မိုးညှင်းခရိုင်၊ အင်းတော်ကြီးမှာ အရပ်သား ကချင်လူမျိုးတွေကို ရှမ်းနီအမျိုးသားများ တပ်မတော် (SNA) က သတ်ဖြတ်ခြင်း မရှိဘဲ သတင်းအချက်အလက် အမှားတွေနဲ့ ဖြန့်ဝေမှုက လူမျိုးရေးကို ဦးတည်စေတယ်လို့ မိုင်းနောင်ဒေသခံတစ်ဦးက ပြောပါတယ်။
ပြီးခဲ့တဲ့ ဇူလိုင် ၁၄ ရက်နေ့က အင်းတော်ကြီး ဒေသမှာ SNA နဲ့ ကချင်လွတ်လပ်ရေးတပ်မတော် (KIA) ပူးပေါင်းတပ်ဖွဲ့တို့အကြား တိုက်ပွဲဖြစ်ပွားခဲ့ပြီး မိုင်းနောင်၊ လုံးတုံ၊ မမုန်ကိုင်ကျေးရွာတွေကို SNA က သိမ်းပိုက်ထိန်းချုပ်နိုင်ခဲ့တယ်လို့ ဆိုပါတယ်။
အဆိုပါ တိုက်ပွဲတွေကြောင့် ဘေးကင်းရာ တိမ်းရှောင်သွားတဲ့ ဒေသခံတွေဟာလည်း ဇူလိုင်လကုန်ပိုင်းမှာ နေရပ်ကို အသီးသီး ပြန်ဝင်ရောက် နေထိုင်ကြပြီ ဖြစ်သလို စာသင်ကျောင်းတွေလည်း ပြန်လည်ဖွင့်လှစ်နိုင်ခဲ့ကြောင်း ပြောပါတယ်။
ဒေသခံတစ်ဦးက “အရပ်သားတွေကို သတ်ဖြတ်တာ မရှိပါဘူး။ ဒီမှာ SNA ထိန်းချုပ်တဲ့ မမုန်ကိုင်၊ လုံးတုံ၊ မိုင်းနောင် အေးအေးဆေးဆေးပါပဲ၊ ကျောင်းတွေလည်း ဖွင့်နေပြီလေ၊ ကချင်တွေကို သတ်တယ်ဆိုပြီး ရေးနေတာတွေက မဟုတ်ပါဘူးညယ်။ SNA က ပြန်လာဖို့တောင် ခေါ်နေသေးတယ်” လို့ ပြောပါတယ်။
SNA ထိန်းချုပ်ထားတဲ့ နန်းမွန်း၊ မိုင်းနောင်၊ မမုန်ကိုင်ကျေးရွာက ကချင် ၁၄ ဦးကို သတ်ဖြတ်ခဲ့တာလို့ ကချင်မီဒီယာတစ်ခုက ရေးသားဖော်ပြခဲ့ပြီး သေဆုံးသူတွေရဲ့ နာမည်၊ နေရပ် အတိအကျ ဖော်ပြထားခြင်းမရှိသလို SNA ကို အထင်အမြင် လွှဲမှားစေဖို့ ရေးသားချက်သာ ဖြစ်တယ်လို့ ဒေသခံတစ်ဦးက ပြောပါတယ်။
မိုးညှင်းဒေသမှာ ရှမ်း နဲ ကချင် လူမျိုးရေး ပဋိပက္ခ မဖြစ်ဖို့ ရှမ်းနီစာပေနှင့်ယဉ်ကျေးမှုကော်မတီအဖွဲ့ဝင်၊ ရှမ်းရိုးရာယဉ်ကျေးမှုအဖွဲ့၊ ကချင်ငြိမ်းချမ်းရေးအကျိုးဆောင်အဖွဲ့ (PCG)၊ ကချင်ဘာသာရေးခေါင်းဆောင်တွေ မြစ်ကြီးနားမြို့မှာ ဩဂုတ် ၁၁ ရက်နေ့က တွေ့ဆုံခဲ့ကြပါတယ်။
