို့ ဆိုပါတယ်။
ပြီးခဲ့တဲ့ ဇွန်လကနေ မနေ့အထိ ၂ လကျော်အတွင်း တအာင်းတပ် ထိန်းချုပ်ထားတဲ့ မိုးကုတ်၊ မိုင်းငေါ့၊ မိုင်းလုံ၊ နောင်ချို၊ ကျောက်မဲ၊ သီပေါနဲ့ ကွတ်ခိုင်မြို့မှာ စစ်တပ်ရဲ့ ဗုံးကြဲမှုကြောင့် ကလေး ၁၃ ဦးအပါအဝင် ၅၆ ဦး သေဆုံးခဲ့ပြီး ကလေး ၈ ဦးအပါအဝင် ၁၃၆ ဦး ဒဏ်ရာ ရခဲ့တယ်လို့ ဆိုပါတယ်။
ဒါ့အပြင် ဒေသခံတွေရဲ့ နေအိမ် ၂၁၈ လုံး၊ စာသင်ကျောင်း ၈ ကျောင်း၊ သာသနာ့အဆောက်အဦး ၈ ကျောင်း၊ ဆေးရုံ ၈ ခု၊ ဟိုတယ် ၃ ခုနဲ့ အခြားအဆောက်အဦး ၂၃ ခုလည်း ပျက်စီးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
တဖက်မှာလည်း စစ်တပ်ဟာ တရုတ်နဲ့ ပူးပေါင်းပြီး TNLA ထိန်းချုပ်ထားတဲ့ဒေသတွေကို ပြန်ပေးရေးအတွက် နိုင်ငံရေး၊ စစ်ရေး၊ လူသုံးကုန်ပစ္စည်းနဲ့ စားသောက်ကုန် ဖြတ်တောက်မှု၊ ဆေးဝါး ဖြတ်တောက်မှု၊ နယ်စပ်ကုန်သွယ်ရေးနဲ့ဆက်သွယ်ရေး ဖြစ်တောက်မှု စတဲ့နည်းလမ်းမျိုးစုံနဲ့ ဆက်တိုက် ဖိအားပေးနေတယ်လို့ ဆိုပါတယ်။
တရုတ်က စစ်တပ်ထံ စစ်လက်နက်ပစ္စည်းနဲ့ နည်းပညာ ကူညီထောက်ပံ့ပေးနေတာကြောင့် စစ်တပ်ဟာ စစ်ရာဇဝတ်မှု၊ လူသားမျိုးနွယ်အပေါ် ကျူးလွန်တဲ့ နိုင်ငံတကာ ရာဇဝတ်မှုတွေကို ပိုပြီး အားဖြည့်ပေးနေတယ်လို့ ပြောဆိုထားပါတယ်။
လူထုတွေကို ဦးတည်တိုက်ခိုက်နေတဲ့ စစ်ကောင်စီရဲ့ လေယာဉ်ဆီအပါအဝင် ခေတ်မှီ စစ်လက်နက်ပစ္စည်း ထောက်ပံ့ပေးနေတဲ့ နိုင်ငံ၊ အိမ်နီးချင်းနိုင်ငံနဲ့ လုပ်ငန်းရှင်အားလုံး ချက်ချင်း ရပ်တန့်ဖို့၊ စစ်တပ်ကို ကူညီထောက်ပံ့ပေးတဲ့လုပ်ငန်းနဲ့ စီးပွားရေးအရ လက်တွဲနေတဲ့ အခြားနိုင်ငံတွေကို စီးပွားရေး ပိတ်ဆို့မှု ပြုလုပ်ပေးဖို့ တောင်းဆိုထားပါတယ်။