အဆိုပါ တွေ့ဆုံဆွေးနွေးခြင်း အစီအစဉ်မှာတော့ မိုးညှင်းခရိုင်အတွင်း လတ်တလောကြုံတွေ့နေရတဲ့ အခက်အခဲ၊ အခြေအနေတွေ၊ အဖြေရှာလုပ်ဆောင်နိုင်ခြင်း နည်းလမ်းတွေ၊ ကြိုတင်ကာကွယ်နိုင်မယ့် နည်းလမ်းတွေ ရှာဖွေဖော်ထုတ်ခြင်း၊ အကြံပြုဆွေးနွေးခြင်း၊ ထို့နောက် ဆွေးနွေးခြင်း ရလဒ်တွေကို စုစည်းတင်ပြခြင်း၊ အတည်ပြုခြင်း နဲ့ ရှေ့လုပ်ငန်းစဉ်တွေအတွက် အစီအစဉ်ချမှတ်ခြင်းတွေတာ တွေ့ရပါတယ်။
ကချင်သတင်းဌာနက ရေးသားသလို ကချင်အရပ်သား ၁၄ ဦးကို SNA က သတ်ဖြတ်ခြင်းဆိုသည့် ကိစ္စမှာ တစ်စုံတစ်ရာ မပါဝင်ဘဲ ဝါဒဖြန့် ရေးသားခြင်းသာ ဖြစ်တယ်လို့ ဆိုပါတယ်။
အင်းတော်ကြီး ဒေသခံတစ်ဦးက ” ကချင်မီဒီယာတွေရဲ့ တစ်ဖက်သတ် ရေးသားတာက ပဋိပက္ခဖြေရှင်းတာ မဟုတ်ဘဲ လူမျိုးရေး ဖြစ်ဖို့ကို ပိုပြီး တွန်းအားပေးသလို ဖြစ်နေတယ်၊ အမှန်ဆို မျှမျှတတ ရေးသင့်တယ်။ သူတို့ အခုလို ရေးလိုက်တော့ ကျနော်တို့ မြေပြင်မှာနေတဲ့ လူမျိုးစု အချင်းချင်း ပိုပြီး မယုံကြည်မှုတွေ ပိုဖြစ်စေတယ်” လို့ မှတ်ချက်ပြု ပြောပါတယ်။
မမုန်ကိုင်ကျေးရွာမှာ KIA ထိန်းချုပ်ထားချိန် ၂၀၂၅ ခုနှစ်၊ ဇွန်လ ၈ ရက်နေ့က သာသနာ့မြေ၊ စာသင်ကျောင်းနဲ့ ဘောလုံးကွင်းတို့ကို ရွှေလုပ်ငန်းရှင် ဦးဆန်းဝင်း နဲ့ KIA တပ်မဟာ 9 မှ ဦးဒေးဗစ်ဆိုသူတို့ ပေါင်း၍ ရွှေတူးဖော်မှုအား ကျေးရွာသားနဲ့အတူ ဆန္ဒပြကန့်ကွက်ခဲ့တဲ့ ဆရာတော် နှစ်ပါးကို KIA က ဖမ်းဆီးမှုတွေ လုပ်ဆောင်ခဲ့တဲ့ ဖြစ်စဉ်တွေလည်း ဖြစ်ပွားခဲ့ပါတယ်။
အလားတူ ဇွန်လအတွင်းမှာပဲ အင်းတော်ကြီးဒေသလုံးဆိုင်ရာရှမ်းနီရိုးရာစာပေနဲ့ ယဉ်ကျေးမှုကော်မတီ ဥက္ကဌ စိုင်းစိန်လွင်ဦးနဲ့ ကုန်းမနရွာသားတွေကို KIA က ရိုက်နှက်ဖမ်းဆီးသွားပြီး ရက်ပိုင်းအတွင်း ပြန်လွှတ်ပေးခဲ့တဲ့ ဖြစ်စဉ်တွေလည်း ရှိခဲ့တယ်လို့ ဆိုပါတယ်။
အင်းတော်ကြီးဒေသမှာ KIA ဟာ ရှမ်းနီတိုင်းရင်းသားတွေ နဲ့ အခြားသော လူမျိုးစုတွေကို အဓမ္မ တပ်သားသစ် စုဆောင်းတာ၊ ဖမ်းဆီး ရိုက်နှက်တာ၊ သတ်ဖြတ်တာ၊ အဆမတန် ဆက်ကြေးကောက်ခံတာတွေကို အစဉ်အဆက် လုပ်ဆောင်နေပြီး ရာဇဝတ်မှုတွေ ဆက်တိုက်ကျူးလွန်နေတယ်လို့ ဒေသခံတွေက ပြောပါတယ်။
မိုးညှင်းခရိုင် အင်းတော်ကြီးဒေသမှာ ရှမ်းနီလူမျိုးတွေက အများစု နေထိုင်ကြပြီး ဗမာ၊ ကချင် လူမျိုးစု အနည်းငယ်လည်း နေထိုင်ကြတယ်လို့ သိရပါတယ်။
